2 MANERAHA 1
1
O Elia ma na maneraha o Agasia
1I murina i me o Agaba na maneraha i Isiraele, na ai ni Moaba ka merongasia i Isiraele.
2O Agasia na maneraha i Isiraele ki vota igê na ravoravo i na akerena na aberaberagana na gerina na ruma raha iana i Samaria, ki so i ano. Ngaia ki mamari ngavê. Vikê ngaia ki hagatorangenira na mane tora tamasinga, ka hagatea o Balasebubu na ataro i Ekerone na hinua iata na Pilisitina, hanana ga tarahua, vi ngaia ki meme se mareha. 3Ma na angero iana na Araha ki bonasia o Elia na poropete i Tisibe, ki râ ma ki merahetarahu na mane tora tamasinga iana na maneraha o Agasia, ma ki hagatera, ki vi: “Tanu hega kani vi mu arâ kamu hagatea o Balasebubu na ataro i Ekerone? Suria mu vari takusia vi i Isiraele ki mareha rârâ igê God? 4Râ kamu hagarongoa na maneraha, vi na Araha ki vi vikê: ‘Igo ki asa vigu tahi renia na mamariha iamu. Igo ko page meme nga!’”
O Elia ki tê viteana na Araha. 5Na mane tora tamasinga ka aporo tanga na maneraha. Ma ngaia ki hagatera, ki vi: “Tanu hega kanimu aporo me?”
6Ngaira ka arami, ka vi: “Igami kami tarahua ta na mane ma ngaia ki bonasigami kami aporo me, hanana mi hagarongogo, vi na Araha ki tamasi vikê tangago, ki vi, ‘Tanu hega kanigo hagatorangenira na mane tora tamasinga, hanana viga hagatea o Balasebubu na ataro i Ekerone? Suria go takusia vari, vi i Isiraele ki mareha rârâ igê God? Igo ki asa vigu tahi renia na mamariha iamu. Igo ko page meme nga!”
7Na maneraha ki hagatera, ki vi: “Na mane i bâ mara ta?”
8Ngaira ka arami, ka vi: “Ngaia ki aruha renia na aruhana ga tagarahia renigi na varehuna na kamelo ma ki hogotenia i kâna na hogosina ga tagarahia renia na gavona na puruka.”
Na maneraha ki gasuga, ki vi: “O Elia nge!”
9Vikê ngaia ki hagatorangenia na mane i bêngenira na tangahuru gi rima na mane ni me, ka merâ me o Elia. Na mane ngekana ki tarahua o Elia, i oga so igê na hungana, ma ki vi tanga, ki vi: “Poropete iana God, na maneraha ki bonasigo vigo soso.”
10O Elia ki arami, ki vi: “Manga vi na poropete iana God kani inê, hoi, na gi ke so me tenia na vavearo ma ke ngêgamu, igo ma na mane ni me iamu.” Na gi ki parama ma ki so me ki ngêa na mane ngekana henira na mane ni me iana.
11Na maneraha ki hagatorangenia nikâ na mane henira na tangahuru gi rima na mane ni me. Ngaia ki tagere nogana ma ki vi tanga o Elia, ki vi: “Poropete iana God, na maneraha ki bonasigo, vigo soso ototo râ nga!”
12O Elia ki arami, ki vi: “Manga vi na poropete iana God kani inê, hoi, na gi ke so me tenia na vavearo ma ke ngêgamu, igo ma na me iamu.” Na gi iana God ki parama ma ki so me ki ngêra na mane ngekana ma na me iana.
13Na maneraha ki hagatorangenia nikâ na mane henira na tangahuru gi rima na mane ni me. Ngaia ki tagere nogana, ki susure i maana o Elia, ma ki nungia nga, ki vi: “Poropete iana God, gu takigami inê ma na me iaku. Siana ko hagamesigami! 14Na mane gi rua henira na mane ni me iaterua ki bani ngêra na gi, i so me tenia na vavearo. Inê kê nungigo nga, gu takuiê!”
15Na angero iana na Araha ki vi tanga o Elia, ki vi: “Gu so henia. Siana ko magu.” Vikê o Elia ki so henia na mane ngekana tanga na maneraha. 16Ngaia ki vi tanga na maneraha, ki vi: “Na Araha ki tamasi vikê tangago, ki vi, ‘Suria igo ko hagatorangenira na mane tora tamasinga, hanana viga hagatea o Balasebubu na ataro i Ekerone, manga vi i Isiraele ki mareha rârâ igê God, hanana vigo hagatea, tahema igo ki asa vigu tahi. Igo ko page meme hete!’”
17O Agasia ki me, manga i bani visia na Araha i harana o Elia. O Agasia ki pe apara rârâ na kare mane. Tahema o Jorama o vesina ki urusia ki maneraha. Na tarana ngekê ki akê me igê na ruata na harisi o Jehorama karena o Josapata i maneraha surirerua i Juta.
18Na tauhana hato getigi na maneraha o Agasia ka bani segegi so igê na buka ni sihonga renira na maneraha i Isiraele.
Currently Selected:
2 MANERAHA 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific