Zefanja 3
3
Woo Jerusalem daut gonen woat
1Daut woat Jerusalem noch schlajcht gonen,
daut see soo jäajenaun un vesindicht es,
un soo jewaultmässich omhäa jegonen es.
2See horcht nich no Gott siene Stemm
un lat sikj nich trajchtwiesen.
See sat äa vetruen nich opp däm Harn
un helt sikj nich aun äa Gott.
3Äare Leidasch sent soo jefäadlich
aus een brellende Leiw,
un äare Rechtasch aus Wilw,
dee zeowes nuscht fa däm Morjen loten. #Hes 22,27
4Äare Profeeten jäwen weinich rom
un sent nich to truen;
äare Priestasch brinjen Schaund opp daut, waut heilich es,
un moaken daut Jesaz daut sajen, waut an paust. #Micha 3,11
5De Har es mank an un es jerajcht,
un deit nuscht waut orrajcht es.
Aule Morjen lat hee seenen waut rajcht es;
doa blift kjeen Dach ut.
Oba de onopprechtje Menschen enne Staut
weeten von kjeene Schaund.
6De Har sajcht: Ekj hab Velkja utjerot;
ekj hab dikje Mieren enne Grunt jebrocht,
un äare Gaussen ladich jeloten;
ekj hab äare Städa venicht,
daut doa kjeena mea wont.
7Ekj docht:
Dee woaren doch Forcht fa mie haben,
un sikj belieren loten.
Dan wudd ekj äare Jebieda nich dolbräakjen
un an nich bestrofen, soo aus ekj woarnd.
Oba see sent iewrich beeset to doonen.
8Un nu sajcht de Har: Denkjt aun dit,
aun däm Dach wan ekj woa oppstonen
un jäajen junt zeijen.
Ekj hab mie beschloten de Velkja tooptoroopen,
un de Kjennichrikjs to vesaumlen,
un dan mienen Oaja äwa an loostoloten,
un aul daut Gloot von mienen Groll opp an komen loten.
De gaunze Welt saul oppjeriemt woaren,
derch daut Fia von mienen Oaja. #Psa 79,6; Joel 4,2
9Un dan woa ekj de Velkja reine Miela jäwen,
soo daut see aula däm Harn sien Nomen aunroopen
un am bestendich deenen.
10Von jantsied von däm Riefa en Kusch
woat mien vestreidet Volkj,
dee waut mie aunbäden,
mie äare Gowen brinjen. #Psa 68,32; Jes 18,1; Apost 8,27
11Wan dee Tiet kjemt,
woascht du nich Schaund lieden
fa aul daut, waut du jäajen mie jeschauft hast.
Dan woa ekj dee, dee soo sea met sikj puchen,
von mank junt wajchnämen;
dan woascht du opp mienen heiljen Boaj
nich mea ieejenkoppich sennen.
12Ekj woa mank junt een jerinjet un eefachet Volkj loten.
Dee woaren sikj fa äa Schutz opp däm Harn sienen Nomen veloten. #Hes 6,8
13Dee waut dan noch woaren en Israel sennen,
woaren nich lieejen ooda schlajchtet doonen.
De Tung en äa Mul woat Menschen nich väalieejen.
Soo aus Schop oppe Weid jebrocht woaren un sikj dol lajen,
soo woat sikj mien Volkj fa nuscht enjsten.
Een Freidenleet
14Lacht, jie Menschen en Zion;
roopt fa freid, jie Israeliten.
Freit junt, jie Lied en Jerusalem,
un lot junt daut von Hoaten scheengonen, #Sach 9,9
15wiels de Har haft june Strof von junt jenomen,
un haft june Fiend tosied jesat.
De Har, Israel äa Kjennich,
es medden mank junt,
soo daut jie junt fa kjeen Trubbel
mea enjsten brucken.
16Wan dee Tiet kjemt,
woaren see to Jerusalem sajen:
Enjst junt nich en Zion.
Lot june Henj nich schwak woaren,
17wiels de Har, jun Gott, es bie junt.
Hee es stoakj un kaun raden.
Hee woat sikj äwa junt freien un froo sennen.
En siene Leew, woat hee junt vejäwen,
un hee woat sikj lud to junt freien, #Jes 62,5
18soo aus aun eenen Fastdach.
Ekj woa daut Onheil von junt nämen,
soo daut jie junt nich schämen brucken.
19Horcht emol, ekj woa dan uk een Enj moaken
met aul dee, dee junt bedrenjden.
Ekj woa de lome halpen
un de vestreide toopsaumlen von aule Velkja,
un woa äare Schaund to Iea vewaundlen. #Micha 4,7
20Wan dee Tiet kjemt,
woa ekj junt vesaumlen
un junt no Hus brinjen.
Wan ekj junt wada oppbuen woa,
woa ekj junt jeloft un aunjeseenen moaken
mank aule Velkja oppe Ieed;
un jie woaren daut to seenen kjrieen,
sajcht de Har. #Jer 29,14; Zef 2,7
Currently Selected:
Zefanja 3: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.