ESEKIELE 3
3
1God ki vi: “Igo, karena enoni ma, gu ngêa na buka ikê. Ma hemuri ko arâ ma ko tamasi tangara na Isiraelita.”
2Hoi, inê kê manganga, ma ngaia ki naka me i haraku na buka, kê ngêa. 3Ngaia ki vi: “Igo, karena enoni ma, gu ngêa na buka, gê vatego ikê. Go bote renia.” Inê kê ngêa, ma ki mamaki ngavê manga na pirui.
4Ma hemuri God ki vi: “Igo, karena enoni ma, gu râ tangara na Isiraelita ma ko hagarongora renigi na tamasinga iaku. 5Inê kê pe hagatorangenigo tangara na enoni, i tora getea ma ki bara na tamasinga iata, ma kê hagatorangenigo tangara hete na Isiraelita. 6Manga vi inê, ma kê hagatorangenigo tangara na enoni, i tora getea ma ki bara na tamasinga iata, na tamasinga go pe girara, ngaira ka page têtê viteamu. 7Ma na Isiraelita ki asa ta na hitangita, vige tê viteamu. Naka ma inê, ma ngaira ki asa nikâ, vige tê viteaku nogaku. Ngaira hato ka togeaga ma ka guguruga. 8Hoi, inê be katogo, ku togeaga ma ku nganganihaga nga mangara ngaira. 9Inê be katogo, ku gatagata manga na parisihê, ku gatagata teharia na hê misini bo. Siana ko magutenira na eragani na enoni ngegana.”
10Ma God ki vi nikâ: “Igo, karena enoni ma, gu karingagi maninga na tamasinga iaku, ma siana ko bonotenigi tani. 11Ma hemuri ko arâ tangara na kariamu, ga bani henahuraura tanga ikê, ma ko hagarongora renigi na tamasinga iaku, inê na Araha God, naka ma ngaira ka karingago, se i mareha.”
12Ma hemuri na raramohana God ki toreê akê, ma i muriku inê kê rongoa na ringe, i rongo raha manga na roga raha, ma ki vi: “Hagarahasia na Araha, i râ me igê na raramohana raha!”
13Inê kê rongogi nikâ na gagahata na marâ, ga mauri ngegana, ga hetahuru, ma kê rongogi nikâ na ringeni na wili. Ngaigi ki rongo raha manga na baganunu raha. 14Na raramohana na Araha ki angariê ngavê, ma ki toreê vê akê. Inê kê oba era ma kê mangariaga. 15Vikê inê kê ata vê i Telabibi igê na papana na ve i Kebare, na agua ga goga igê na enoni, ga bani henahuraura. Inê kê oga i pasita surigi na tangiani gi pi, ma kê beka surigi na marâ, gê bâsigi ma kê rongogi.
Na Araha ki kasia o Esekiele ki mane ni anumasiha
(Esekiele 33.1-9)
16I murini na tangiani gi pi na Araha ki tamasi tangê nikâ, ki vi: 17“Igo, karena enoni ma, inê kê kasigo, ko mane ni anumasiha iata na Isiraelita. Gu tamasi urusiê, ku hagarongora renigi na haganunuha iaku tangara. 18Manga inê ma kê vi, vi na enoni era ki page meme, ma igo ko pe tamasi tanga ku haganunua, ke urisi parongana, hanana vige tahitahi, ngaia ki page meme igê na tasi iana. Ma i ngekana inê be torego igê na tamasinga, suria go hagamesia. 19Ma ki manga igo, ma ko haganunua na enoni era, ma ngaia ki guguruga, ki ama ni tasitasi nga, ngaia ki page meme igê na tasi iana, ma igo ko page tahitahi. 20Manga na enoni koro maninga, ma ki kasia na parongana koro ma oto, ma ki haganega ki bagaparongana, inê kê page hagavotaria, ma ngaia ki page meme. Manga vi igo, ma ko pe haganunua, ngaia ki page meme renigi na bagaparongana. Inê ki asa be takusigi na parongana koro i nago. Ma tangago igo, inê be torego igê na tamasinga, suria go hagamesia. 21Ma ki manga igo, ma ko haganunua na enoni koro, hanana vi siana ki tasitasi, ma ngaia ki têtê viteamu ki pe tasitasi, ngaia ki page tahi, ma igo ko page tahi nogamu.”
O Esekiele ki bi
22Na raramohana na Araha ki angariê nikâ, ma kê rongoa, i vi tangê, ki vi: “Aharaga, ku râ tanga na maruguna. Inê kê obania be tamasi tangago i ngekana.”
23Ma inê kê râ tanga na maruguna, ma i ngekana inê kê bâsia igê na Araha igê na raramohana raha hunia, manga gê bâsia i nago i papana na ve i Kebare. Inê kê susure, kê tubê, ki puru so na maaku i ano. 24Na raramohana God ki angariê ma ki rageê aharaga. Na Araha ki tamasi tangê, ki vi: “Gu râ i ruma ma ku purusigo banu igê. 25Igo, karena enoni ma, ga page rakugo renigi na varo, ma ki bara tangago, vigu hura i metara, hanana vigu oga henira na enoni. 26Inê be katoa ke gâga na meamu ma ke puru igê na bêparegamu. Igo ko page bi, hanana siana ko haganunura na enoni guguruga ngegana. 27Ma hemuri, matena gê page tamasi tangago nikâ, igo ki page hato, vigu bi nikâ, hanana go page hagarongora renigi na tamasinga iaku, inê na Araha God. Tani ka page tê viteamu, ma tani ki mareha, suria ngaira ka na enoni ga guguruga ngavê.”
Currently Selected:
ESEKIELE 3: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific