AMOSE 2
2
Moaba
1Na Araha ki vi:
“Na ai ni Moaba
ka bani tasi bâraha ngavê.
Tahema inê be hagaitangira nga.
Ngaira ka pe hagahigasia na maneraha i Etome,
ma ka sungigi hagamakakagi na surina.
2Inê be sungigi na hinua hato i Moaba.
Na gi ke ngêgi na ruma nganganihaga i Keriote.
Na ai ni Moaba ka page meme igê na hearihatana,
matena na mane ni me ka ngerengere raha
ma ka uhihi ahuri.
3Inê be nahuira ke me na maneraha i Moaba
ma na kariana hato.
Ngaia kani gê visia, inê na Araha.”
Juta
4Na Araha ki vi:
“Na ai ni Juta
ka bani tasi bâraha ngavê.
Tahema inê be hagaitangira nga.
Ngaira ka kitenigi na hagesuringa iaku,
ma ka aharê igê na ramata iaku, inê na Araha.
Mangara na uvarita ngaira nogata
ka vogasira na ataro, ga hagatasira.
5Inê be sungigi na hinua hato i Juta.
Na gi ke ngêgi na ruma nganganihaga i Jerusaleme.”
God ki page hagaitangira na Isiraelita
6Na Araha ki vi:
“Igamu Isiraelita,
kamu tasi bâraha ngavê.
Tahema inê be hagaitangigamu nga.
Igamu kamu hagavuringenira na enoni koro,
i bara tangara, vige vuri tangagamu
na hagaba mu vatera,
ka vora renira na enoni vurivuri.
I tagenana ma mu katora vigana na enoni matareha,
i bara tangara, vige vuri tangagamu
na hagaba mu vatera,
naka ma na santere iata.
7Igamu kamu purira so na enoni matareha,
mu kitenira ma kamu sikirira hura
na enoni purua ma na ani i bara tangara.
O hemana karu rongo era henia na kere gete vurivuri.
Igê na tarana ngekê ngairerua karu pe hanetasiê.
8I rarona ni ruma ni hagarahenga
igamu kamu mêru igê na gahu,
mu toregi tenira na enoni matareha,
girarani, vi ngaira ka page vurigi tangagamu
na hagaba mu vatera.
Igê na tarana ngekê igamu kamu aharê igê na ramata iaku.
I ruma ni rotu iana God, mu rahesia,
igamu ki ruguhigamu na vaini,
mu hanagogi tenira na enoni,
ga vuripusira mareta renigi tanga na rotu.
9“Isiraelita, kariaku, inê nga kê tamanigamu.
Inê nga kê hagaerasira ngavê na merongami ni Amone.
Naka ma ngaira ka borahu mangagi na nuri
ma ka gatagata mangagi na gugura,
inê kê okeke pirira.
10Inê nga kê tavogamu hura tenia i Esipito,
ma kê bêngenigamu igê na bagamasusu raha
surigi na tangahuru ge he na harisi,
ma kê haganahunigamu renia na mako iata na Amorita.
11Tani na hitangimi inê kê atera ka poropete.
Ma tani na mane haoru inê kê atera ka Nasarita.
Isiraelita, inê na Araha, kê vi monari se mareha?
12“Ma igamu nga kamu hagatasira na Nasarita,
suria mu hagatonomira renigi na vaini,
ma kamu vi pusira na poropete,
vi siana ka tarohenia na tamasinga iaku.
13Tahema inê be hagaitangigamu ma be hagavotarigamu
manga na toraha higa i hagavotaria na enoni
ma ki piringia so i ano.
14Naka ma na enoni, i tangotango rêrê era,
i asa vige tahi.
Naka ma na enoni, i ramo ngavê,
na raramohana ki page vato.
I asa na mane ni me, vige hagatahira mareta.
15Na mane henigi na epage ni me
ka page sugare bê aporo.
Na enoni, ga tangotango rêrê,
ki asa vige tahi.
Na mane ni me igê na hosi
ki asa vige hagatahira mareta.
16Igê na tangiana ni hagaitangiha ngekana
naka ma na mane ni me ramo teha ngavê,
ngaira ka page kasigi na tangaruha iata
ma ka gavagava.
Ngaia kani gê visia, inê na Araha.”
Currently Selected:
AMOSE 2: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific