AMOSE 3
3
1Isiraelita,
mu karinga na tamasinga iana na Araha renigamu,
suria ngaia ki toregamu hura, igamu hato,
na ara ni hitangimi, tenia i Esipito.
2Ngaia ki vi: “I berarogata na enoni hato i maveta
igamunga nga na ani inê kê ategamu
ma inê kê marupegamu.
Tahema na bagaparongami ka erataga ngavê.
Vikê inê be hagaitangigamu renigi.”
Na tagaraha iana na poropete
3Na vererua na mane karu girara garu haku vari,
manga vi garu pe bani hesurusuru?
4Na o ki ngerengere vari,
manga vi pe tarahua na ganiana?
Na laione ki ngurunguru vari igê na tâtâ iana,
manga vi pe ranguia na ganiana?
5Na siare ka arara vari igê na hinu,
manga viga pe aragenia igê na pa?
Na tu rikiriki ki rikiriki vari,
manga viga pe puria ke roroa vato?
6Na enoni i hinua ka magu vari,
manga viga pe rongoa na ahuri ni me?
Na bagabevoani ka tarahua vari na hinua,
manga vi na Araha ki pe hagamarumungenigi?
7Hoi, na Araha God ki pe hagapurungunira
na poropete, na kariana.
8Manga na laione ma ki ngurunguru,
ti ki pe magu?
Manga na Araha ma ki tamasi,
ti ki usisi, vige tarohenia na tamasinga iana?
Na hagaitangiha tangara na Isiraelita
9Na Araha ki tamasi, ki vi:
“Gu hagarongora na enoni raha i Esipito me Asitote,
ko vivi, ‘Mu haku me igê na hungani rihia Samaria,
ma kamu bâsira na enoni i ngekana, ga hemeronge,
ma ka mamasiaga heri.’
10Na enoni i Samaria ka page hagavunusigi na ruma raha iata
renigi na marâ, ga hanagogi ma ka henahuraugi.
Ngaira ka hitenia ngavê, vi na ta ki koro.
11Tahema inê na Araha kê vi:
Ai ni Samaria, na merongami ka page taharigamu,
ma ka page hogegi na ruma nganganihaga, mu rukuruku igê,
ma ka page hanagogi na nahuninga iami.”
12Na Araha ki vi:
“Na avanu ni sipi ki tahura ma
na mumukugani na êgana se na karingana na sipi iana
tenia na harana na laione.
I tagenana ma tangara na Isiraelita ga oga i Samaria.
Na kere agua ma na bea se na bana iata ka page hita râ.”
13Na Araha raramohaga hunia ki vi:
“Karinga!
Hagakanura na raraha iana o Jakobo.
14Igê na tangiana, gê page arâ me igê,
inê kê hagaitangira na Isiraelita
renigi na bagaparongata.
Inê be hogegi erasigi na bea ni vogasiha i Betele
ma na ara ni tava ni ahiahinga.
15Inê be hogegi na ruma ma na ruhu.
Ka page ahoge na ruma maremarega.
Na ara ni ruma hato ka page tâ i ano.
Ngaia kani gê visia, inê na Araha.”
Currently Selected:
AMOSE 3: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific