1. Timotäus 3
3
Väaschreften fa de Jemeentenleidasch
1Daut es de Woarheit: Wäa doa sträft Jemeentenleida to woaren sträft no een goodet Aumt. #(1-7) Apost 20,28; Tit 1,5-9 2Een Jemeentenleida saul eena sennen äwa däm sien Läwen nuscht uttosaten es. Hee saul mau eene Fru haben, hee saul kloa denkjen kjennen, sikj beharschen, ierenhauft un gaustfrie sennen, un em Staund sennen aundre to belieren. 3Hee saul nich een Drinkja sennen, ooda eena dee opp strieden helt. Hee saul frintlich sennen, nich aun aundre Jewault eewen, un nich nom Jelt hinjaraun sennen. 4Hee mott sien ieejnet Hus weeten väatostonen, un siene Kjinja soo to belieren, daut see am jehorchen un respakjten. 5Wiels, wan een Maun nich weet sien ieejnet Hus väatostonen, woo saul hee dan fa Gott siene Jemeent sorjen? 6Een Jemeentenleida saul uk nich eena sennen, dee noch mau korz trigj toom Gloowen jekomen es, wiels hee mucht doamet stolt sennen, un doaderch tofaul komen, soo aus de beesa Fient selfst. 7Hee mott uk eena sennen von däm de Menschen buta de Jemeent goodet to räden haben, daut hee nich veacht woat un dän beesen Fient en de Faul rant.
Aunordnungen fa de Helpa en de Jemeent
8De Diakonen motten daut met äa Aumt jrod soo goot iernst nämen, nich met dobbelde Tungen räden, nich Drinkja sennen, un uk nich onierliche Jeschaften driewen. #Apost 6,3; Flp 1,1 9See sellen sikj met een reinet Jewessen aun de Woarheit hoolen, dee an derch dän Gloowen openboat es. #1Tim 1,19 10Un lot an ieescht opp de Proow jestalt woaren. Wan see de Proow bestonen, dan lot an deenen. 11Äare Frues motten daut uk iernst nämen, un nich een beeset Jepluda haben. See sellen sikj beharschen kjennen un en aules tru sennen. #Tit 2,3 12De Diakonen sellen uk mau eene Fru haben, un äare Kjinja un äaren Hushault goot väastonen. 13Wiels de Diakonen, dee doa goot deenen, woaren goot to stonen komen, un jetroost met äaren Gloowen en Christus Jesus mank de Menschen komen kjennen.
De Jemeent aus Zeij von daut groote Jeheemnis von Gott
14Ekj räakjen boolt no die to komen, oba ekj schriew die dit, 15soo daut wan mie doa sull waut mank komen, daut du dan weetst, waut du en Gott sienen Hushault to doonen hast. Daut es dän läwendjen Gott siene Jemeent, wuaropp de Woarheit steit un uk jestett woat. #Efs 2,19-22 16Woo groot de jeheemnisvolle Woarheit es, aun dee wie jleewen, doarenn stemm wie:
Jesus #3,16 Griechisch Hee ooda Gott kjeem en Menschenjestault,
de Jeist rajchtfoadijd am,
de Enjel sagen am,
en de gaunze Welt wort von am jeprädicht,
aun am wort en dise Welt jejleeft,
un hee wort trigj en de Harlichkjeit nenn jenomen. #Mrk 16,19; Joh 1,14; Apost 28,28; Reema 1,4; Efs 1,20-21
Currently Selected:
1. Timotäus 3: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.