2 MANERAHA 2
2
God ki torea vê o Elia tanga na matava
1I sugia ma na matena vi na Araha ki torea vê o Elia igê na maguara tanga i pasina. Matena o Elia ma o Elisa karu tavoraha tenia i Gilegale, 2o Elia ki vi tanga o Elisa, ki vi: “Hoi, gu oga so ikê. Na Araha ki bani bonasiê, hanana vigê arâ i Betele.”
O Elisa ki arami, ki vi: “Inê kê tohe renia na Araha mamauri ma renigo igo, gê toto surigamurua tare, vi inê ki asa be panigo.” Vikê ngairerua karu râ nga tanga i Betele.
3I Betele ki oga igê na hakuta na poropete. Ngaira ka râ tanga o Elisa ma ka hagatea, ka vi: “I hega, igo ko girara, vi na Araha ki page torea tenigo i ngekê o Elia, go hagêguria?”
O Elisa ki arami, ki vi: “Ua, inê kê bani girara. Siana ke tamasia.” 4Hemuri o Elia ki vi tanga o Elisa, ki vi: “Hoi, gu oga so ikê. Na Araha ki bani bonasiê, vigê arâ tanga i Jeriko.”
O Elisa ki arami, ki vi: “Inê kê tohe renia na Araha mamauri ma renigo igo gê toto surigamurua tare, vi inê ki asa be panigo.” Vikê ngairerua karu râ nga tanga i Jeriko.
5I Jeriko ki oga igê na hakuta na poropete. Ngaira ka râ tanga o Elisa ma ka hagatea, ka vi: “I hega, igo ko girara, vi na Araha ki page torea tenigo i ngekê o Elia, go hagêguria?”
O Elisa ki arami, ki vi: “Ua, inê kê bani girara. Siana ke tamasia.”
6Hemuri o Elia ki vi tanga o Elisa, ki vi: “Hoi, gu oga so ikê. Na Araha ki bani bonasiê, vigê arâ tanga na ve i Jotano.”
Ma o Elisa ki arami, ki vi: “Inê kê tohe renia na Araha mamauri ma renigo igo gê totosurigamurua tare, vi inê ki asa be panigo.” Vike ngairerua karu râ nga. 7Ma na poropete tangahuru gi rima ka râ surirerua tanga i Jotano. O Elia ma o Elisa karu ura so i ve ma na poropete tangahuru gi rima ka ura arege râ i muri. 8Hoi o Elia ki tasia râ na aruhana marena, ki rumia ma ki tahurungenia so i ve. Na ve ki mamata bê tarê i gupu, ma ngaia mo Elisa karu tarê mamata. 9I na apanena tarê o Elia ki vi tanga o Elisa, ki vi: “Visia me tangê, na ta kanigo obaniê vigê katoa tangago, ma ki kahu toreê vê na Araha?”
O Elisa ki arami, ki vi: “Gu haganahuniê renia na raramohamu i marisina na bêbê ni kare, hanana ve urusigo.
10O Elia ki arami, ki vi: “E, i kere bara nga, hanana vi ve vatego. Ma igo ko page nahunia hete, manga vigo bâsiê, matena na Araha ki page toreê vê panigo. Manga i mareha, ma nge asa vigu page nahunia nge.”
11Ngairerua karu ama ni tamasi gogogo nga karu arâ. Ka parama na hosi na gi, ga okea na kati na gi, ma ka tarame i berarogaterua ma na maguara ki torea vê o Elia tanga na matava. 12O Elisa ki bâsia ma ki ngiria o Elia, ki vi: “Vaemaku! Vaemaku Anumasiha ni Isiraele ramo teharira na mane ni me hato! Bani magahuru!” Ma ngaia ki hato, vige bâsia nikâ o Elia.
O Elisa ki rugu na obana ma ki tarisia na aruhana ki vora gi rua. 13Hemuri ngaia ki tavoa na aruhana o Elia, i hagavotaria so. Ngaia ki aporo râ i ve i Jotano ma ki ura i na akerena na ve. 14Ngaia ki tahurungenia so i ve na aruhana o Elia ma ki vi: “I he na Araha God iana o Elia?” Ma ngaia ki tahurua nikâ na ve, ma na ve ki mamata bê tarê i gupu ma ngaia ki tarê i tapanena. 15Na tangahuru gi rima na poropete i Jeriko ga bâsia, ka vi: “Na raramohana o Elia ki angaria o Elisa!” Ngaira ka râ vurusia ma ka tubê so tanga, 16ma ka vi: “Igami na tangahuru gi rima kani ikê. Igami hato kami ramo. Naka kami râ, kami garia o Elia na mane ni hagesuringa iamu. Vari na raramohana na Araha kani torea vê ma ki pania so i ta na hungana se i ta na maruguna.”
O Elisa ki arami, ki vi: “Mareha. Siana!”
17Ma ngaira ka togeaga mataro me ki hagamarumungenira ka râ. Hoi, ngaira na tangahuru gi rima ka râ ma ka garia o Elia surigi na tangiani gi oru igê na hungani ma igê na maruguni, ma ka pe tarahua. 18Hemuri ngaira ka aporo tanga o Elisa, i oga naasira i Jeriko. Ngaia ki vi tangara, ki vi: “Mu pe bani girara, vigê bani vi pusigamu?”
Na mena gi rua iana o Elisa
19Tani na mane tenia i Jeriko ka râ me i pasina o Elisa ma ka vi: “Poropete, igo ko bani girara, vi na hinua ikê ki hagagara koro, ma na ve igê kani pe koro, suria i katora na gete ka hagasiri kare.”
20Ngaia ki bonasira, ki vi: “Mu naka na solo igê na apira haoru ma kamu merâ me tangê.” Ngaira ka torea tanga. 21Ngaia ki râ tanga na ve banga ma ki kasia na solo igê ma ki vi: “Na Araha ki tamasi vikê, ‘Inê kê hagakoroa na ve ikê, hanana i hato vige hagamesira nikâ na enoni, se vige katoa na hagasiriha ni kare.’” 22Haganega tenia i ngekana na ve ngekana ki kahu koro tare vê, manga i bani visia o Elisa.
23O Elisa ki pania i Jeriko ma ki râ tanga i Betele. Matena i arâ vê, tani na kere mane ka râ me tenia ta na hinua ma ka memarabe i tara. Ngaira ka ngiria ka vi: “Râ tenia ikê! Age! Bêhare! Bêhare!”
24O Elisa ki aharo bê aporo, ki bârapurapu renira ma ki arangenira tanga na Araha. Hoi, na marâ raha vasiga hehene gi rua karu vaga me tenia na bemu ma karu ngasihunira na kere mane tangahuru ge he matare rua.
25O Elisa ki râ nga tanga na hungana i Karamele ma hemuri ki aporo tanga i Samaria.
Currently Selected:
2 MANERAHA 2: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific