Liera 12
12
Hool em Denkj, wäa die jemoakt haft
1Hool em Denkj, wäa die jemoakt haft, uk wan du junk best,
ea de schwoare Tiet kjemt, de Joaren wan du meest,
daut jeit nich mea scheen.
2Dan vedunkelt eenem de Sonn,
un daut Licht von de Mon un Stierns vegonen,
un de Wolkjen komen nom Räajen wada.
3Dan kjemt de Tiet,
wua de Wajchta fa eenem Hus flautren,
un de stoakje sikj bekjen,
un dee waut molen too weinich woaren un opphieren,
un daut fa dee diesta woat, dee derch de Fenstren kjikjen.
4Dan gonen de Däaren aun de Gaus too,
un daut Jeruzh von de Mäl woat leis,
eena steit met de Väajel toop opp,
un aul de scheene Leeda vegonen.
5Eena fercht sikj fa huaget,
un haft angst fa daut waut oppem Wajch passieet;
de Maundelboom blieecht,
un de Graushoppa schlapt sikj delenjd;
de Janka es nich mea doa,
wiels de Mensch doahan jeit,
wua hee opp emma bliewen mott;
un de Lied oppe Gaus truaren.
6Dan ritt de selwana Strank auf,
un de goldne Komm brakjt twei;
de Ama bie de Kjwal veschleit,
un daut Raut brakjt twei un felt em Borm.
7Dan jeit de Stoff trigj no de Ieed,
von wua dee uk jekomen es,
un de Jeist jeit trigj no Gott,
dee dän jejäft haft.
#
1Mo 3,19; Liera 3,20 8Daut es nich to bejriepen, sajcht de Liera,
bloos nich to bejriepen.
Daut es aulatoop nich to vestonen.
De Schluss
9De Liera wia een weisa Maun, un lieed de Menschen emma mea vestonen. Hee haft väle Spricha aufjeschazt un derchjedocht, un trajchtjestalt fa daut Volkj. 10De Liera vesocht daut fein to sajen, un waut hee schreef, daut wia soo aus daut es. 11Waut de Weise sajen, es soo aus Stachels, un de Spricha sent soo aus enjeschloagne Näajel; eena, dee een Hoad es, haft ons dee jejäft. #Jes 22,23
12Mien Sän, doa sull noch waut jesajcht woaren aus Woarnunk: Wie woaren nienich foadich sennen met Bieekja moaken, un wäa väl lieren well, woat doaderch meed woaren. 13Well wie emol sajen, waut daut Wichtichste von aule Lieren es: Hab Ieaforcht fa Gott, un hool siene Jesazen; daut es aules waut von Menschen velangt es. #5Mo 6,2 14Gott woat aule Sachen, aules waut uk vestoaken es, auf goodet ooda schlajchtet, rechten. #Reema 2,16; 2Kor 5,10
Currently Selected:
Liera 12: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.