1 MAHERAHA 21
21
Na mu ni vaini iana o Nabote
1Hagarangia na ruma raha iana na maneraha o Agaba i Jeserele ki oga igê na mu ni vaini iana o Nabote. 2Ta na tangiana o Agaba ki vi tanga o Nabote, ki vi: “Nakê be nahunia inê na mu ni vaini iamu, suria ngaia ki hagarangia na ruma raha iaku. Inê kê obania na mako ngekana, vigê hasihasi ruve igê. Inê kê page urusia tangago renia na mu ni vaini na ani i koro teharia. Ma ki manga go obania vigê vuria vê, inê kê page vuria bâkoro.”
3O Nabote ki arami, ki vi: “Inê kê nahunia na mu ni vaini ikê tenia o vaemaku. I asa be haganahunigo renia, i era ma na Araha ki hagaitangiê.”
4O Agaba ki aporo, ki obaera ma ki mangariaga renia na tamasinga iana o Nabote. Ngaia ki tâ so i bea iana, ki maatia na apê ma ki usi vige ngê. 5Ka Isebele kaniana ki râ tanga ma ki hagatea, ki vi: “Tanu hega kanigo obaera? Tanu hega kanigo pe ngê?”
6O Agaba ki arami, ki vi: “Suria na tamasinga iana o Nabote tangê. Inê kê visia tanga, vigê vuria na mu ni vaini iana, se manga vi ngaia ma ki obania vigê urusia tanga renia na ani getea. Ma ngaia ki manimania teniê.
7Ka Isebele ki arami, ki vi: “I hega, igo ka na maneraha? Gu aharaga. Gu obakoro ma ku ngê. Naka me tangê. Inê ma kanigê girara tangago, hanana go nahunia na mu ni waini iana o Nabote!”
8Hoi, ka Isebele ki segegi na leta, ki segegi so igê na atana o Agaba, ki puruigi so na girarana o Agaba igê na puru ma ki hagatorangenigi tangara na enoni raha ma ne meraha i Jeserele. 9Igê na leta ngaia ki vi: “Naka na tangiana ni hariharinga. Matena ga hakuhaku me hato na enoni, mu naka o Nabote ki gâga igê na atohana na enoni raha. 10Mu atea na vererua na mane na eragani nuni gi rua, hanana garu torahuria i maata na enoni, vi ngaia ki tamasi erasirerua God ma na maneraha. Hemuri kamu torea hura tenia na hinua ma kamu arihahunia ki meme.
11Na enoni raha ma na meraha i hinua ka tê viteana ka Isebele. 12Ngaira ka naka na tangiana ni hariharinga, ka unira haku na enoni ma ka naka o Nabote ki oga igê na atohana na enoni raha. 13Na mane na eragani nuni gi rua karu torahuria o Nabote i maata na enoni, vi ngaia ki tamasi erasirerua God ma na maneraha. Vikana ngaira ka torea hura tenia na hinua ma ka ariha hunia. 14Ngaira ka kasi tamasinga tanga ka Isebele, vi o Nabote ka bani arihahunia.
15Pusina ma ka Isebele ki rongo vikana, ngaia ki hagarongoa o Agaba, ki vi: “O Nabote ki me. Hoi, gu râ ku nahunia na mu ni vaini, o Nabote ki usi vige hagavuringenia tangago.” 16O Agaba ki hatani râ tanga na mu ni vaini, hanana i nahunia.
17Hoita, na Araha ki vi tanga o Elia na poropete ni Tisibe, ki vi: 18“Gu râ tanga o Agaba na maneraha i Samaria. Igo ko page tarahua vi i mu ni vaini iana o Nabote i vi, ngaia vi nahunia. 19Gu hagarongoa, vi inê na Araha kanigê vi tanga, kê vi: “Go nahuia ki meme na avanuna na mu ni vaini ma ko nahunia nikâ na mako iana? Igê nga na agua na o ka bani naminami igê na gapuna o Nabote, ka page namigi igê na gapumu igo nogamu!”
20Matena o Agaba ki bâsia o Elia, ngaia ki vi: “O, na merongaku ki tarahuê nikâ!”
O Elia ki arami, ki vi: “Mako! I rahasigo ma go katogi na tarani ga erataga i maana na Araha. 21Tahema na Araha ki tamasi vikê tangago, ki vi: ‘Inê be naka na bagabevoana ke tarahugo. Inê be hagamagahurugo ma be mutera na ara ni mane hato i ruma iamu, henaka na kere kare se na enoni raha. 22Na ruma iamu ki page maratorana na ruma iana na maneraha o Jerobeama karena o Nebata ma ki page maratorana nikâ na ruma iana na maneraha o Basa karena o Agia, suria igo ko hagamangariê, renia go hagatasira na Isiraelita.’ 23Ma tanga ka Isebele na Araha ki vi, vi na o ka page ngaua na gahuana hagarangia na para ni hinua i Jeserele.
24Na hitangita na ruma iamu, ga meme i hinua, na o ka page ngaura, ma na ani ga meme tarege râ tenia na hinua na ahetaronga ka page ngaura.”
25I mareha rârâ tani vige rahasia ge tanugi na tarani ga erataga i maana na Araha manga o Agaba, suria ka Isebele kaniana ki bugurenia tangagi. 26Ngaia ki bagatauhana ngavê, suria i hagarapera na ataro mangara na Amorita i nago, na Araha ki bani tarigenira hura tenia na agua, matena na Isiraelita ka oga parera.
27Matena o Elia ki tamasi hato, o Agaba ki tarisigi na gahu iana, ki tasigi râ ma ki hagesuru kakaga. Ngaia ki usi vige ngê, ki migimêru na gahu i kakaga ma ki obaera ma ki tangahuria.
28Na Araha ki tamasi tanga na poropete o Elia, ki vi: 29“Igo ko bani girara vari, vi i tanu hega o Agaba kani tangahuria i maaku? Suria i kato vikana, inê ki asa be naka na bagabevoana ke tarahua na ruma iana ma ke kahu meme, ma ki page tarahua hete igê na ogaha iana o karena.”
Currently Selected:
1 MAHERAHA 21: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific