1 Reyes 1
1
Da lqueroxo so David
1Qaq so nta'a David co'ollaq mashe ivita da lqueroxo, qataq mashe qaỹoqteguelo naua vi'iye da nachaalataxac, nache qalapootalec naxa na lapo', qalaxaye saishet da qaỹañoxot da dapaqa qanqa'en na lo'oc. 2Ỹoqo'oye so lamaxashecpi somaye, 'enapeco': «'Onaxaictaxa da qanmichiỹaique aca 'oonole qa'añole maye ñaq lamaxai, da yaqto' huapegue', qataq ntela'a qataq lauañi' qanqa'en na nta'a yaqto' napaqhuec naqa'en na lo'oc.»
3Huaña nache qanayeguelec 'enauac ye 'alhua Israel da qanmitaique aca ỹataqta 'onaxai qa'añole, nache qailalec co'ollaxa aso Abisag maye Sunén lashe, nache qaỹauegueua'a so nta'a. 4Qaq asa'aso qa'añole ỹataqta 'onaxai, qaq asomaye nachaso aso ilotague', qataq huetague' so nta'a, qalaxaye so nta'a saishet da ivira da hue'eguet co'ollaxa asomaye.
So Adonías huotaique da nta'a
5Qaq so Adonías maye llalec so David, qataq aso Jaguit, somaye nachaañi co'ollaxa, cha'aye huotaique da nta'a. Nache ỹauo'o aso nalaataxaquipi laigonapi, qataq so nalleppi da yaqto' nelec so caipi, qataq so cincuenta nalleppi da yaqto' nauaatalec somaye. 6Qaq se'eso Adonías, somaye lqaỹa na'asa so Absalón, qaq somaye da lyacỹaxac ỹataqta 'onaxaic. Qaq so David, saishet da huo'o ca na'a'q da nqanaxattac, qataq da ichemaxattac na ỹo'ottacpi somaye. 7Qaq somaye naỹamaxate' co'ollaxa so Joab, som llalec aso Seruyá, qataq so ntaxaỹaxanaxanec Abiatar, nache soomaye ỹasa't co'ollaxa da itaua'n somaye. 8Qalaxaye so ntaxaỹaxanaxanec Sadoc, qataq so Benaías, maye llalec so Joyadá, ivira'a so na'aqtaxanaxanec Natán, qataq so Simea, maye ỹataqta lpe'et so nta'a, qataq som ỹataqta 'amaqtaqaicpi nalleppi so David, saishet co'ollaxa da ca'ategue da itauan so Adonías. 9Qaq huo'o so na'a'q, nache so Adonías ỹo'ot so lquia'axac, huaña ye saqaỹapeque añi coma' le'enaxat Zojélet, maye naña ye saqaỹapeque ye huaña na npaxaatasheguem 'etaxat ye Roguel. Nache ỹalauat so qaguetapi, huacapi, qataq so ỹataqta chaxaraicpi huaca llalaqpi. Nache icoyeguen so lqaỹañecpi maye llalaqpi so nta'a David, qataq so Judá le'ecpi maye ltauapi so nta'a. 10Qalaxaye saishet da icoyeguen so na'aqtaxanaxanec Natán, qataq so Benaías qataq som 'amaqtaqaic nalleppi so David, qataq so lqaỹa Salomón. 11Ỹoqo'oye so Natán inat co'ollaxa aso Betsabé, asom late'e so Salomón, 'eeta': «¿Peta'a 'auaỹaten da so Adonías, maye llalec aso Jaguit, da somaye 'eetega nacheso so nta'a? Qaq de'era saishet da ỹaỹaten ñi qarataxala' David. 12Qaq da 'anshetaique da 'anca'alec, qataq so 'aỹa'alec Salomón, nache 'ana'axaỹaxana da iqataxac, 13'am, qojec nagui, 'anachaateua'a ñi nta'a David, nache qoneta': ‹'Am nta'a, aỹem 'aỹa'anem co'ollaxa so 'ara'aqtac, da qonetega 'aỹa'anagui da 'aro'onataxanaxac da nta'a so ỹalec Salomón, da ime da 'aro'onataxanaxac. Qaq nagui ¿ta'ainco' ye mashe nta'a so Adonías?› 14Qaq qom ñaq 'ana'aqtaxaatague' ñi nta'a, nache sepa'auo qome da yaqto' sa'axat da ỹataqta 'eesa da 'aua'axattac.» 15Nache aso Betsabé jec, da nqo'oneua'a co'ollaxa so lo'ochaqa' so nta'a David. Qaq so nta'a ye mashe ỹataqta ỹa'axaiquiolec, nache aso Abisag, maye Sunén lashe nache ilotague' somaye. 16Nache aso Betsabé co'ollaq ivireua'a so nta'a, nache ỹa'alyiñi naua l-llecte, nache ivira'aguet naqa'en na latap na 'alhua, nache so nta'a inat asomaye, 'eeta':
¿Negue't ca qonetapeguec? 17Nache asomaye 'enapeco':
'Am nta'a, mashe aỹem 'aỹa'anem co'ollaxa so 'ara'aqtac, hua'aqchigui 'anqa'en Ñim Nataxala' maye 'Anatamnaxala', da so ỹalec Salomón talec 'anqa'en qome da 'aro'onataxanaxac da nta'a. 18Qaq nagui, so Adonías mashe na'axatteguela't da nta'a, qalaxaye 'am nta'a saxanaxa da 'auaỹaten. 19Qaq somaye ỹalauat so toropi, qataq huaca llalaqpi, qataq aso qalota qaguetapi, nache icoyeguen so 'aỹa'alaqpi, qataq so ntaxaỹaxanaxanec Abiatar, qataq so Joab maye lataxala' na alleppi, qalaxaye saishet da icoyeguen so 'aramaxashec Salomón. 20Qaq nagui, 'am nta'a maye 'am ỹataxala', 'enauac na Israel le'ecpi iuatta'a ca 'ara'aqtac, da chaq negue't qome ca 'anmeneguet da talec 'anqa'en da 'aro'onataxanaxac. 21Cha'aye qom ivita da 'aleu, da qaica ca 'aỹa'anagui da nta'a, nache so ỹalec Salomón qataq aỹem, qomi' qaỹalaua't qome. 22Qaq co'ollaq ñaq na'aqtaxaatague' so nta'a aso Betsabé, nache ivireuo so na'aqtaxanaxanec Natán, 23nache qaicoyeguen so nta'a, qoỹeeta': «Mashe hueta'a ne'ena da na'aqtaxanaxanec Natán.» Nache somaye co'ollaq ivireua'a so nta'a, nache ỹa'alyiñi naua l-llecte, ivira'aguet naqa'en na latap na 'alhua. 24Nache inat so nta'a, 'eeta':
«'Am nta'a, ¿peta'a maiche 'ara'aqtac da so Adonías, nacheso so talec 'anqa'en da 'aro'onataxanaxac? 25Cha'aye quiye, somaye ỹalauat so toropi, huaca llalaqpi qataq aso qalota qaguetapi, nache ỹo'ottac so lquia'axac, qataq icoyeguen so 'aỹa'alaqpi qataq so lataxala'pi na alleppi, qataq so ntaxaỹaxanaxanec Abiatar. Qaq nache lquia'axauapi nagui, qataq nỹomtague' yemayepi, nache ỹa'alaqtai', 'eeta': ‹¡Nache 'eetai' qome da nta'a da Adonías!› 26Qalaxaye aỹem, maye aỹem 'aramaxashec, saishet da aỹem icoyeguen, qataq so ntaxaỹaxanaxanec Sadoc, qataq so Benaías maye llalec so Joyadá, qataq so Salomón maye maiche 'aỹa'alec. 27Qaq 'am nta'a, ¿peta'a maiche 'aramaxasoxonaxac de'era, da saishet da 'aua'aqtaxanem nam 'aramaxashecpi, da chaq negue't cam talec 'anqa'en da 'aro'onataxanaxac?»
So David ỹa'axat da so Salomón nacheso so nta'a
28Nache so nta'a David, damaxasoxoneuga da qaiỹaxaneuga aso Betsabé. Nache aso Betsabé co'ollaq ivireua'a so nta'a, nache asomaye nachattañi datato'ot somaye. 29Huaña, nache so nta'a ỹan da la'aqtac, 'eeta': «San da ỹa'aqtac hua'aqchigui ñaqa'en Ñim Nataxala', maye aỹem nca'alaxateeguesop co'ollaxa 'enauac na ñeque'eenaxacpi, 30da se'eso ỹa'aqtac maye 'am sanem co'ollaxa, hua'aqchigui ñaqa'en Ñim Nataxala' maye Natamnaxala' na Israel le'ecpi, aỹem sepacchigui da so'ot: Qaq so 'aỹa'alec Salomón, nacheso so talec nagui da ỹo'onataxanaxac.» 31Qaq huaña nache aso Betsabé, ỹa'alyiñi naua l-llecte nache ivira'aguet naqa'en na latap na 'alhua, nache na'axannec so la'aqtac, 'eeta': «¡'Am nta'a David maye 'am ỹataxala', nache 'eetai' qome da 'anca'altauec!» 32Ime, nache so nta'a David, damaxasoxon da qaiỹaxaneuga so ntaxaỹaxanaxanec Sadoc, qataq so na'aqtaxanaxanec Natán, qataq so Benaías maye llalec so Joyadá. Nache soomaye co'ollaq ivildeua'a so nta'a, 33nache somaye 'enapeco': «Qannaicỹapegue' qome na nta'alpi maye itauapi, nache so ỹalec Salomón, nelec qanqa'eñi ñi ilo mola, nache qauaviquiỹa ye Guijón, 34da yaqto' da ntaxaỹaxanaxanec Sadoc, qataq da na'aqtaxanaxanec Natán, icorelec qome somaye da yaqto' nta'a, da ilo'ogue na Israel le'ecpi, qataq qaỹashiiyigui qome aca nasheerepi peenaq lcouepi. Huaña, nache qaua'alqai, qoñeeta': ‹¡Nache 'eetai' qome da nta'a da Salomón!› 35Qaq da ime, nache qannaicỹapegue' somaye da qañe'eguelaqai da yaqto' nso'ongui añi ñeso'onaxaqui da talec da ỹo'onataxanaxac, cha'aye nacheso so lleca'aua'a da ilo'ogue ñaqa'en na Israel le'ecpi qataq na Judá le'ecpi.» 36Nache so Benaías maye llalec so Joyadá, 'enapeco': ¡Aja', nache 'eetec, qaq nachera da 'eetec qome Ñim Nataxala' maye 'Anatamnaxala', 'am nta'a! 37Qaq da 'eetec Ñim Lo'onatac 'Enauacna, co'ollaq 'am hueta'aguet 'am nta'a, qaq nachera da 'eetec qome da hueta'aguet so Salomón, qataq que'eca lo'onataxanaxac da nta'a somaye, napactelec qome da 'eetec da 'aro'onataxanaxac, 'am ỹataxala' David. 38Ime, nache so ntaxaỹaxanaxanec Sadoc, qataq so na'aqtaxanaxanec Natán, qataq so Benaías maye llalec so Joyadá, qataq so quereteopi qataq so peleteopi, somayepi jec co'ollaxa. Nache so Salomón qoỹanaxanaxaalec so mola maye lalo so nta'a David, nache qaỹauega ye Guijón. 39Qaq nache huaña yemaye da so ntaxaỹaxanaxanec Sadoc, ỹacona aso laỹe' so aceite, ỹachegoxottoigui so npe'l, nache icorelec so Salomón da yaqto' nta'a. Huaña, nache qaỹashiiyigui aso nasheerepi peenaq lcouepi, nache qaỹa'alaxalec qoỹeeta':
«¡Nache 'eetai' qome da nta'a da Salomón!» 40Qaq ime, nache 'enauac somayepi, ca'atteueegue so Salomón, do'onaxaata'ai' aso lasheerepi cha'aye ỹataqta lta'araic da ntonaxac, nache ana 'alhua cholaxan souaxat da la'alaxac somayepi. 41Qaq so Adonías qataq so lquia'axauapi, co'ollaq mashe imat da lquia'axac, nache hua'axaỹa da nllimiaxa. Qaq nataqa'en so Joab co'ollaq hua'axaỹa da l-lamaxa aso nasheerepi peenaq lcouepi, nache 'enapeco':
¿Chaq ta'ainco' da ỹataqta lta'araic da nllimiaxa yi'iye huaqta'a't nỹecpi? 42Qaq co'ollaq ñaq detaqtac somaye nache nvireuo so Jonatán, som llalec so ntaxaỹaxanaxanec Abiatar. Nache so Adonías 'enapeco':
¡Ña 'ampa'auo, cha'aye 'am 'amaqtaqaic nache yo'oqta da 'onaxaic ca 'andouo qara'axaỹaxac! 43Nache so Jonatán, 'enapeco':
'A'i, saishet, cha'aye so qarataxala', nta'a David, ỹanagui da nta'a so Salomón, 44qataq nataqa'en ỹamaq so ntaxaỹaxanaxanec Sadoc, qataq so na'aqtaxanaxanec Natán, qataq so Benaías, som llalec so Joyadá, qataq so quereteopi qataq so peleteopi da nnaicapegue' so Salomón, nache somayepi ỹanaxanaxaalec so Salomón, so mola maye lalo so nta'a David. 45Nache so ntaxaỹaxanaxanec Sadoc, qataq so na'aqtaxanaxanec Natán, huaña naqa'en ye Guijón da icorelec na lqaic so Salomón, da yaqto' qoỹanagui da nta'a. Qaq namayepi nache chegoqchiguiña yemaye da ñe'eguelaq, qaq ỹataqta machiguiñi, ỹoqo'oye huo'o da nllimiaxa yi'iye huaqta'a't nỹecpi, souaxat da ntonaxac namayepi. 46Qaq nataqa'en so Salomón, mashe nso'ongui añi so'onaxaqui, da do'onataxan da nta'a. 47Qataq so nta'alpi maye ltauapi so nta'a David, taua'a somaye da iquin, qataq da dashelaxaalec so Salomón da Ñim Lo'onatac 'Enauacna, ỹataqta nquigaxatec qome da lo'onataxanaxac somaye, da napacalec naqa'en da lo'onataxanaxac ñi David. Qaq ỹoqo'oye ñi David, nache netalec ye lmala' da ỹo'oxoren Ñim Lo'onatac 'Enauacna. 48Nache 'eeta': «Ỹataqta sho'oxoren Ñim Nataxala' maye Natamnaxala' na Israel le'ecpi, cha'aye Ñimaye, sauaachigui naqa'en so 'oonolec nam ỹalaqpi da talec da ỹo'onataxanaxac da nta'a.» 49Qaq so lquia'axauapi so Adonías co'ollaq hua'axaỹa de'era, nache ỹataqta ñi'i, nache 'enauac somayepi ñisheguem nache nlagaxatapec da jec. 50Qaq so Adonías ye ỹataqta ñi'iỹa so Salomón, nache ỹe'egueneua'a so npe'l, huaña nache nasoqchiyiñi soua lcoue aso nca'atoxonaxalate. 51Qaq huo'o so nqo'oneua'a da da'aqtaxanem so Salomón, 'eeta':
'Am nta'a, so Adonías ỹataqta 'am ñi'iỹa, ỹoqo'oye ỹe'egueneua'a añi nca'atoxonaxalate. Nache 'enapec: Ne'ena na'a'q, sauotaique da ca nta'a Salomón ỹan ca la'aqtac da saishet da ỹalauat ne'ena lamaxashec. 52Nache so Salomón 'enapeco':
Camaye da qaica ca ỹasouaxat, nache camaye saishet da deqat ca 'oonolec laue, qalaxaye da qailalec ca ỹo'ot qauem, nache camaye qaỹalauat qome. 53Ime, nache so nta'a Salomón saỹaỹaloxon da damaxasoxona somaye, da yaqto' qanqateeguesop aso nca'atoxonaxalate nache qanauegueuo. Qaq so Adonías co'ollaq ivireua'a so nta'a, nache nqollemñi, nache so Salomón, 'eeta':
«'Am, qoqueuo qome, 'anqo'ona ca 'arma'.»
Currently Selected:
1 Reyes 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.