Jer 34
34
Tqanil te nimaqkawil Sedekyiy
1Tetzunj intoq q'ojin nimaqkawil aj B'ab'ilon, kyuk'i'l txqan t-xjal te q'oj te kykyaqil nimaqtnam ate'toq tjaq' tkawb'il, ti'j Jerusalen ex kyi'ju' nimaqtnam nqaku' tk'etz, tzaj yolin Qman Dyos te Jeremiy ex tma ikjalu:
2Inxinchq'o'na, ayine' Dyos Manb'aj nche ajb'en aj Israel weye', tu'n txi'ya q'malte te Sedekyiy, nimaqkawil toj Juda, ikjalu: Matzaj tma'n Qman Dyos kjalu: Knb'incha'ye' tu'n ttzyetju' nintnam lu tu'n nimaqkawil aj B'ab'ilon ex tu'n toktq'o'n tq'aq'al. 3Lay jolpajta toj tq'ob', ktzyunjtzela ex kxel q'o'na te, tpomlenxi'tzun q'i'na twitz, kxel q'i'na B'ab'ilon. 4Tojpetzu'n tkyaqilju' lu, chin b'inku'ya Sedekyiy, nimaqkawil toj Juda: Lay kyimta tu'n k'uẍtx'e'nb'il. 5Toj nak'b'il kkyimela'ta, ex kb'el tz'e'ysa'n k'ok'sb'il ti'ja ajtkyima, kse'n b'aj tz'e'ysa'n tej kyb'ajkyimju' ojtxi' tyajilb'ena e'kawin nejtl twitza, ex kq'manjtzel ti'ja: ¡Ay, taye!, che oq'el ti'ja. Ayine' Dyos Manb'aj nchin yolin ex kma' ja'ye' lu, chiku'ya, chi Dyos te Jeremiy.
6B'ajx tma'ntl Jeremiy tkyaqil ja'lu te nimaqkawil Sedekyiy toj Jerusalen. 7Intoqtzun che q'ojinkju' xjal te q'oj aj B'ab'ilon ti'j Jerusalen. O'qe'kx toqtlju' nimaqtnam Lakyis ex Aseka kuwsa'nqe' ate'x toj Juda.
Min japunju' yol b'entniti'j tu'n kytzaqpetu' lq'o'n majin aj Eb'reyqe'
8Tzaj yolin Qman Dyos te Jeremiy tkyajlenxi' b'entti'j jun yol tu'n nimaqkawil Sedekyiy kyuk'i'l kykyaqilju' najlqe' Jerusalen tu'n kyxi' kytzaqpi'nju' majin lq'o'n. 9A yolju' kyej b'entti'j, aye' ati kymajin lq'o'n aj Eb'rey, ichan mo qya, tu'n kyxi' kytzaqpi'n, tu'ntzun lan ten kymajin lq'o'n kywnaqilx. 10Kykyaqilju' nejenel ex tkyaqilju' tnam ek'monte tkyaqilju' q'ma'n toju' yol kyej b'entti'j, ex eb'ajx kytzaqpi'n kymajin lq'o'n ex min e'ok kychq'o'ntl tu'n kyajb'en kye. 11Yajxi'tzuntel b'ju'l toj kyk'u'j tu'n tpaj eb'ajx kytzaqpi'n, ex eb'jo'k kychq'o'n jumajtl tu'n kyajb'entl kye te kymajin kq'o'n.
12Tzajtzun yolin Qman Dyos te Jeremiy, tma ikjalu:
13Ayine' Dyos Manb'aj nche ajb'en aj Israel weye', kyej b'entti'j jun nyole' kyuk'i'lju' ojtxi' kyyajilb'ene' tej kyetzwiq'i'ne' toj Ejipt, janche ajb'ena'toq te majin lq'o'n. Nchaq'e' kye 14tu'n txi' kyq'o'n tzaqpib'l kye alkyexku aj Eb'rey atl junjun twuqi'n ab'q'i qa k'ayi'ntib' te majin kye ex matz'ajb'en qaq ab'q'i. Aye'tzu'n ojtxi' kyyajilb'ene' min nxikyb'i'ne' ex min xikyb'incha'n. 15Aye'tzunkye' matxitoq kych'exb'eye' kynab'le', ex kyb'inchaye' b'a'n toj nwitze', tej xxikyq'o'ne' tzaqpib'l kyeju' kywnaqile' ate'k te kymajine' tlq'o'n. Ex kyej kytziya'ne' nwitze' toju' ja te k'u'lb'il xjansa'n weye'. 16Yajxi'tzuntel xkych'exb'etl kyb'e, makub' kytxa'ju'ne' nb'iye', tej ẍe okkychq'o'n jumajtle' ojetoq che'x kytzaqpi'ne' tu'n kyajb'en jumajtl kyeye' te majin lq'o'n. 17Ja'lo ayine' Dyos Manb'aj kxe'l nma'ne' kyeye': Mixti'x ẍinx kyb'i'nkye', mixnati'x ẍe'x kytzaqpi'ne' kymajine' lq'o'n kywnaqilqe'xe', qu'mtzun, kxe'l nq'o'ne' anb'il ja'jo tu'n ttzaj q'oj, tx'u'j yab'il ex we'yaj, tu'ntzun tb'inchanjtz jun taq'wix kyeye' kyxol kykyaqilju' kawb'il twitz tx'otx'. Ayine' Dyos Manb'aj nchin yolin. 18-19Kyej b'entti'j jun yol nwitze' kyu'n nejenel toj Juda ex toj Jerusalen, junx kyuk'i'lju' ajb'el toju' tja nimaqkawb'il, e'pale ex kykyaqilju' kyxjalil: kub' kyaq'pu'n jun qpoj tman wakx toj kab'e' ex eb'jik'x kyxolju' kab'e' nik'janchaq. Lwiyxi'xtzun kub' kyxitu'ntlju' yol kyej b'entti'j ex min japuntl kyu'n. 20Tu'ntpajtzu'n knb'incha'ye' tu'n tkub'kyi'j kyu'n kyajq'oj ex tu'n kykub' b'yo'n, ex tu'n kyok te kychi' k'utz ex kychi' tojk'ul txkup. 21Ex knb'incha'ye' tu'n tkub'kyi'j Sedekyiy nimaqkawil toj Juda kyuk'i'lxi' ajb'el te kyu'n kyajq'oj ex tu'n kykub' b'yo'n, toj kyq'ob' t-xjal nimaqkawil aj B'ab'ilon ẍekyaj tzaqpinkye ja'lo. 22Che tzajel nchq'o'n jumajtle' q'ojil ti'ju' nintnam lu, tu'n ttzyet kyu'n ex tu'n tok kytz'e'ysa'n. Ex knb'incha'ye' tu'n kykyaju' txqantl nimaqtnam toj Juda chq'ajlajtl ex mix-a'lo'tl najal kyoj. Ayine' Dyos Manb'aj nchin yolin, chi Qman Dyos.
Currently Selected:
Jer 34: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999