Jer 35
35
E'b'inju' tyajajil Rekab'
1Tzaj yolin Qman Dyos weye' toj tq'ijlalil tkawb'il Joakyim tk'wal Josiy, nimaqkawil toj Juda, tma ikjalu:
2Kutxi'ya kyxol tyajajil Rekab' ex yolina kyuk'i'l. Q'inqe'xtzuna toj junju' ja toju' ja te k'u'lb'il, ex q'onxa kyk'wa' b'in, chij. 3Ayine' Jeremiy, inxi'ye' jyolte Jaasaniy (tk'walu' juntl Jeremiy ex tchman Ab'asiniy), ex jyolkye ttzik mo titz'in ex tk'wal, ex kykyaqilju' tyajajil Rekab', 4exi' wiq'i'ntzuntze' toj tja Dyos, toju' kyja tk'wal Anan, tk'wal Ikdalyas, jun ajb'el te Dyos. Xi' ta'ju' ja lu tk'etz kyja nejenel toj tja Dyos ex tib'aju' tja Maaseyiy, tk'wal Salum, ju' xq'uqil ttzi tja Dyos. 5Eb'ajx nq'o'ne' xar ex k'wab'l kye tyajajil Rekab' nojniqe' tu'n B'in, ex xinma'ne' kye: Kyk'wanx ch'i'n kyb'ine', nchije' kye.
6Ex tzaj kytzaq'we'n kjalu: Min nqo k'wanqe' b'in, qu'n majx oje kyej q'ma'n qeye' ex kye qyajajile' tu'n Jonadab', tk'wal ojtxi' qyajilb'ene' Rekab', tu'n lalunx txiqk'wa'ne' b'in. 7Ex kyejtma'n qeye' tu'n lalun jaw qb'incha'n qjaye', ex tu'n lan tz'ok qawale' mo tu'n lan ten tqan qlob'aje'. Tchaq' weye' tu'n qanq'ine' kukxju' kyoj pach xb'alun, tu'n qanq'ine' nimtoj twitzju' tx'otx' lu jatoq'o'ye' naku'j najchaq xjal. 8In qb'i'nqe' tkyaqilju' tchaq' ojtxi' qyajilb'ene' Jonadab' qeye', ex mixti'x nqo k'wanqe' b'in, ayo'ye' e'qxu'jile' exqe' qk'wale', 9ex min njaw qb'incha'nqe' qja ex mixti'qe' qawal ex mixti' qtx'otx'e' tok tawal. 10Kyoj pach xb'alun najla'qo'ye' ex nche japun qu'ne' tkyaqilju' tchaq' Jonadab' ojtxi' qyajilb'ene' qeye'. 11Naqtzun ate' tej toktz tq'o'ntib' Nab'ukodonosor nimaqkawil aj B'ab'ilon toju' tx'otx' lu, o'tzaj oqe' toj Jerusalen kyeju' xjal te q'oj kaldey ex aj Sirya, qu'mtzun najlqo'ye' toj Jerusalen, chechij.
12Tzajtzun yolin Qman Dyos te Jeremiy ex tma:
13Ayine' Dyos Manb'aj nimwipumale' ex nche ajb'en aj Israel weye', inchaq'u'ne' teya tu'n txi'ya q'malte kye xjal aj Juda ex aj Jerusalen ikjalu: Kyknomile' xnaq'tzb'il ex kyb'inqe'xe' nchaq'b'ile'. Ayine' Dyos Manb'aj nchin q'mante. 14Ka'nqe'xkye' tyajajil Jonadab', tk'wal Rekab', matxi' kyb'inchaju' chaq'b'il taq' kye tu'n lalun che k'wan b'in, ex tzmax ja'lo min nkyk'wa'n qu'n inkynima'n tchaq'b'il ojtxi' kyyajilb'en. Ikxwe' matxi' b'ajx nq'o'nxi'we' chaq'b'il kyeye', aye'tzunkye' min nchinx kyb'i'ne'. 15Matxi' che b'ajx nchq'o'ne' kykyaqilju' nmajine', jun ti'jxi' juntl, q'malte kyeye' ikjalu: Kytzaqpinkje' kyb'inchb'aje' myab'a'n. Lalun che'x lpeye' kyi'j txqantl dyos ex lalun che k'ulune' kye, che tenb'eltzuntze' kukxju' twitzju' tx'otx' xinq'o'ne' kyeye' ex kye ojtxi' kyyajilb'ene'. Aye'tzunkye' min nok toj kywi'ye' ex min nchinx kyb'i'ne' 16Ka'nxkye' tyajajil Jonadab' tk'wal Rekab', in japun tchaq'b'il ojtxi' kyyajilb'en kyu'n, aye'tzu'nkye' aj Israel min nchinx kyb'i'ne'. 17Qu'mtzun in nma'ne' ayine' Dyos Manb'aj nimwipumale' ex nche ajb'en aj Israel weye', ikjalu: Kb'ajtzajel wiq'i'ne' tkyaqilju' k'ixk'oj matxi' nmaye' kyib'aj aj Juda ex kyib'aju' najlqe' toj Jerusalen. Qu'n matxi' chin yolinwe' kyeye', aye'tzunkye' min nchinx kyb'i'ne', matxi' che ntxoke', aye'tzunkye' mixti'x ntzaj kytzaq'we'ne', chiku'ya kye, chi Dyos.
18Expe' xitma'n Jeremiy kye tyajajil Rekab' ikjalu: Chi Qman Dyos nimtipumal Kydyos aj Israel, kjalu:
Tu'nju' matxi kyb'i'ne' tchaq'b'il ojtxi' kyyajilb'ene' Jonadab', ex matxi' kyb'inchaye' t-xnaq'tzb'il ex njapun kyu'ne' tkyaqilju' tchaq' kyeye'. 19Ayine' Dyos Manb'aj nimwipumale' nche ajb'en aj Israel weye', axxi'x ktenb'el jun tyajajil Jonadab' ajb'el weye' kukxju', chi Dyos, chi Jeremiy.
Currently Selected:
Jer 35: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999