Eclesiastés 12
12
1Qaq 'auennata'a Ñim 'am Lo'onatac nagui da ñaq 'am nsoqolec, qataq nagui da ñaq saxanaxa da nvildeuo caua na'axa'te maye huo'o da lqalai'c, qataq caua vi'iye maye huaiguilo qome da qonapec, «ỹataqta qaica ca ỹamaicỹaxac naua vi'iye maye sootaiguilo.»
2Qaq 'auo'ot nagui da ñaq saxanaxa da vi'iiguet na le'eraxa añi nala', ñi ca'agoxoic qataq ana huaqaañipi, qataq da ñaq huo'o na lo'oc na piguem da mashe ime ca auot. 3Cha'aye huo'o qome ca na'a'q da iviloxol cam nauaatalecpi ca nỹec lta'araic, qataq da nqollem nam 'añaxaicpi naxa da huo'o ye alaataxac, qataq saq 'amaqtaq aca no'onañi, anam iconnaxaatapigui ana namaicnaxanaqte coma', nache ỹaxaañi da lo'onataxanaxac, qataq anam ỹalletaviigui na nalloxoquipi deqat da lmeenaxanaxac. 4Qaq qom nvi' que'eca na'a'q, nache qaỹapogui na lasompi na nỹecpi maye dataỹauga na nqa'aicpi, qataq da l-lamaxa ana namaicnaxanaqte coma'pi qalaq nquictañi, qataq nam qoỹopi do'onaxaatac qome, qalaxaye sa qaỹa'axaỹa da lo'onaxanaxac; 5qataq nam qaỹoqotcheguemec 'alhuapi qañi'iỹa, qataq ca nqa'aic huo'o da lchec.
Ana almendro dasovi qome,
qaq acam shiiquioxoi ipataxañi qome,
qataq ana qo'oipaq alcaparra qaica ca naigui qome.
Cha'aye cam shiỹaxaua taỹa'a cam lma' maye chochaq tatec,
qaq hueta'a qome ca nqa'aic da lapootega't
cam nỹeelec da l-leuaxa camaye.
6'Auennata'a Ñim 'am lo'onatac, nagui da ñaq saxanaxa da dachepi ca npaqtac lcat plata, qataq aca taxaqui maye chegaqaigui na oro, qataq da ñaq saxanaxa da dolagui aca naco'oña 'alhua maye netaua'a na laỹe aca 'etaxat laỹe', qataq saxanaxa da dolagui acam nauegaxanaxaqui da qanqatsheguem na 'etaxat maye naña aca nshere. 7Cha'aye qom ime de'era, nache nam lsoche na 'alhua, ỹe'eguelaxaigui ana 'alhua, 'eeta'am da 'eetec co'ollaxa, qaq som saqcha'a nca'alaxa ỹe'egueloqot Ñim Lo'onatac 'Enauacna, maye ỹan co'ollaxa.
8Qaq aỹem maye aỹem 'aqtaxanaxaic, she'eguelaxalec da shenapec: ¡ỹataqta qaica ca naigui, qaica ca naigui! ¡'Enauac nam huo'o ỹataqta qaica ca naigui!
Dam iuen da ỹo'ot cam shiỹaxaua
9Qaq co'ollaq mashe ỹaguec na laỹaanec so 'aqtaxanaxaic, nache nquictec nam naỹaanec maye ỹapaxaguenec nam shiỹaxauapi. Qaq nataqa'en nañaneguet da ỹacoolec da napaxaguena nam qalota ntaxaỹaxacpi, qataq da ỹaỹamaxatchiguiñi da iỹottecache. 10Se'eso 'aqtaxanaxaic ỹataqta npogoxoinapegue' da ỹanatalo naua na'aqtaqa maye ỹataqta qaỹamaategueta, qataq ỹaỹamaxatchiyiñi da ỹilyiñi naua na'aqtaqa maye ỹataqta 'eesora. 11Naua la'aqtaqa nam ỹaanaxanaxaicpi qalaq 'eeta'am aca le aca na'araxanaqte, qaq da mashe ime da qalaỹona't, nache 'eeta'am aca lashe ca npe'l maye iuaxaañi cam qagueta lo'o.
12Qaq nagui 'am ỹalcolec, 'auasateguet qome ca nvitaqtaxanaxac. Cha'aye da qaỹo'ot aca qalota nerepi qalaq qaica ca loga't, qataq da qalota da paxaguenaxac nache damaye ỹo'ot da nasamaxa. 13Qaq dam loga't 'enauac de'era na'aqtaxanaxac maye 'aua'aqchigui damaye, 'eeta': Huo'o naq 'enec 'anqa'en Ñim Lo'onatac 'Enauacna, qataq 'aupacteleguete naua lamaxasoxonaxaco, cha'aye nacherata maye iuen da ỹo'ot cam shiỹaxaua. 14Cha'aye Ñim Lo'onatac 'Enauacna nmit qome 'enauac nam no'onatacpi, nam 'onaxaic qataq nam qauem, qataq ivira'a cam qoỹoxottañi da qaỹo'ot.
Currently Selected:
Eclesiastés 12: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.