TAHINGA 39
39
Na tagarahiani na gahu ni mane ni vogasiha
(Tahinga 28.1-14)
1Ngaira ka tagarahigi na gahu ni mane ni vogasiha tanga ga hagesuru renigi matena ga tagara igê na kiboru apuna, renigi na sigani na varehuta na sipi. Tani na sigani ka maravarava, tani ka rotorotoaga memera ma tani ka memera. Ngaira ka tagarahigi na gahu ni mane ni vogasiha tanga o Aroni suria na bonasiha iana na Araha tanga o Moise.
2Ngaira ka tagarahia na gahu ni parematona renia na gahu siki ni Esipito, i uririga maravarava, rotorotoaga memera ma ki memera na varehuta na sipi ma na sigani na golo. 3Ngaira ka putagigi na golo ka aberabera ma ka manihinihi ngavê, ka tarigi ka vora na sigani, tanga ga surigi igê na gahu siki ni Esipito, i uririga maravarava, rotorotoaga memera ma ki memera na varehuta na sipi. 4Ngaira ka tagarahirerua na kakavina gi rua na gahu ni parematona, i sururerua tonganirerua na gaparana. 5Na hogosina, i uririga vikana nikâ, ki rato haku henia na gahu ni parematona suria na bonasiha iana na Araha tanga o Moise. 6Ngaira ka hagarerua na hê memera i raha na meterua ma ka hanga renirerua igê na kiru na golo. Ga bani tarigi bâkoro igê na atata o karena tangahuru matarerua o Jakobo. 7Ga turarerua tonganirerua na kakavina na gahu ni parematona suria na bonasiha iana na Araha tanga o Moise. Ngairerua na hê ngegana ka na girarana vi na varo ninuni tangahuru matarerua iana o Isiraele.
Na tagarahiana na anga ni girarasiha
(Tahinga 28.15-30)
8Ngaira ka tagarahia na anga ni girarasiha renigi na marâ ga tagenani ma henigi na ani ga tagarahia re na gahu ni parematona ma ka turagi igê na mahe mangagi ngegana nikâ. 9Ngaira ka pinoa ki heavore na apaneniheri: na ara ni apaneni ki 20 sentimita. 10Ga turagi igê na harahara ge he na hê i raha na meni. Igê na harahara gi tage ka na hê gi oru: tani ki memera, tani ki hereherega ma tani ki maravarava. 11Igê na ruata na harahara ka na hê gi oru nikâ: tani ki rotorotoaga memera, tani ki siki maravarava ma tani ki toratorakaga. 12Igê na oruta na harahara ka na hê gi oru nikâ: tani ki siki maravarava, tani ki hereherega ma tani ki rotorotoaga memera. 13Igê na heta na harahara ka na hê gi oru nikâ: tani ki rotorotoaga maravarava, tani ki makomakoga ma tani ki memera. Ngaigi ka hanga renigi igê na kiru na golo. 14Tonganigi na tangahuru matarerua ngegana ka tarigi igê na atata o karena tangahuru matarerua o Jakobo, hanana ga hagabângenira na varo ninuni tangahuru matarerua iana o Isiraele. 15Tanga na anga ni girarasiha ngaira ka garorogi na garo renigi na sigani na golo taranina. 16Ngaira ka tagarahigi na kiru na golo gi rua ma ka nakarerua na ringi igê na sukuni gi rua akê na anga ni girarasiha. 17Ngaira ka rakurerua na ringi gi rua renirerua na garo gi rua na golo, 18ma ka surugi ta bogaterua na garo tonganirerua na kiru. Ngekana ngaira ka sururerua i na apanena hura na kakavina i gaparana gi rua na gahu ni parematona. 19Ngaira ka tagarahirerua na ringi na golo ma ka rakurerua tonganirerua na sukuterua kere vato na anga ni girarasiha i na apanena banu tanga na gahu ni parematona. 20Ngaira ka tagarahirerua nikâ na ringi na golo gi rua ma ka rakurerua i na parematona i berarogaterua na anga ni girarasiha ma na hogosina. 21Suria na bonasiha iana na Araha tanga o Moise ngaira ka suvarenirerua na garo maravarava igê na ringi na anga ni girarasiha ma na gahu ni parematona, hanana na anga ni girarasiha ki gâga gatagata i avorana na hogosina, hanana siana ki guruguru rârâ.
Na tagarahiani na ani getigi na gahu ni mane ni vogasiha
(Tahinga 28.31-43)
22Na tuguni i kuku huria na tuguni borahu ki maravarava ma ka tagarahia renigi na varehuta na sipi. 23Na makuruha tanga na riona ka turatura pusia na ahehena renia na gahu i gatagata, i era ma ki tatari. 24-26Rihuia na taretarena so hagenani na tuguni ngekana ngaira ka kuharenigi igê na marâ ga bâ mangagi na guani na apinige buburi ma na kere belo sisite na golo, suria na bonasiha iana na Araha tanga o Moise. Na guani na apinige buburi ngaira ka tagarahigi renia na gahu siki ni Esipito, i uririga maravarava, rotorotoaga memera ma ki memera na varehuta na sipi. Ngaigi na belo ma na guani ngegana ka kuku hetorariga vigana, ki rihu ki taku.
27-29Suria na bonasiha iana na Araha tanga o Moise ngaira ka tagarahigi na tuguni abubu tangara o Arone mo karena, na bubuhibê iata, na esara iata ma na kâhisita renigi na gahu ni Esipito; ma na hogosita ka na gahu siki ni Esipito, i uririga maravarava, rotorotoaga memera ma ki memera na varehuta na sipi, ga turagi igê na mahe. 30Ngaira ka tagarahia na tarepuri apuna renia na golo taranina, i vi vi na mane ni vogasiha ki na anina na Araha, suria ga tarigi igê na tamasinga igê: “Na anina na Araha.” 31Ngaira ka rakua na tarepuri ngekana renia na sigana maravarava igê na bubuhibê bême i raena, suria na bonasiha iana na Araha tanga o Moise.
Na hagahatungina na tagaraha
(Tahinga 35.10-19)
32Na ara ni tagarahiana na ruma na gahu apuna iana na Araha ki uhu. Na Isiraelita ka tagarahigi na ara ni marâ suria na bonasiha iana na Araha tanga o Moise. 33Ngaira ka migirâ me tanga o Moise na ruma na gahu apuna henigi na ara ni marâ hato tanga: ngaigi na kavikavi, na apinige na apê hagêra, na bênivoro, na u henigi na kiru na hunani, 34na bubuhina ga tagarahia renigi na gavota na sipi mane ma ka pupunigi memera, na bubuhina mamao ga tagarahia nikâ renigi gavota na sipi, na gahu i kuku, 35na bokesi na suruheri garu oga igê na hê na ramata, ngairerua na apinige ni tugiha ma na bubuhina, 36na bea henigi na marâ hato tanga ma ngaigi na bereti tanga na Araha, 37na atohana na laiti na golo taranina, ngaigi na laiti henigi na marâ hato tanga ma na oile tangagi na laiti; 38na bea ni vogasiha na golo, na oile ni moneha; na marâ i sigini mamaki matena ga sungia; na gahu i kuku i maana na ruma na gahu apuna; 39na bea na kapa i higa henia na bea ga hêria aberabera renigi na sigani na kapa higa; ngairerua na apinige ni tugiha ma na ara ni marâ hato tanga; na maraguhu ni tananiha henia na hunana; 40ngaigi na gahu ga kuku rihia na mahera ma na u henigi na kiru na hunani; na gahu i kuku i maana na mahera henigi na varo; na rapurapu tanga na ruma na gahu apuna; na ara ni marâ hato tanga na hagarahenga i rarona na ruma na gahu apuna; 41na gahu bâkoro ni mane ni vogasiha tanga ga tuguni re igê na ruma apuna; na gahu apuna tangara o Aroni na mane ni vogasiha ma o karena. 42Na Isiraelita ka hatungigi na ara ni tagaraha hato suria na bonasiha iana na Araha tanga o Moise. 43O Moise ki haharirigi na ara ni marâ hato ma ki tarahua, vi na ara ni marâ ka tagarahigi suria na bonasiha iana na Araha. Ngekana o Moise ki nungia na Araha ki korokoro tangara na Isiraelita.
Currently Selected:
TAHINGA 39: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific