Cantares 1
1
1Na ỹataqta 'onaxaic no'onecpi maye lo'onecpi so Salomón.
Da hua'autec no'onec
'Enapec aso 'alo:
2¡Sauotaique da aỹem 'anapigoxoi'!
Ỹataqta napacalec da lamaic na lataxa da 'arauotaxanaqtaic.
3Ỹataqta ama da laitaỹaxac na 'ancoraxat,
qataq da qanasaxauec da 'are'enaxat
nache 'eeta'am na coraxat da huaỹoxon na ama laitaỹaxac.
¡Ỹoqo'oye ỹataqta 'am nqopita na qa'ampiolec!
4¡Aỹem 'auauec! ¡Sa ñaỹaloxonaq qome!
¡'Am nta'a, ñaq aỹem 'auauegueua'a ca 'aro'ochaqa'!
'Enapec so laỹe 'alpi:
So'otaq ca qantonaxac da salegaqta'a't.
She'eguelaxasoxolec da seuennaqte
da 'arauotaxanaqtaic,
de'era 'arauotaxanaqtaic maye napacalec
da lamaic na lataxa.
¡Mañaxasaco' da ỹataqta 'am nqopita na qa'ampiolec!
'Enapec aso 'alo:
5Qami' 'alpi maye qarma'ai na Jerusalén,
aỹem lairaxaale qalaxaye aỹem 'onaxai,
da ỹaueraxa 'eeta'am da laueraxa na lpe'lpi na Quedar le'ecpi,
da iyacỹaxac qalaq 'eeta'am da lyacỹaxac
na lapoxonaxatpi so Salomón.
6Saishet qome da qaualleetagui da ỹaueraxa,
na'aictoxo' da ỹavigaxat na ỹo'oc añi nala'.
So ỹaqaỹañicpi aỹem dalemataỹa co'ollaxa
nache aỹem ỹamaxalec da selo'ogue so nañiguishe uva lma'pi,
¡qaq nache secoua'ai da selo'ogue ana maiche ỹañiguishe!
7Ñaq aỹem 'aua'aqtaxanem, 'am maye 'arauotaxat da ñachaalataxac,
¿chaq hua'ague naxa ca lquia'aqa' 'anqa'en na 'ana'atetpi?
¿Chaq hua'ague naxa ca nmataqa' 'anqa'en ye na'a'q laiñi?
¿Ta'ainco' da 'anshetaique da sheeta'am aca queuoxoi,
da salectaigui na na'atetpi na 'araỹepi?
'Enapec so laỹe 'alpi:
8Da huo'otaq sa 'auaỹaten de'era,
'am, maye ỹataqta 'anapacalec da lyacỹaxac na laỹepi 'alpi,
qaq 'am qome, no'on da qoquetegue na lapia' lliguiñi ana nlopi,
nache 'aulotague' ana 'arelo quetaqpiole
huaña ca naloteuga na lma'pi na laỹe qagueta lo'opi.
'Enapec so ỹale:
9'Am maye 'am ỹoqopitaqte,
ỹataqta 'am 'eeta'am ñaqa'en da lyacỹaxac aca nlo caaỹo
maye lauegaxalate aca laigona so faraón.
10¡Ỹataqta 'onaxail naua 'aramelque
da 'aỹa'aatrañi naua 'arshete!
¡Ỹataqta 'onaxaic na 'arqosot
da 'aỹa'aatañi ana 'arqolapi maye chegaqaigui na conec!
11¡Samaxasoxoolec qome da qaỹo'o't caua 'arshete oro,
maye qalapaxalec na lcat plata!
'Enapec aso 'alo:
12So nta'a da ñaq hua'aqtalec so la'axasoxola',
nache na ñecoraxat huaỹoxon da ama laitaỹaxac.
13So ỹauotaxat 'eeta'am ana laỹe' na ña'amnaxat mirra
da huetanguilo naua itetel.
14So ỹauotaxat 'eeta'am ñaqa'en ana lauoxo ana alheña
maye huauga ye lma' ana nañiguishe uvapi ye Engadí.
'Enapec so ỹale:
15¡Ỹataqta 'am 'onaxaale, 'am ỹoqopitaqte,
ỹataqta 'am 'onaxaale!
¡Naua 'ara'ai'tolqa ỹataqta 'onaxaiqa 'eeta'ama caua qoto'olqa!
'Enapec aso 'alo:
16¡Ỹataqta 'am 'onaxaicolec, 'am ỹauotaxat,
ỹataqta 'am 'onaxaicolec!
¡Na darala 'auaqpi nache qaracanec!
17Qaq ana qo'oipaq piinopi, nache l-llecnaxanaxatpi ca qarma',
qaq ana qo'oipaqpi ciprés, nache qarhuoyec.
Currently Selected:
Cantares 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.