1 MAHERAHA 22
22
O Mikaia na poropete ki tamasi pusia o Agaba
(2 Sihonga 18.2-27)
1Surirerua na harisi gi rua na Isiraelita ma na ai ni Siria ka pe heariha rârâ igê. Na marapeha ki oga i berarogata. 2Ma igê na oruta na harisi o Josapata na maneraha i Juta ki râ ki bâsia o Agaba na maneraha i Isiraele.
3O Agaba ki hagatera na mane ni hagaotonga iana, ki vi: “Tanu hega igia ka pe uhungia rârâ, vige têa aporo i Ramote i Gileata tenia na maneraha i Siria? Na hinua iaka ngekana!” 4Hoi o Agaba ki hagatea o Josapata, ki vi: “I hega, igo ko arâ me heniê karu taharia i Ramote?” O Josapata ki arami, ki vi: “Mako, inê kê nanê matena go nanê, ma nikâ na mane ni me iaku ma na hosi iaku. 5Ma ki naka ke hagatea hagenago na Araha.”
6Vikana o Agaba ki unira me na poropete, na ararina na tangarê gi he ma ki hagatera, ki vi: “I hega, i koro ma vigê arâ kê taharia i Ramote se mareha?”
Ngaira ka arami, ka vi: “Gu taharia. Na Araha ki page katogo ko teharia.”
7Ma o Josapata ki hagatea o Agaba, ki vi: “I hega, i mareha vi ta na poropete râ nikâ, hanana vige hagatea na Araha tangagia?”
8O Agaba ki arami, ki vi: “Ua, na ani gi tage kani gâga mênga, o Migaiehu karena o Imila. Ma inê kê usitenia, suria ngaia ki pe tamasi poropete renigi noga na tarani vige koro tangê, ma na tarani ga era ma tangê.”
O Josapata ki arami, ki vi: “Siana ko vi vikana.”
9Vikê o Agaba ki unia banu na mane ni hagaotonga ma ki bonasia, ki râ ki merâ me ototo râ o Migaiehu.
10Na maneraha gi rua karu tuguni renigi na tuguni i marisiterua vi na maneraha. Ngairerua karu oga so igê na atohaterua igê na agua ni hatanga i metara na maani para i Samaria. Na poropete hato ka tamasi poropete i maaterua. 11O Sitikia karena o Kenana na hitangita ki nakarerua i bêna na aiani na hona ma ki tamasi tanga o Agaba, ki vi: “Na Araha ki vi vikê: Renirerua na honi ngegê igo ko page nahuira na ai ni Siria ma ko page teharira ngavê.” 12Na poropete hato getera ka tamasi nogata ka vi: “Taharia i Ramote i Gileata! Igo ko page teharia.” Ngaira ka vi: “Na Araha ki page katogo ko teharia.”
13Ngekana na mane ni hagaotonga i bani merâ me o Migaiehu, ki vi tanga o Migaiehu, ki vi: “Na poropete hato getera ka tamasi poropete renigi na marâ hato viga page tavoraha bâkoro ma tanga na maneraha. I ararigo, vigo tamasi vikana nogamu.”
14Ma o Migaiehu ki arami, ki vi: “Inê kê tohe renia na Araha mamauri, vi inê kê page tamasigi ma na marâ i hagatorê renigi!”
15Matena i ura i maana na maneraha o Agaba, o Agaba ki hagatea, ki vi: “Migaiehu, i hega, i arari ma vi igamirua na maneraha o Josapata menê kamuru arâ kamuru taharia i Ramote i Gileata se mareha?”
O Migaiehu ki arami, ki vi: “Mako! Taharia. Igamurua kamuru page tehateha. Na Araha ki page katogamurua kamurua tehateha.”
16Ma o Agaba ki arami, ki vi: “Go tamasi nga igê na monariha, matena go tamasi urusia na Araha! Hagarako inê kê bani tamasi tangago vikana.”
17O Mikaiehu ki arami, ki vi: “Inê kê bâsia, vi na mane ni me na Isiraelita ka totoko surigi na hungani mangara na sipi i mareha na ani hanana vige bêngenira. Nakara ke aporo suri parongata i pasita!”
18O Agaba ki vi tanga o Josapata, ki vi: “I hega, inê kê pe bani vi tangago, vi ngaia ki mareha rârâ vige tamasi poropete renigi na tarani ge koro tangê. Tarema na tarani ga pe koro tangê!”
19Ma o Mikaiehu ki vi: “Karinga na tamasinga iana na Araha! Inê kê bâsia na Araha ki oga igê na atohana i pasina. Na angero hato iana ka ura hetangenia. 20Na Araha ki hagatera, ki vi, ‘Ti na hitangimi kani page hagabekasia o Agaba, hanana vi arâ tanga i Ramote, ka nahuia ki meme igê?’ Tani na angero ka visia ta na marâ ma tani ka visia ta na marâ getea. 21Rârâ ma ta na angero ki ura râ tanga na Araha ma ki vi, ‘Inê be hagabekasia.’ 22Na Araha ki hagatea, ki vi, go hagabekasia hega? Na angero ki arami, ki vi, ‘Gê page arâ kê katora na poropete hato iana o Agaba ka hagaparu.’ Na Araha ki vi, ‘Gu râ ku hagabekasia. I girara ma!’”
23O Migaiehu ki hatungia na tamasinga iana, ki vi: “Nga hanana ngekana! Na Araha ki katora na poropete iamu ngegana ka hagabekasigo, suria ngaia marena ki bani naka vi na bagabevoana ki page tarahugo.”
24Hoi, na poropete o Sitikia ki ura râ tanga o Migaiehu ma ki bahitaria ma ki hagatea, ki vi: “I tanu hega? Na raramohana na Araha ki hato teniê inê vari ma ki angarigo igo hanana go tamasi poropete?”
25O Migaiehu ki arami, ki vi: “I ta na tangiana igo ko page ahiahi i murina banu ta na ruma ma ko kahu girara.”
26Hoi, na maneraha o Agaba ki haribona, ki vi: “Hagatotongoa o Migaiehu ma kamu torea tangarerua o Amone, i bosuria na hinua ma o kareku o Joasa. 27Vi tangarerua karu kasia i ruma ni hagaitangiha ma karu hagangêa renigi ma na bereti ma na ve mataro me kê aporo me purupurungunihaga.”
28O Migaiehu ki vi: “Manga go aporo me purupurungunihaga, ngekana, ki vi, vi na Araha ki pe tamasi i haraku!” Ngaia ki vi nikâ: “Igamu hato mu karinga na tamasinga iaku.”
I me o Agaba
(2 Sihonga 18.28-34)
29Hemuri o Agaba na maneraha i Isiraele mo Josapata na maneraha i Juta karu râ ma karu taharia na hinua i Ramote i Gileata. 30O Agaba ki vi tanga o Josapata, ki vi: “Matena garu arâ tanga na hearihatana, inê kê atani gahugahu mavê, hanana na enoni ki asa vige bâgirarê, ma igo ma kanigo tuguni nga manga na maneraha.” Vikê na maneraha i Isiraele ki atani tuguni mavê matena i râ tanga na hearihatana.
31Na maneraha i Siria ki bani bonasira na mane tangahuru gi oru matara gi rua ga bêngenira na mane ni me igê na kati ni me, hanana ga taharia na maneraha i Isiraele, mareha rârâ vi tani getea râ nikâ. 32Vikê matena ga bâsia na maneraha o Josapata, ngaira hato ka takusia ma, vi ngaia ki na maneraha i Isiraele ma ngaira ka ahoro tanga ka taharia. Ma na matena i ngere, 33ngaira ka kahu girara, vi ngaia ki mareha vi na maneraha i Isiraele, ma ka naka vê ma, ma ka pe taharia. 34Ma ki akê me, ngaia na mane ni me ni Siria ki hanatenia na mage. Na mage ki tarabanu igê na berarogani na ênahina na tuguni ni hearihatana iana o Agaba na maneraha ma ki hagamamaria. O Agaba ki vi tanga na mane i torea na kati ni me iana, ki vi: “Inê kê mamari! Gu kariarigu! Toreê hura tenia na hearihatana!”
35Matena i akê me bâraha ngavê na hearihatana na maneraha o Agaba ki têa ki ura igê na kati ni me iana, ki maatira na ai ni Siria. Na gapuna ki gogo tenia na mamariha iana, ki so ki gahuia na rarona na kati. Ngaia ki me igê na manurahitagana. 36Matena i susu noga na arito, na tamasinga ki râhigi na harahara hato na Isiraelita, ki vi: “Mu aporo i pasimi, igamu hato!”
37Nga hanana i me na maneraha o Agaba ngekana. Na gahuana ka torea râ i Samaria ma ka bagia igê. 38Na kati ni me iana ka tanania igê na nonganonga i Samaria. Na o ka namigi na gapuna ma na êrâ ka mamanu igê, manga i bani visia na Araha.
39Na tauhana hato getigi o Agaba na maneraha henigi na sihonga renia manga i he kani hagamahea na ruma raha iana renigi na marâ ga bâkoro ma henigi na sihonga renigi na hinua hato i tagarahigi, ngaigi ka bani segegi so igê na buka na sihonga renira na maneraha i Isiraele. 40Matena i me, o Agasia o karena ki maneraha urusia.
O Josapata na maneraha i Juta
(2 Sihonga 20.31—21.1)
41Matena na maneraha o Agaba ki bani marungia i Isiraele surigi na harisi ge he, o Josapata karena o Asa ki vora re na maneraha i Juta, 42matena i tangahuru gi oru matare rima na harisi iana. Ngaia ki oga i Jerusaleme ma ki marungia i Juta surigi na harisi tangahuru gi rua matare rima. Kenana kani ka Asuba ka karena o Siligi. 43Tagenana manga o Asa o vaemana, ngaia nogana ki katogi na tarani ga oto i maana na Araha. Ma na agua ni vogasiha ahuroto ka pe hagamagahurugi ma na enoni ka ama ni vogasi ma ka susu nga igê. 44O Josapata ki mehekorokoro na maneraha i Isiraele.
45Na tauhana hato getigi o Josapata ma na togeaganiha hato iana igê na hearihatana ka bani segegi so igê na buka na sihonga renira na maneraha i Juta. 46Ngaia ki hagamagahurura na êrâ hato, na mane ma na gete, ga tagara igê na agua ga oga igê na bea ni vogasiha ahuroto, na ani ga hita râ igê na matena iana o Asa o vaemana.
47I Etome ki mareha rârâ na maneraha. Na maneraha i Juta ki atea na mane i marungia i Etome urusia.
48Na maneraha o Josapata ki tagarahigi na haka ni rârâha hagatê, hanana ga arâ tanga i Opiri tangagi na golo. Ma na haka ka abotabota i Esione Gebere ma ki mareha vige râ. 49Hemuri o Agasia na maneraha i Isiraele ki meherongorongo o Josapata, vi na kariaterua ngairerua hato ka toregi na haka, ma o Josapata ki usi.
50O Josapata ki me ma ka bagia igê na matahuta na maneraha i Hinua iana o Tavite, ma o Jehorama o karena ki maneraha urusia.
O Agasia na maneraha i Isiraele
51Matena o Josapata ki bani maneraha i Juta surigi na harisi tangahuru gi tage matare pi, o Agasia karena o Agaba ki vora re na maneraha i Isiraele. Ngaia ki oga i Samaria ma ki marungia i Isiraele surirerua na harisi gi rua. 52Ngaia ki murisigea na Araha. Ngaia ki râ surigi na bagatauhata o Agaba o vaemana, ka Isebele kenana ma o Jerobeama na maneraha ga hagatasira na Isiraelita. 53Ngaia ki vogasia ma ki hagarapea o Bala tagenana manga o vaemana ma ki hagamangaria na Araha God iata na Isiraelita.
Currently Selected:
1 MAHERAHA 22: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific