1 TESALONIKA 2
2
Na tagaraha iana o Paulo i Tesalonika
1Goamami igê na tongesuriha, igamu maremi kamu bani girara, vi igami kami pe tagara purua ma, matena mi oga i pasimi. 2Mu girara, ga bani hagamamasiaga apemami, ma ka guharigami i Pilipi, ma hemuri kami râ me i pasimi i Tesalonika. Ma ki henaka na enoni rako ka urapusigami, ma God iaka ki hagaramonigami, hanana mi hagarongogamu renia na Taroha Koro, i râ me tenia God. 3Matena mi ateate tangagamu, igami kami pe hagaparu, ma kami pe nakanaka igê na ani getigi na marâ, ma nikâ gami pe uhungia, vi gami hagabekasia ta na enoni. 4Mareha vê! Igami kami visigi tare na marâ, God i obanigami, vi gami visigi, renia ngaia ki uhungigami i nago, ma hemuri ki kahu hagatoragami, kami ateate renia na Taroha Koro. Igami kami pe nakanaka bêmami tangara na enoni, ma kami hagakoro obana God hete, renia ngaia ki surigi na aitangihamami. 5Suria igamu kamu bani girara bâkoro, igami kami pe nakanaka bêmami tangagamu, matena mi oga i pasimi, ma nikâ igami kami pe tamasi tangagamu, hanana vi igami kami obania pinihi ta na marâ tenigamu tangagami maremami. God ki surigi na aitangihamami. 6Igami kami pe uhungia, vi gami hagarahasigami maremami tanga ta na enoni, se vi tangagamu, se vi tangara na enoni getera. 7Henaka i ararigami, vi gami nungigi ta na marâ tenigamu, suria vi igami ka na aposotolo iana o Kirisito, ma igami ki mareha. Igami kami koro tangagamu, ma kami komanigamu, matena mi oga i pasimi, manga na gete i hagasusura na karena, ma ki marupera na karena. 8Renia igami kami takuigamu bâraha, tahema igami kami agana, kami hagarongogamu renia na Taroha Koro iana God, ma nikâ mi agana, hanana mi meme renigamu. Igami kami takuigamu teha ve! 9Goamami igê na tongesuriha, igamu kamu bani girara bâkoro, vi manga i he igami kami hatamia bâraha na tagaraha! Igami kami tagara surigi na tangiani ma na bungiani, hanana siana kami pe hagamarâ apemi, matena mi ateate tangagamu renia na Taroha Koro, i arâ me tenia God. 10Igamu kamu bani girara, ma God nogana ki bani girara, vi na parongamami tangagamu na enoni, mu tongesuri, ki koro, ki oto, ma ki matarotaro. 11Igamu kamu bani girara, vi igami kami marupea na ara ni hitangimi, manga na mane i marupera na karena. 12Igami kami hagaramonigamu, ma kami hagagatagatanigamu, ma kami kanukanugamu, hanana mu mauri suria na obaniha iana God, i unigamu, vigamu bêbanu henira na enoni, ga rongoa na tamasinga iana ma kamu araha henia.
13Igami kami visia koro God renigi tani na marâ nikâ. Matena mi hagarongogamu renia na taroha iana God, igamu kamu rongoa, ma kamu tongesuria, suria igamu kamu tongesurigi na taroha ngegana, vi ngaigi ka na tamasinga iana God, mareha vi na tamasinga iata na enoni. Ma ki monari, ngaia ki na tamasinga iana God. Ma na tamasinga iana God ki tagara i pasimi, na enoni mu tongesuri. 14Goamami igê na tongesuriha, na tarani ga bani tarahura na kare igê na rotu iana God i Jutea, na kare igê na rotu i ngekana ga tongesuria o Kirisito Jesu, vi araha tangara, na tarani ngegana ka bani tarahugamu nogami. Na goami ka hagamamasiagagamu, tagenana mangara na Siu ga hagamamasiagara nogata. 15Na Siu ka nahuira na poropete, ma ka nahuia na Araha o Jesu, ma ka merongasigia. Ngaira ka hagamangaria ngavê God! Ngaira ka merongasira ngavê na enoni hato! 16Ma nikâ ngaira ka uhungia, vi ga hagabarasigami, siana kami ateate tangara na enoni, ga pe Siu, renia vi siana hanana na Taroha iana God kani vuripusira. Na tarana ngekê ki matakere tarani na ara ni tasi, ga tanugi tare. Ma i ngekê na mangariaganiha iana God ki bani tarahura nga.
O Paulo ki obania vi vatugira nikâ
17Goamami igê na tongesuriha, na ta renigami? I pe arihu râ na matena, mi bani panigamu igê. Igê na mêriha iamami igami kami takusigamu tare, ma ki mareha mi bâsigamu. Uê, mi panigamu ngavê, ma kami uhungia bâraha, vi gami bâsigamu nikâ! 18Igami kami obania, vi gami vatugigamu nikâ. Ma inê mareku, Paulo, kê uhungia, vi gê aporo tangagamu hagerua, se hageoru, ma Satana ki hagabarasigami. 19Igami kami obania, vi gami vatugigamu vê, suria igamu kamu hagaramonigami, ma kamu hagakoro obamami, ma kamu katogami, kami tanga pupu, renia i tavoraha na tagaraha iamami i maana na Araha iaka o Jesu, matena i page arâ me igê. 20I monari, igamu kamu katogami, kami ageage, ma kamu hagakoro obamami!
Currently Selected:
1 TESALONIKA 2: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific