Jer 36
36
Jawt-ẍch'i'n B'aruk u'j toj tja Dyos
1Tzaj yolin Qman Dyos te Jeremiy toj tkyaji'n ab'q'i nkawin Joakyim, tk'wal Josiy, nimaqkawil toj Juda, tma ikjalu:
2Q'intza jun u'j, ex tz'ib'anku'ya toj tkyaqilju' matxi' b'ajx nma'ne' teya kyi'j aj Israel ex aj Juda, ex kyi'ju' txqantl nimaqtnam, tzajx tej ttzyet nyoline' teya toj tq'ijlalil Josiy tzmax ja'lo. 3Qaj nab'en ajkyb'inte aj Juda tkyaqilju' k'ixk'oj nxima'ne' tu'n ttzaj nq'o'ne' kyib'aj, qaj kjel kytzaqpi'nju' kyb'inchb'aj myab'a'n ex kb'el nnajsa'nwe' kyil ex kyb'inchb'aj myab'a'n, chi Dyos.
4Tzaj ttxko'n Jeremiy B'aruk tk'wal Neriy, xitma'ntzuntz te tkyaqilju' ojetoq tma Qman Dyos te, b'ajku'xtzun ttz'ib'a'n B'aruk toj jun tolin u'j. 5B'ajxtzun tma'ntl Jeremiy te B'aruk ikjalu: Ka'ntzpe'ya, tu'nju' jpu'nqine' lay b'ent nxi'ye' toj tja Qman Dyos. 6Qu'mtzun kutxi'ya toju' q'ij te mewayi'n ex ẍch'inktza u'j xinma'ne' teya xkub' ttz'ib'a'na, tu'ntzun tkyaqilju' tnam ex kykyaqilju' najlqe' kyoju' nimaqtnam toj Juda mache ul tzalu, tu'n kyb'inteju' tyol Qman Dyos. 7Qaj ẍekub'san twitz Qman Dyos ex qaj xkyaj kytzaqpi'n kyb'inchb'aj myab'a'n, qu'n kuwju' ttx'u'jil Qman Dyos ex tq'oj matxi' tzaj ti'ju' tnam lu, chi Jeremiy. 8Xitb'incha'n B'aruk tkyaqilju' tchaq' Jeremiy t-sanjelal Dyos te. Xi' toju' tja Dyos ex jaw t-ẍch'i'nju' tyo Qman Dyos.
9Toj tjwe'yi'n ab'q'i nkawin Joakyin tk'wal Josiy, nimaqkawil toj Juda, b'entti'j tu'n kymewayinju' najlqe' toj Jerusalen exqe' tzajniqe' kyoj txqantl nimaqtnam toj Juda, twitz Qman Dyos. 10Xi' B'aruk toju' tpen tja Dyos jawl, toju' ak'a'j ttzija, tzajxtzun tk'etz tja Kemariy tk'wal Sapan ju' tz'ib'al tqanil, xit-ẍch'i'nju' tolin u'j jatku'xa' tyol Jeremiy te tkyaqilju' tnam xjal.
Xit-ẍch'i'n B'aruk u'j kywitzju' nimaq kyoklen toj kawb'il
11Tb'itzun Mikayiy, tk'wal Kemariy ex tchman Sapan, tkyaqilju' tyol Qman Dyos jawt-ẍch'i'n B'aruk toju' tolin u'j, 12xi'tzuntz toju' tja nimaqkawil, toj tja tz'ib'al tqanil, ja b'u'yi'na'toq kyib'ju' nimaq kyoklen toj kawb'il, aye': Elisama, tz'ib'al tqanil; Delayas, tk'wal Semayas; Elnata, tk'wal Akb'or; Kemariy, tk'wal Sapan; Sedekyiy, tk'wal Ananiy, ex txqantl nimaq kyoklen. 13Xitma'n Mikayiy kye tkyaqilju' tb'i tej tjaw t-ẍch'i'n B'aruk toju' tolin u'j twitzju' tnam. 14Xi'tzun kychq'o'n nimaq kyoklen Jewdi, tk'wal Netaniy ex tchman Selemiy ex tk'wal tchman Kusi, q'malte te B'aruk tu'n t-xitiq'i'n tolin u'j jawt-ẍch'i'n twitz tnam kye. Xi'tzun tiq'i'n B'aruk tolin u'j ex pon yek'ultib' kywitz, 15xitzun kyma'n te:
—Qeku'ya ex ẍch'inktza tolin u'j qeye', chechij.
Jawtzun t-ẍch'i'n B'aruk kye, 16naqxi'xtzun nb'aj kyb'i'n, eb'ajxob' ex b'aj kyka'yi'n toj kywitz ex kyma:
—Kxel qma'nte' tkyaqil ja'lu te nimaqkawil, chechij.
17Xikyma'ntzuntz te B'aruk:
—Q'mantza qeye' se'n xb'ajkub'a' ttz'ib'a'na'ya lu, chechij.
18Xitzun ttzaq'we'n B'aruk kye:
—Matz'oktenku' Jeremiy q'malte weye' tkyaqil, ayintzunwe' ẍin okten tz'ib'alte toju' tolin u'j, chij.
19Xikyma'ntzuntz te B'aruk ikjalu:
—¡Kukyxi'ye' ewal, aya ex Jeremiy, ex mix-a'lo'x tu'n tb'inte jata'qe'ye'! chechij.
Kub' ttz'e'ysa'n nimaqkawil Joakyim tolin u'j
20Kyej kyq'o'n nimaq kyoklenju' tolin u'j toj tja Elisama, tz'ib'al tqanil, exi'tzuntz toj tja nimaqkawb'il q'malte tkyaqil ja'lu te nimaqkawil. 21Tchaq'tzun nimaqkawil te Jewdi tu'n ttzaj tiq'i'n tolin u'j toj tja Elisama, tz'ib'al tqanil, ex tej tpon tiq'i'n Jewdi, jawt-ẍch'i'n twitzju' nimaqkawil ex kywitz kykyaqilju' nimaqxi'x kyoklen ate'toq tk'etz. 22Tojku'na' tb'eljoji'n xjaw, atoqtzu' ta' nimaqkawil toju' tja toj tq'ijlalil che'w, tkub'toq jun q'aq' nk'ant toj tkb'el twitz. 23Intzun b'aj t-ẍch'i'nchaq Jewdi oxe' mo kyaje' txol wa'l, intoq eltjon nimaqkawil tu'n jun kchil ex ntoq okxtq'o'n toju' q'aq'. Iktzu'n b'aj ttz'e'ysa'n tkyaqilju' tolin u'j. 24Mixti'x exob'ju' nimaqkawil exqe' nimaqxi'x kyoklen tej kyb'inteju' jaw ẍch'i'n, ex mixti'x kyek'u jun k'ixk'oj toj kyanmi. 25Xikkub'sa'n Elnatan, Delayiy ex Kemariy te nimaqkawil tu'n lalun kub' ttz'e'ysa'n tolin u'j, atzunte nimaqkawil miẍti'x exitb'i'n, 26tchaq'pe' kye Jerameel, nejenel toj kawb'il kye b'iyol, te Serayiy tk'wal Asnel, ex te Selemiy tk'wal Ab'deel, tu'n kytzyunte Jeremiy t-sanjelal Dyos ex B'aruk ttz'ib'al. Atzunte Qman Dyos exitewa'n.
Okten Jeremiy q'malte juntl tolin u'j
27Tkub'lenxi'tzun ttz'e'ysa'n nimaqkawil tolin u'j jatz'ib'a'nqetoq tyol Jeremiy b'ajx tma'n te B'aruk, tzaj yolin Qman Dyos te Jeremiy, tma kjalu:
28Q'intz juntl tolin u'j ex tz'ib'anku' jumajtla tkyaqilju' tz'ib'a'ntoq toju' tnejel kub' ttz'e'ysa'n Joakyim, nimaqkawil toj Juda. 29Ex q'manxa kjalu: Lu xtma Qman Dyos: Kub' ttz'e'ysa'na tolin u'j, ex kub' tili'na Jeremiy tu'n tpaj kub' ttz'ib'a'n toj qa ilti'j tzulju' nimaqkawil aj B'ab'ilon xitulteju' nintnam ex tu'n tkyaj mixti'tl xjal ex txkup najalte. 30Ja'lotzun, ayine' Dyos Manb'aj, kxe'l nma'ne' teya Joakyim, nimaqkawil toj Juda, lay che tentlta tyajajil toju' tq'uqb'il Dab'i. Kjeltenta toj ttantonil q'ij ex toj txqan tchewal qonik'an, 31ex kb'el ntz'e'ysa'n twitza, exqe' nimaq kyoklen tuk'i'la, tu'n tpaju' kyile'. Knb'incha'ye' tu'n tkub' kyib'aje' ex kyib'aju' najlqe' toj Jerusalen ex toj Juda, tkyaqilju' k'ixk'oj nmaye' kyeye', jni'xju' min b'ajx tojkywinqile', chiku'ya kye, chi Dyos.
32Tzajtzun tiq'i'n Jeremiy juntl tolin u'j, xitq'o'n te B'aruk ttz'ib'al, kub' ttz'ib'a'ntzuntz tkyaqilju' b'ajx tma'n Jeremiy te, tkyaqilju' tz'ib'a'ntoq toju' tolin u'j ojetoq kub' ttz'e'ysa'n nimaqkawil Joakyim. Okttz'aqtza'n Jeremiy txqantl yol ikyininx tnab'lju'.
Currently Selected:
Jer 36: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999