2. Korinta 13
13
Latste iernste Wieed un Säajensgruss
1Dit woat nu daut dredde mol sennen, daut ekj hankom. “Derch twee ooda dree Zeichnisen saul jieda Schultbewies bestemt woaren”. #5Mo 19,15; Mat 18,16 2Ekj woarnd junt aul aus ekj daut tweede mol doa wia, un saj daut nu noch emol to aul dee, dee doa verhäa jesindicht haben, un to aul dee aundre, daut ekj kjeenem veschoonen woa, wan ekj nu komen woa. 3Daut woat junt dän Bewies doafäa jäwen, daut Christus derch mie rät. Christus es nich schwak en sienem Omgank met junt, oba es kjraftich en junt. 4Wan hee uk en Schwakheit jekjriezicht wort, soo läft hee nu derch Gott siene Krauft. Un soo aus wie en am uk schwak sent, soo woa wie doch derch Gott siene Krauft läwen, om junt to deenen.
5Unjasieekjt junt selfst, auf jie em Gloowen stonen. Prooft daut selfst ut! Weet jie daut nich selfst, daut Jesus Christus en junt es? Wiels wan nich, dan hab jie vesajcht. 6Ekj hop, jie woaren seenen, daut wie nich vesajcht haben.
7Wie prachren Gott, daut jie nuscht orrajchtet doonen, nich doawäajen, daut wie rajcht behoolen, oba daut jie daut rajchte doonen, soogoa wan daut soo lat, aus wan wie daut nich hanjekräajen haben. 8Jäajen de Woarheit kjenn wie nuscht utrechten, oba wie kjennen fa de Woarheit sennen. 9Wie freien ons, wan wie schwak sent un jie stoakj sent. Un wie bäden doafäa, daut jie muchten volkomen woaren. 10Daut es wuawäajen ekj dit schriew ea ekj hankom, daut ekj dan, wan ekj ieescht doa sie, nich woa motten strenj sennen. De Har haft mie Krauft jejäft, junt opptobuen, un nich doltorieten. #2Kor 10,8.11
11Tolatst, miene Breeda, siet froo, doot waut rajcht es, lot junt treesten, siet junt eenich, siet frädlich! Ons leeftolja un frädelja Gott woat dan met junt sennen. #Reema 15,33; Flp 4,4 12Jreest junt unjarenaunda met een heiljen Kuss. Aule heilje bestalen junt to jreessen. 13Mucht onsem Harn Jesus Christus siene Jnod un Gott siene Leew un däm Heiljen Jeist siene Jemeenschoft met junt aula sennen! Amen.
Currently Selected:
2. Korinta 13: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.