TAHINGA 40
40
Na hagapuana na ruma na gahu iana na Araha
1Na Araha ki vi tanga o Moise, ki vi: 2“Igê na tangiana na haganegana na hageha hagenago go gasia na ruma na gahu iaku inê na Araha. 3Go naka igê na bokesi na suruheri, ga oga igê na tangahuri ramata, ma ko kuharenia na gahu igê na maana. 4I rarona ko naka igê nikâ na bea ma ko hagarêgi igê na ara ni marâ. Go naka banu nikâ igê na atohana na laiti henigi na laiti igê. 5Go naka na bea na golo tanga ga sungigi igê na marâ i sigini koro i maana na bokesi na suruheri, ma ku kuharenia na gahu i maana na ruma na gahu apuna iaku. 6Go naka i maana na ruma na gahu iaku na bea ga susu igê na votovoto. 7Go naka na maraguhu ni tananiha i berarogaterua na ruma na gahu apuna iaku ma na bea ni vogasiha ma ku hagavunusia renia na ve. 8Go ahia ki ririhu na agua hagenani ngekana renigi na gahu ma ko kuharenia na gahu igê na agua ga bêbanu igê.
9Ma hemuri ko hagapugi na ruma na gahu iaku ma na ara ni marâ hato getegi renia na oile apuna, hanana na ara ni marâ ngegana ka apuna. 10Hemuri ko hagapua na bea ni vogasiha henigi na ara ni marâ hato igê renia na oile, hanana ngaigi hato ki apuna. 11Go hagapurerua vikana nikâ na maraguhu ni tananiha ma na bea i oga igê.
12Go unira o Aroni ma o karena tanga na maani ruma na gahu iaku, ma ko tananira renia na ve, hanana ga matarotaro i maaku. 13Go hagatugunia o Aroni renigi na gahu iata na mane ni vogasiha, ko monea renia na oile apuna. Vikana ngaia ki apuna ma ki araria, i tagara tangê manga na mane ni vogaiha. 14Gu unira me o karena ma ko hagatugunira renigi na tuguni iata na mane ni vogasiha. 15Hemuri ko monera nogata renia na oile apuna manga o vaemata, hanana ngaira ka girara ga tagara tangê manga na mane ni vogasiha. Na moneha ngekana ki katora, ka voravora re na mane ni vogasiha tare ki bê ki arâ.”
16O Moise ki katogi vigana surigi na tamasinga iana na Araha tanga. 17Vikê na tangiana na haganegana na hageha hagenago igê na ruata na harisi i murina ga hura tenia i Esipito, ngaira ka gasia na ruma na gahu apuna iana na Araha. 18O Moise ki nakagi so na apinige na peregana na ruma, ki hagêrasigi na u igê, ma ki nakagi na bênivoro ma na gogohane. 19Ngaia ki gasia na ruma na gahu iana na Araha ma ki buhia hagenani renia na ani getea na gahu, manga na Araha i bani bonasia renia. 20Ngaia ki nakarerua na hê aberabera gi rua i rarona na bokesi na suruheri. Ngaia ki suvarenirerua na totora gi rua i na apanenaheri na bokesi ma ki buhia. 21Hemuri ngaia ki naka na bokesi i rarona na ruma na gahu apuna ma ki kuharenia na gahu pusia, hanana siana ka bâsia, manga na Araha i bani bonasia renia.
22Ngaia ki naka na bea i rarona na ruma na gahu i mahana na gahu i kuku i maana na ruma na gahu apuna iana na Araha. 23Ma igê na bea ngaia ki nakagi igê na bereti, ga tagarenigi tanga na Araha, manga na Araha i bani bonasia renia. 24Ngaia ki naka na atohana na laiti i rarona na ruma na gahu i na apanena râ i otona na bea. 25Ngaia ki tangagi na laiti tanga na Araha, manga na Araha i bani bonasia renia. 26Ngaia ki naka na bea ni vogasiha na golo i rarona na ruma na gahu i na apanena hura na kiboru apuna, 27ma ki sungigi igê na marâ i sigini koro, manga na Araha i bani bonasia renia. 28Ngaia ki kuharenia na gahu i maana na ruma na gahu. 29Ma i na apanena hura ngaia ki naka igê na bea tanga ga susu igê. Ngaia ki susu igê na ganiani ma na koni, manga na Araha i bani bonasia renia. 30Ngaia ki naka na maraguhu ni tananiha i berarogaterua na ruma na gahu ma na bea ni vogasiha ma ki hagavunusia renia na ve. 31-32I na ara ni matena o Moise, o Aroni ma o karena ka bêbanu igê na ruma na gahu se tanga na bea ni vogasiha, ngaira ka tanani rima ma ka tanani uga i ngekana. 33O Moise ki ahia rihu na ruma na gahu ma na bea ni vogasiha ma ki kuharenia na gahu igê na agua ga bêbanu igê. Hoi, ga hato na ara ni tagaraha hato iana.
Na vaha ki buhia na ruma na gahu iana na Araha
34Na vaha ki buhia na ruma na gahu ma na bâbâhana raha na Araha ki raro igê. 35Tahema o Moise ki bara vige banu igê. 36I na ara ni matena na vaha ki akê tenia na ruma na gahu, na Isiraelita ka tatavoraha hanana ga taunga nikâ i tagua. 37Matena i gâga ma na vaha, ngaira ki asa iata vige tavoraha. 38Igê na râha iata hagenani ngaira ka bâsia tare na vaha igê na ruma na gahu iana na Araha igê na tangiani, ma igê na bunigani ngaira ka basia tare na gi i mave.
Currently Selected:
TAHINGA 40: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific