2. Korinta 12
12
Waut werkjlich talt
1Ekj mott noch wieda groot räden, wan daut uk nuscht halpt. Ekj woa oba doavon räden, waut de Har mie openboaren deed un seenen leet. 2Ekj kjan eenen Maun en Christus, dee wort vieetieen Joa trigj – auf hee em Kjarpa ooda butrem Kjarpa wia, weet ekj nich, daut weet Gott – en dän dredden Himmel nenjenomen. 3Ekj kjan disen Maun un weet daut – auf hee doabie em Kjarpa ooda butrem Kjarpa wia, weet ekj nich, daut weet Gott –. 4Dee wort en daut Paradies nenn jehowen. Doa hieed hee Wieed, dee nich uttospräakjen sent un dee kjeen Mensch nosajen kaun. 5Von däm Maun well ekj groot räden, von mie selfst well ekj nich puchen, buta daut ekj von miene Schwakheit räd. #2Kor 11,30 6Un wan ekj von mie uk noch groot räden wudd, doawäajen wudd ekj noch kjeen Noa sennen, wiels ekj wudd de Woarheit räden. Ekj doo daut doawäajen nich, daut kjeena mea von mie denkjen saul, aus hee von mie sitt ooda von mie hieet. #2Kor 10,8 7Un wiels dise Openboarungen soo waut grootet wieren, wort mie, daut ekj nich met mie stolt woaren sull, een Stachel en daut Fleesch jejäft, een Enjel von Soton toom mie schlonen. 8Ekj hab dän Harn dree mol doawäajen aunjehoolen, daut mie dee veloten mucht. 9Oba siene Auntwuat wia: Miene Jnod es jenuach fa die, wiels miene Krauft es en schwake Menschen stoakj. Doawäajen räd ekj aum leefsten von miene Schwakheit, daut Christus siene Krauft en mie to seenen es. 10Doawäajen sie ekj mootich wan ekj fa Christus schwak sie, meshaundelt woa, en Noot sie, Vefoljunk un Angst derch moak. Wiels wan ekj schwak sie, dan sie ekj stoakj. #Flp 4,13
De Sorj om de Korinta
11Ekj sie met mien räden toom Noa jeworden, oba jie haben mie bat doa jebrocht. Wan ekj uk nuscht sie, jie hauden mie sult lowen, daut ekj en kjeenem Faul weinja sie aus de Apostel, dee no june Meenunk soo huach rut stonen. #2Kor 11,5 12Aul daut waut een Apostel uttieekjent, es mank junt derch Tieekjens en Wundawoakjen en aule Jedult passieet. #Reema 15,19; Heb 2,4 13En waut hab jie weinja jekjräajen aus de aundre Jemeenten, buta doarenn, daut ekj junt nich to eene Laust jeworden sie? Vejäft mie dit orrajcht! #2Kor 11,7-9 14Nu well ekj toom dredden mol hankomen, un ekj woa junt uk dit mol nich eene Laust sennen. Ekj sieekj nich daut waut junt es, oba junt selfst. Nich de Kjinja sellen fa de Elren sorjen, oba de Elren fa de Kjinja. 15Ekj wudd jieren mie selfst un aules waut ekj hab fa june Seelen hanjäwen. Wan ekj junt soo sea väl räakjen, sull jie mie doawäajen weinja goot sennen? #Flp 2,17
16Lot daut sennen soo aus daut well, ekj sie junt nich to Laust jefollen. Oba sie ekj veleicht hinjalestich jewast un hab junt derch Lest to hoolen jekjräajen? 17Hab ekj junt derch irjentwäm utjenuzt, dän ekj hanjeschekjt hab? 18Ekj schekjt junt Titus, un noch eenen Brooda met am. Deed Titus junt utnutzen? Haundeld wie nich no een un dänselwjen Jeist? Jinj wie nich beid dän selwjen Wajch? #2Kor 8,6.16-18
19Jie woaren woll aul jedocht haben, daut wie ons ver junt rajchtfoadjen wellen. Wie haben aus soone to junt jerät, dee en Christus un en Gott siene Jäajenwuat sent. Aules, leew Frind, waut wie doonen, es om junt opptobuen. 20Ekj fercht, wan ekj hankomen woa, woa ekj junt nich soo auntrafen, aus ekj well, un jie woaren mie uk nich soo finjen, aus jie wellen. Ekj fercht, daut ekj bie junt Striet, Aufgonst, Oaja, Zank, Pludren, Beleidjunk, Stolt un Onordnunk auntrafen woa. #2Kor 10,2 21Ekj fercht, daut Gott mie deemootjen woat, wan ekj noch emol hankom. Ekj fercht, daut ekj äwa väle en Trua jeroden woa, dee noch nich omjekjieet sent un sikj noch nich von äare Orreinichkjeit un Huararie un Weltlost jereinicht haben, en dee see bat nu jeläft haben. #2Kor 13,2
Currently Selected:
2. Korinta 12: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.