1 TESALONIKA 3
3
1I rârâ, ma ki bara bâraha tangagami, suria mi pe bâsigamu. Tahema igami kami takusia, vi igamirua kamuru gâga so ma i Atene, 2matena muru hagatorangenia vê o Timoti tangagamu. Ngaia ki no goaka igê na tongesuriha, i tagara henigamirua tanga God igê na ateateha suria na Taroha Koro renia o Kirisito. Igamirua kamuru hagatorangenia, hanana i hagaramonigamu, ma ki kanukanugamu, kamu nganganihaga igê na tongesuriha iami, 3hanana vi siana na hitangimi ki kasia râ na tongesuriha, renia na enoni ka merongasigamu. Igamu kamu bani girara bâkoro, vi God ki hagamarumungenigi na mamasiaganiha ngegê, ka tarahugia. 4Renia na matena mi gâga henigamu mênga, igami kami bani hagahinarugamu, vi hanana na enoni ka page merongasigia. Ma igamu kamu bani girara bâkoro nga vikana. 5Tahema inê kê hagatorangenia o Timoti. Ma ki bara bâraha tangê, suria gê pe rongoa rârâ ta na marâ renigamu. Tahema gê hagatorangenia, hanana i tahetara maninga renia na tongesuriha iami. Suria inê kê bani anumanuma, renia Satana ki bani uhungigamu vari, megami kami bani tagara bâraha purua ma.
6Mo Timoti ki kahu aporo me tenigamu, ma ngaia ki torea me na tamasinga renia na tongesuriha iami, ma renia na hetakuiha iami. Megami kami vagevage renigi na rongoha ngegana. Ngaia ki hagarongogami, vi igamu kamu vagevage tare renigami, matena mu takusigami, ma kamu tangasia, vi gamu bâsigami, tagenana ma manga igami mi tangasia, vi gami bâsigamu. 7Vikana, goamami igê na tongesuriha, na taroha renigamu ki hagaramonigami tare, matena igami kami anumanuma, ma kami hatamia na mamasiaganiha. Na tongesuriha nga iami ki hagaramonigami. 8I ngekê igami kami nahunia na mêriha koro, suria igamu kamu gâga gatagata igê na tongesuriha, ma kamu obâbahaku henia na Araha. 9Renia i ngekê igami kami girara mi visia koro God renigamu. Igami kami visia koro, renia mi vagevage bâraha i maana God iaka renigamu. 10Igê na tangiani ma na bungiani igami kami nungia igê na mêrihamami hagenani, hanana vi ngaia ke hagamarumungenigami, kami bâsigamu, igami maremami, ma ke vategamu, ke raharaha nga na tongesuriha iami.
11Inê kê nungirerua God Vaemaka ma na Araha iaka o Jesu, karu tamanigami, hanana mi vatugigamu. 12Inê kê nungia na Araha, ke hagaraha na hetakuiha iami, kamu hetakuiheri, ma kamu takuira na enoni hato getera; ma ke tagenana manga na hetakuiha iamami i raha tangagamu. 13Igê na tarana ngekana ngaia ki page hagaramonigamu, ma igamu kamu page korokoro teha, ma kamu matarotaro i maana God Vaemaka, matena na Araha iaka o Jesu ki page arâ me henira ngaira hato, ga oga i pasina.
Currently Selected:
1 TESALONIKA 3: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific