2 Samuel 24
24
So David ỹo'ot aso le'enaxat lmalate so nhuo' le'ecpi
1Qaq Ñim Nataxala' ỹe'eguelaxalec co'ollaxa da dalemataỹa so Israel le'ecpi, nache ỹayena'a so David da ỹo'ot aso le'enaxat lmalate ye Israel qataq ye Judá. 2Nache so nta'a ỹamaq so Joab, maye lataxala' so nalleppi somaye, 'eeta':
«'Anqo'oneuga qome 'enauac na maiche nhuo' Israel le'ecpi, chegoqchiguiña 'anqa'en qome ye Dan, nache ivitta'a ye Berseba, nache 'auo'ot aca le'enaxat lmalate namayepi, yaqto' saỹaten ye lcata na netalec namaye.» 3Nache so Joab, 'enapeco':
«¡Ñim Nataxala' maye 'Anatamnaxala', 'am nta'a, ỹataqta nquigaxatapeguec qome ye lcata ne'ena nhuo' le'ecpi, nache napacalec ye lcata nagui, qaq 'am nta'a 'avira'a da ỹataqta 'auauaachigui qome! Ỹoqo'oye ¿ta'ainco' ye 'auauotaique da 'auo'ot aca le'enaxat lmalate ne'ena nhuo' le'ecpi?»
4Qalaxaye so nta'a saishet da nqochenaxat da la'aqtac da 'enapega so Joab, qataq so lataxala'pi so nalleppi, ỹoqo'oye so Joab qataq so lataxala'pi so nalleppi, ca'ai co'ollaxa so nta'a, nache jec da yaqto' ỹo'ot da naneraguec so Israel le'ecpi. 5Nache somayepi ỹa'axasoxoolec so tala Jordán, qaq co'ollaq ivira ye saqaỹapeque ye Aroer, nache hua'a yem pa'aỹa'ague da la'añaxa so huaqta'a't nỹecpi maye nangui ye ca'amapega't ye Gad, huaqta'ai' ye Jazer. 6Qaq co'ollaq ime, nache taỹa ye Galaad qataq ye Cades, yem na'alhua na hitiitapi. Qataq ivitta'a ye Dan, nache ncoleetaua'a ye Sidón. 7Ime, nache taỹa so ñe'eguenaxaqui ye tiro, qataq ivira'a 'enauac so huaqta'a't nỹecpi maye lma'pi so heveopi qataq so cananeopi. Qataq tateuga na pa'aỹa'ague da la'añaxa ye Judá, nache ivitta'a ye Berseba. 8Qaq co'ollaq ime da queuotapeguelec 'enauac se'eso 'alhua soua nueve ca'agoxoiqa, qataq veinte na'axa'te, nache ỹe'eguelaxa ye Jerusalén. 9Nache so Joab, ỹanem so nta'a aso le'enaxat lmalate 'enauac se'eso shiỹaxauapi maye lma' ye Israel, qaq ivi' ochocientos mil so ỹalleppi maye mashe ishet da taỹa ca alaataxac, qaq so netaña ye Judá, ivi' quinientos mil so ỹalleppi. 10Qaq co'ollaq ime aso le'enaxat lmalate se'eso shiỹaxauapi, nache so David ỹataqta huo'o da ntogotaxac, nache da'aqtaxanem Ñim Nataxala', 'eeta':
«'Am Nataxala', aỹem, ỹataqta lta'araic da ỹasouaxashet, souaxat da so'ot de'era. Qalaxaye nagui 'onaxaico' da 'auapalaxat de'era ne'enaxac ne'ena 'aramaxashec.» 11Qaq so lỹa na'a'q co'ollaq ñisheguem so David, nache Ñim Nataxala' ỹanem da la'aqtac so na'aqtaxanaxanec Gad, maye ltaua so David, 'eeta': 12«'Anqo'ona qome ñi David, nache 'aua'axatem da ỹa'aqtac, da Aỹem sanema caua tres iuaxanaxanaxaco da lca'aguilo da ỹaconeua'a ca 'oonolec caamaye da yaqto' so'otec.» 13Nache so Gad, nqo'ona so David, nache inat, 'eeta': «¿Negue't ca 'alca'ateua'a ne'enaua tres: Peta'a 'alca'ateua'a da qanamaxa ne'ena 'alhua caua siete vi'iye ca nqouaxa, huo'otaq tres ca'agoxoiqa da 'ananeltaxaatac, souaxat da 'am icaatac na 'ampa'aguenaxauapi, huo'otaq tres na'axa'te da talec ana 'alhua ca napiina? Qaq nagui, 'auennataxaalec de'era, yaqto' que'eca 'arasataxac, sa'aqtaxanem qome Ñim aỹem namaq.» 14Nache so David ỹasateguet so Gad, 'eeta':
«Ỹataqta seqalana'a ca lleca'ateua'a ne'enaua tres. Qalaxaye 'onaxaic da maiche ca qomi' 'eeteque Ñim Nataxala', cha'aye Ñimaye ỹataqta lta'araic da lchoxonnataxanaxa, qalaxaye saishet qome da aỹem loxonec naqa'en na ñepa'aguenaxauapi.» 15Qaq huaña, nache Ñim Nataxala' namaxa ye Israel so lta'araic napiina, qaq chegoqchiguiña se'eso nte'eta, nache ivitta'a so naloqnec na'a'q, qaq ivi' setenta mil so ileu, 'enauac ye Dan qataq ye beerseba. 16Qaq so nale piguem le'ec Ñim Nataxala', co'ollaq mashe huotaique da nlaxaañi ye Jerusalén, nache Ñim Nataxala' ntogottague' de'era qauem maye ỹo'ot, nache 'enapega so lamaxashec piguem le'ec maye ỹalauattac se'eso shiỹaxauapi, 'eeta': «¡A'aye, 'axaañi de'era 'auo'ottac!»
Qaq se'eso namaxashec piguem le'ec, hueta'a co'ollaxa ye lchegoxosoxonqa' so Arauna som jebuseo, maye ichegoqtac na trigo. 17Nache so David co'ollaq ila'a se'eso namaxashec piguem le'ec, da ỹalauattac se'eso shiỹaxauapi, nache natamnot Ñim Nataxala', 'eeta':
«¿Negue'tom ca lasouaxashet ne'ena shiỹaxauapi? ¡Ye nachaỹemta da huo'o da ỹasouaxashet! ¡Qataq nachaỹem so'ot de'era qauem! ¡Qaq ỹoqo'oye 'Am ñachoxonnot da aỹem talec 'anqa'en ca ñeuaxanaguec, qataq na chegoxoguetpi so ita'a!»
So David nauaxaỹaxaasheguem aso nca'atoxonaxalate
18Qaq nacheso se'eso na'a'q da so Gad nqo'ona so David, nache 'enapega, 'eeta':
«Qoñisheguem qome nache 'ano'oxoosheguem aca nca'atoxonaxalate da 'aỹa'anot Ñim Nataxala', naña 'anqa'en ye lchegoxosoxonqa' da ichegoq na trigo so Arauna som Jebús le'ec.» 19Nache so David, ỹo'ot da la'aqtac Ñim Nataxala' maye ỹamaxalec co'ollaxa so Gad. 20Qaq so Arauna, co'ollaq ila'aguet so nta'a, qataq so lamaxashecpi da taỹa'a so netaña somaye, nache ca'atta'aguet so nta'a. Nache co'ollaq ivireguet somaye, nache ỹa'aroto naua l-llecte, qataq ivira'aguet naqa'en na latap na 'alhua, 21nache 'eeta':
«'Am nta'a, maye ỹataxala', ¿ta'ainco' da 'anvira'a ne'ena 'aramaxashec?»
Nache so David 'enapeco':
«Qomye sauotaique da sesheenaxana na 'archegoxosoxonqa' na trigo, da yaqto' sanaña da ño'oxoosheguem aca nca'atoxonaxalate da sanot Ñim Nataxala', yaqto' ne'ena napiina vi'iiguet, nache ca'ai ne'ena nhuo' le'ecpi.» 22Nache so Arauna, 'enapeco':
«Aja', 'auacona namaye 'am nta'a, nache maicheye ca 'auacona da 'aỹa'aneuo da 'arachetaqtaxanaxat, cha'aye ne'ena, huo'o na nauegaxanaxala' huacapi, qataq ana namoxoỹaqtaxanaqte, qataq na lauegaxanaxaqui na huacapi da yaqto' lalonaxat ca norec. 23¡Qaq 'enauac ne'enapi, 'am sanem 'am nta'a!
Qaq Ñim Nataxala' maye 'Anatamnaxala', 'onaxaico' da ỹaỹamaxareeta qome que'eca 'aỹa'anot Ñimaye.» 24Qalaxaye so nta'a 'enapeco':
«'A'i, saishet, aỹem sesheenaxana qome namaye, cha'aye aỹem saishet da sanot Ñim Nataxala' maye Ñatamnaxala' ca nachetaqtaxanaxat da saishet da sesheeten aca lasheue.»
Nache so David, desheenaxana se'eso nchegoxosoxonqa', qataq so nauegaxanaxala'pi, qaq aso lasheue somaye, ivi' aso cincuenta lcatpiole plata, 25huaña nache so David, no'oxoosheguem aso nca'atoxonaxalate da ỹanot Ñim Nataxala', nache ỹaneuo aso lachetaqtaxanaqte qaỹavigaxatta, qataq aso qanhuaachigui. Huaña, nache Ñim Nataxala', hua'axaỹa co'ollaxa da nachoxonnaxac so shiỹaxauapi se'eso 'alhua, nache vi'iiguet se'eso napiina ye Israel.
Currently Selected:
2 Samuel 24: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.