1 Reyes 2
2
So pa'atec lqataxacpi so David
1Qaq so David co'ollaq mashe nayeetega da l-leuaxa, nache ỹanem so lqataxacpi so llalec Salomón, 'eeta': 2«Aỹem, mashe yaqta'a da seleu, da sheeta'am 'enauac so shiỹaxauapi maye ca'ai ana 'alhua. Ỹoqo'oye nacherata da 'ana'añaxat qome, qataq 'auacono' da lataxac ca ỹale. 3Ñaq 'aualaxagueto' qome naua lamaxasoxonaxaco Ñim Nataxala' maye 'Anatamnaxala', qataq 'auo'ot nam 'eetapeguecpi Ñimaye, qataq 'aupacchiguilo naua lqataxaco, lamaxasoxonaxaco, qataq naua lapaxayiñi lataxaco maye ỹelyiñi co'ollaxa so Moisés. Yaqto' maicheye cam qoueta'ague, qalaq nquictasheguem qome da ỹaỹamaqchiguiñi 'enauac nam 'auacoolec da 'auo'ot. 4Qataq yaqto' ipacchigui qome da la'aqtac Ñim Nataxala', maye aỹem ỹachaxanapecot co'ollaq, 'eeta':
‹Da ỹataqta ỹo'ot da no'on na 'aỹa'alaqpi, qataq sauaachigui da quegue da ỹaỹamaqchiguiñi lataxac, qataq da ỹataqta lquiyaqteỹaxac, lhuennataxa da ỹalaq, nache saishet da saqca ñaqa'en ca 'oonolec na 'aỹa'alaqpi da talec da 'aro'onataxanaxac da nta'a, da ilo'ogue na Israel le'ecpi.› 5Qaq nagui, 'am mashe 'auaỹaten da aỹem ỹo'otec co'ollaxa so Joab, som llalec aso Seruyá, dam ỹo'otec co'ollaxa soua dos lta'al so nalleppi na Israel le'ecpi: Som Abner maye llalec so Ner, qataq so Amasa maye llalec so Jéter, da huaigui naqa'en da nlagaxayec da ỹalaua't, souaxat da ipaltaique lvi' som qaỹalauat co'ollaxa maye huaigui som alaataxac, nache aỹem nmaxalec da ỹasouaxashet dam ỹo'ot somaye. 6Ỹoqo'oye 'am seqata da 'anaỹaanaxanaqchen qome, qalaxaye saishet qome da 'aviraxata'a da ỹe, qataq da huo'o da l-lagaxayec qom ileu. 7Qalaxaye na llalaqpi so Barzilay, maye Galaad le'ec, ỹataqta 'auchoxoren qome, qataq da 'auque'e nache 'arquia'axauapi, cha'aye aỹem npaxaalec co'ollaq ñaneltaxaatapeeguet so 'arqaỹa Absalón. 8Qaq nataqa'en ñaq huo'o ñi Simea, ñim llalec so Gera, maye chegoxoguet so Benjamín, maye lma' ye Bajurín, maye aỹem ỹasaxalec so ỹataqta qauem la'aqtac, som na'a'q co'ollaq saỹa'a ye Majanayin. Qalaxaye co'ollaq ñe'eguelaq nache naxaama so tala Jordán da aỹem hueqata'aguet, nache aỹem sanot so ỹa'aqtac Ñim Nataxala' da saishet da salauat. 9Qalaxaye 'am, saishet qome da 'auchoxoreetac. Cha'aye 'am ỹaanaxanaxaic, nache maiche 'auaỹaten cam qoneta'ac qome, qaq na'aictaxa da mashe ỹa'axaiquiolec, qalaxaye saishet qome da 'auchoxonai' da 'aualauat.»
Da l-leuaxa so David
10Qaq ime, nache ileu so David, nache qailareñi huaqta'ai' qanqa'en so lta'alpi, maye huetaigui so huaqta'a't nỹecpi, maye lalamaxat somaye. 11Qaq somaye ivi' siete vi'iye da ilotague' co'ollaxa so netaña ye Hebrón, qataq treinta y tres vi'iye da ilotague' so netaña ye Jerusalén. Qaq da ima'a't, nache ivi' cuarenta vi'iye da lta'a na Israel le'ecpi. 12Ime, nache da lo'onataxanaxac so nta'a David, talec so llalec Salomón. Qaq de'era lo'onataxanaxac somaye da nta'a ỹataqta sa deraỹai'.
Da l-leuaxa so Adonías
13Qaq so Adonías maye llalec aso Jaguit, taua'a co'ollaxa aso Betsabé, asom late'e so Salomón. Nache aso Betsabé inat somaye, 'eeta':
¿Peta'a qaica cara de'era 'arviraxac? Nache somaye, 'enapeco':
Aja', 14qalaxaye huo'o da huotaique 'am sa'aqtaxanem. Nache asomaye, 'enapeco':
Ñaq aỹem 'aua'aqtaxanem. 15Nache so Adonías 'enapeco':
'Am 'auaỹaten de'era no'onataxanaxac da nta'a, aỹem talec taxa, qataq 'enauac na Israel le'ecpi mashe aỹem iuatta'a da nache aỹem taxa da aỹem nta'a. Qalaxaye de'era no'onataxanaxac talec so iqaỹa, cha'aye Ñim Nataxala' mashe nache 'eetai' da ỹanem somaye. 16Qalaxaye nagui aỹem, 'am seỹaxanot. Qalaq 'onaxaic da saishet da aỹem sa 'auasateguet. Nache asomaye, 'enapeco':
Ña 'aua'axat cam qonetapeguec. 17Nache somaye, 'enapeco':
'Am ñachoxonnot da 'auỹaxanot so nta'a Salomón, da aỹem ỹanem aso Abisag, maye Sunén lashe, da yaqto' sauo'o ihua. Cha'aye somaye saishet da sa ỹo'ot cam 'auỹaxanaique. 18Nache aso Betsabé, 'enapeco':
Aja', ñeqo'oneua'a qome ñi nta'a da yaqto' 'am setaqlec. 19Qaq ime, nache aso Betsabé taua'a so nta'a Salomón, da detaqlec so Adonías. Nache se'eso nta'a ñisheguem co'ollaxa da ilo'oguet aso late'e, qataq nqollemñi da iquin asomaye. Ime, qaltaq nso'ooñi, nache damaxasoxon da qairouo aso nso'onaxaqui aso late'e, nache asomaye nso'oochiguiña na pa'aigue da aloic so nta'a. 20Nache asomaye, 'enapeco':
Sauotaique da 'am seỹaxanot, qaq saq 'amaqtaq da huotaique da seỹaxaneua'a. Nache so nta'a, 'enapeco':
'Am ỹate'e, maicheye cam 'auỹaxanaique, cha'aye aỹem saishet da 'am saq sashenem ca 'auỹaxanaique. 21Nache asomaye, 'enapeco':
'Auasheeta ctaxa aso Abisag maye Sunén lashe, da qoỹanem da lhua so 'arqaỹa Adonías. 22Nache so nta'a Salomón 'enapego' aso late'e, 'eeta':
¿Ta'ainco' da 'auquictegueua'a aso Abisag, maye Sunén lashe da yaqto' lhua so Adonías? ¡Qaico' da 'auquiguiỹaua'a nataqa'en da sanem da no'onataxanaxac da nta'a, cha'aye nacheso so iqaỹa maye ỹe, qataq itauaatrac somaye so ntaxaỹaxanaxanec Abiatar, qataq so Joab, maye llalec aso Seruyá! 23Huaña, nache so nta'a Salomón ỹanot da la'aqtac Ñim Nataxala', 'eeta':
«¡Ñim Lo'onatac 'Enauacna, ỹataqta sa ỹala'ac qome da ỹauo'o ca ñeuaxanaguec, qom saishet da ileu ñaqa'en so Adonías, souaxat de'era lquiquiaxac 24Qaq nache huetoigui ne'ena na'a'q da ileu so Adonías, cha'aye ỹataqta nca'altauec Ñim Nataxala', maye aỹem talec naqa'en da lo'onataxanaxac so ita'a David, qaq nache ipacchigui qome dam ỹan la'aqtac Ñimaye, da nataqa'en ỹanem qome de'era no'onataxanaxac cam ỹalaqpi!» 25Qaq nache sa ỹaỹaloxon da ỹamaq so Benaías, som llalec so Joyadá, da yaqto' ỹalauat so Adonías, nache somaye nqo'ona so Adonías, nache ỹalauat. 26Nache so nta'a Salomón, 'enapega so ntaxaỹaxanaxanec Abiatar, 'eeta':
«'Aue, qojec, 'anqo'ona ye Anatot, 'avi'eguelaxa ye 'ana'alhua. Cha'aye 'am, iuen taxa da 'am qaỹalauat, qalaxaye nagui saishet da 'am salauat, cha'aye nache 'am co'ollaxa da 'auachetac naxa añi arca maye laỹe' da naỹamaxataxac Ñim Nataxala', ỹauaachigui so ita'a David, qataq nataqa'en 'anhuanaua'a 'enauac na nque'eenaxacpi somaye.» 27Qaq 'era da 'eetec so Salomón da nqateeguesop da lo'onataxanaxac da ltaxaỹaxanaxanec Ñim Nataxala' so Abiatar, huaña nache ipacchigui da la'aqtac Ñim Nataxala' co'ollaq huaña ye Silo, da saishet da queto'ot da ntaxaỹaxanaxanecpi na llalaqpi so Elí. 28Qaq so Joab, som itauan co'ollaxa so Adonías, qalaxaye saishet da nache 'eetec da itauan so Absalón, somaye co'ollaq la'axaỹaxac de'era, nache datauec ỹe'egueneua'a so npe'l maye lanataqa' Ñim Nataxala', nache nasoqchiyiñi soua lcoue aso nca'atoxonaxalate. 29Qaq co'ollaq qaỹa'aqtaxanem so nta'a Salomón, da so Joab ỹe'eguenoigui so npe'l maye lanataqa' Ñim Nataxala', da nqañoxotot aso nca'atoxonaxalate. Nache so Salomón, ỹamaq co'ollaxa so Benaías, maye llalec so Joyadá, da yaqto' ỹalauat somaye. 30Nache so Benaías taua'a so npe'l, maye lanataqa' Ñim Nataxala', nache 'enapega so Joab, 'eeta':
Ñi nta'a, 'am 'enapega da 'ampa'auec. Qalaxaye so Joab 'enapeco':
¡Saishet! ¡No'on da nache huaña ne'ena da seleu! Nache so Benaías taua'a so nta'a da da'aqtaxanem de'era la'aqtac so Joab. 31Nache so nta'a, 'enapeco':
Aja', 'auo'ot da 'enapec camaye. 'Aualauat, ime nache 'aulayiñi, yaqto' qaỹapalaxat qome na nasouaxashetpi maye qomi' huetaleguete, souaxat som qaica ca ỹasouaxatpi maye ỹalauat co'ollaxa so Joab. 32Qaq Ñim Nataxala', talec naqa'en da maiche lasouaxashet somaye, souaxat da ỹalaua't soua dos ỹale't maye ỹataqta no'on da lataxa'c, maye napacalec da lataxac somaye, som Abner maye llalec so Ner, som lataxala' so alleppi Israel le'ecpi, qataq so Amasa, som llalec so Jéter, maye lataxala' so alleppi Judá le'ecpi. Qaq so ita'a saỹaỹaten co'ollaxa de'era. 33Qaq de'era nasouaxashet souaxat da l-leuaxa soomaye, nache 'eetai' qome da huetalec so Joab, qataq cam chegoxoguetpi somaye. Qalaxaye da nlagaxayec maye chegoqo'ot Ñim Nataxala', nache 'eetai' qome da huetalec so David, qataq na llalaqpi, qataq da lo'onataxanaxac da nta'a. 34Nache so Benaías, maye llalec so Joyadá, jec, taỹa so Joab, nache ỹalauat. Ime, nache somaye qailareña so lma' maye naña ye toolec 'alhua. 35Ime, nache so nta'a ỹanagui da lataxala' so alleppi so Benaías, nmeneguet naqa'en da lo'onataxanaxac so Joab, qaq so ntaxaỹaxanaxanec Sadoc, nmeneguet naqa'en da lo'onataxanaxac so Abiatar. 36Ime, nache iỹaxaneuga so Simea nache 'enapega, 'eeta':
'Ano'oxoosheguem qome ca 'arma', ye Jerusalén da yaqto' nache qonaña yemaye, qalaxaye nache qaica qome ca lỹa 'aigue, 37cha'aye ca na'a'q da qojec, da 'aua'axasoxoolec so la'auaxac ye Cedrón, nache 'auaỹateeta da 'aleu, qaq 'am maiche 'anasouaxaala't qome. 38Nache so Simea, ỹasateguet so nta'a, 'eeta':
Aja', nalotañi. Qaq de'era 'ara'aqtac 'am nta'a, nachera da so'ot qome.
Nache so Simea, qaỹoqtrec soua vi'iye da netaña co'ollaxa ye Jerusalén. 39Qaq co'ollaq inoxoore'c soua tres vi'iye, nache soua dos l-lataqa somaye, no'otrauec co'ollaxa, nache taỹalo da yaqto' nero'ot so Aquis, som llalec so Macá maye nta'a ye Gad. Qaq co'ollaq qaỹa'aqtaxanem so Simea, da soua l-lataqa netraña ye Gad, 40nache somaye ñisheguem da ỹo'oolec so lalo 'ashena, da yaqto' nqo'ona ye Gad maye naña so Aquis, da ỹe'eguena'alo soua l-lataqa. Qaq co'ollaq mashe ñe'eguelaq so Simea, nnaictagueto soua l-lataqa, 41nache co'ollaq ỹaỹaten so Salomón, da so Simea ca'ai ye Jerusalén, da taỹa ye Gad, qataq mashe ñe'eguelaq. 42Nache so nta'a Salomón, damaxasoneuga co'ollaxa so Simea, nache 'enapega, 'eeta':
¿Saisheto' peta'a da 'aỹa'anot ñaqa'en co'ollaxa so 'ara'aqtac Ñim Nataxala', qataq 'am saỹaanaxanaxanec co'ollaxa, da ca na'a'q da qoca'ai ye Jerusalén, nache 'aleu? Qaq 'am qonapec: ¡Aja', ỹaỹamaqchiguiñi da 'ara'aqtac, qaq aỹem salaxaguet qome damaye! 43Qalaq ¿ta'ainco' da saishet da 'aupacchigui som 'ara'aqtac, maye 'aỹa'anot co'ollaxa Ñim Nataxala', qataq da sa 'aualaxaguet dam 'am samaxalec co'ollaxa? 44Qaq so nta'a nataqa'en 'enapega so Simea, 'eeta': «'Am, 'auaỹateeta da 'auo'otec co'ollaxa da ỹataqta qauem so ita'a David. Ỹoqo'oye nagui Ñim Nataxala', 'am talec naqa'en de'era qauem maye 'auo'ot co'ollaxa. 45Qaq aỹem, qalaxaye aỹem talec qome da nchoxonnataxanaxa, qataq añi nso'onaxaqui so David, nache 'eetai' qome da chochaq tatec da ilotague' Ñim Nataxala'.» 46Ime, nache so nta'a ỹamaq so Benaías, som llalec so Joyadá, nache somaye jec, nache ỹalauat so Simea. Huaña, nache so Salomón ỹataqta imauec da ilo'ogue de'era no'onataxanaxac.
Currently Selected:
1 Reyes 2: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.