Cantares 2
2
'Enapec aso 'alo
1Aỹem sheeta'am aca lauoxo maye hualec
ye nalochiguiñi 'alhua ye Sarón,
aỹem lauoxo maye huauga na no'onaxa ca'amapega't.
'Enapec so ỹale:
2Aso ỹoqopitaqte da ỹalectaigui na laỹepi 'alpi,
nache 'eeta'am ana lauoxo da ỹalectaigui ana huo'o ana lepi.
'Enapec aso 'alo:
3So ỹauotaxat da ỹalectaigui na laỹe ỹalleppi,
nache 'eeta'am ana qo'oipaq da huo'o ana ala
da ỹalectaigui ana laỹe huauec qo'oipaqpi.
Ỹataqta 'onaxaic ñaqa'en da ñeso'oto'ot na lpaqal,
qataq ỹataqta ñaman ana ala.
4So ỹauotaxat aỹem ỹauegueua'a so huaña da nquia'axac,
da aỹem ỹalleto'ot qalaq yo'oqta da lqopiche aỹem.
5¡Ñaq aỹem qaua'añaqchichi, aỹem qaỹa'añim qome ana deqaqta ala ana uvapi,
qataq aỹem qauquia'axañec ana manzana,
cha'aye huotaique selem da lamaic da ỹoqopitaxanaqtaic!
6¡Da iyoxo' da ña'axaatalec na lhuaq ne'emaq,
qaq na lhuaq aloic nache aỹem nsoxouo!
7Qami' 'alpi, maye qarma'ai na Jerusalén,
qami' ñachoxoreetoiguilo souaxat ana ñi'imshepi
qataq ana chegaxangopi maye huetauga na no'onaxa,
da saishet da sa qaualemaxache da do'ocheta aye ỹauotaqte.
¡Qauaqaita'a da do'ocheta
yaqto' maicheye da nlouec!
Da lỹa no'onec
'Enapec aso 'alo:
8¡Na ỹauotaxat mashe anacta!
Namaye anactalec ana qasoxonaxapi,
nparenaxaata'ague ana comarelecpi.
9Na ỹauotaxat 'eeta'am ana ñi'imshe,
qataq na chegaxango llalec.
¡'Ena mashe hueta'a na pa'aueegue da laỹe' na qarma'.
Nalletauoigui na nalloxoqui,
choche nalletapegueuo!
10So ỹauotaxat aỹem 'eetega, 'eeta':
«¡'Am ỹoqopitaqtole,
qoñisheguem, qolaq!
11¡Ña 'aumeten!
Mashe inoxoorec soua no'omaxaye,
nataqa'en soua auo'oche.
12Mashe nnoxoneuo na nauoxo,
mashe ivita ye laloqo' da no'onaxanaxac,
na coiguenec mashe qaỹa'axaỹa da nnoinaxac
na pa'aiguelo na 'alhua.
13Mashe ỹe ana ala ana higo,
qataq ana nañiguishe uva mashe huaỹoxon
da laitaỹaxac ana lauoxo.
¡'Am ỹoqopitaqtole,
qoñisheguem, qolaq!»
'Enapec so ỹale:
14«'Am ỹalamaqte qoto'ole,
¡saishet da 'anqañoxottaigui na qaỹoqotcheguemec 'anqañoxotaqa'!
Aỹem ñeshetaique da sela'a da 'arashiguiỹaxac,
sauotaique sa'axaỹa da 'arvilỹaxac.
¡Ỹataqta samachiguiñi da 'am ñauane'!
¡Ỹataqta huo'o da lamaic da sa'aqtega da 'arvilỹaxac!»
'Enapec aso 'alo:
15Ña qauacoñiiua'a ana huaxaỹaxapiole,
cha'aye huotaique nlaxaañi
ana qorañiguishi uvapi maye mashe dasovitac.
16So ỹauotaxat ỹataqta ỹalamaxat,
qataq somaye aỹem lalamaqte.
Da ilotague' ana lalo
nache nqopita da ỹalectaigui ana lauoxo ana huouepi.
17Da ñaq napaltañi qataq natomchiguiñi,
nache 'avi'eguelaq, 'am ỹauotaxat,
'auỹalapigui' qoneta'am ana ñi'imshe
qataq na chegaxango llalec
da quetalec ana qasoxonaxapi ye Beter.
Currently Selected:
Cantares 2: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.