Lv 27
27
Ti'xti' xjansa'nqe' te Dyos
1-2Tzaj tma'n Qman Dyos te Moyses tu'n t-xitma'n kye aj Israel kjalu:
Qa ati jun tajb'il tu'n tjapun tyol tu'nju' oje tma weye' tu'n ttzaj tq'o'n kse'nxju' twi' jun xjal, 3jun ichan te winqi'n (20) ab'q'i kpomelx te oxnaq (60) ab'q'i kxe'l tma'na te tu'n tq'onte jun o'nb'il te jun lib'r saqpwaq, kse'nxju' malb'il toju' ja xjan; 4qatzun jun qya, aju' o'nb'il tu'n tq'onte masch'i'n nik'jan lib'r saqpwaq. 5Atzu'n kyeju' xjal tzajx te jwe' ab'q'i tu'n tpon te winqi'n ab'q'i, ch'inxmi nik'jan lib'r saqpwaqju' o'nb'il tu'n tq'onte qa q'a, qatzun txin masch'i'n oxe' ons saqpwaq tu'n kyq'onte. 6Atzu'n kye k'wal tzajx te jun xjaw tu'n tpon te jwe' ab'q'i, aju' o'nb'il kyu'n qa q'a, masch'i'n jun ons tk'i' nik'jan saqpwaq, qatzun txin te ch'intlmi jun ons saqpwaq. 7Atzu'n kyeju' xjal matxi' chi ex tib'aj oxnaq (60) kyab'q'i, te ch'intlmi jwe' ons saqpwaqju' o'nb'il tu'n kyq'onte qa ichan, qatzun qya masch'i'n oxe' ons saqpwaq tu'n kyq'onte. 8Qatzun prowxi'xju' xjal ex lay b'ant tchjet tu'n kse'nxju' q'ma'ntl, kxel iq'et twitzju' pale tu'ntzun tmante jte' tu'n tq'onte kse'nxju' tu'me'l tu'n.
9Aye'tzu'n alu'mj b'a'n tu'n kytzaj kyq'o'ne' weye', tkyaqil alu'mj che ktzajel kyq'o'ne' weye' kche xjansetel, 10ex lay ch'exb'et tuk'i'l juntl alu'mj, maskye tb'anilxi'x mujqa taq'wix. Qatzun makych'exb'eye', kxjansetelju' alu'mj oje q'onjtz tuk'i'lxi'ju' alu'mj in q'onjtz te t-xel.
11Qatzun jun alu'mj tz'il myab'a'n tu'n ttzaj kyq'o'ne' weye', ati tu'n t-xi' iq'etju' alu'mj te' pale 12tu'n tmante jte' twi', kse'nx tka'yinkju' alu'mj qa tb'anil mujqa mya. Atzunju' tajlal matmaju' pale, atzun twi'ju', 13qatzun kyajb'ile' tu'n tkolpetju' alu'mj, ati tu'n kyq'onteye' tjwe'yi'n tnejtlju' o'nb'il tib'aju' twi' maq'manjtz.
14Qa ati jun matzaj tq'o'n tja tu'n t-xjanset weye', aju' pale kq'malte jte' twi'ju' ja kse'nxju' b'inchb'ente. Aju' tajlal ktma' pale, atzun twi'ju'. 15Qatzun tajb'ilju' saj q'onte tu'n tkolpetl tu'n, ati tu'n tq'onte jun tjwe'yi'n tnejtlju' o'nb'il tib'aju' twi' ojetoq q'manjtz, kyjeltzun jumajtltz te tja.
16Qa ati jun matzaj tq'o'n jun piẍ tx'otx' ti'ju' tetzb'il tu'n t-xjanset weye', kximetel twi'ju' tx'otx' kse'nxju' tawal intq'o'n, nik'jan lib'r saqpwaq tu'n junjun kyintal seb'ad njaw twitz. 17Qama t-xjansaju' ttx'otx' weye' tojxju' ab'q'i te tzaqpib'l, ax twi'ju' kjelten kse'nxju' q'ma'ntl; 18qatzun mat-xjansa tik'lenxi'ju' ab'q'i te tzaqpib'l, kxel t-xima'n pale tajlalju' saqpwaq tu'n tq'onte, k'elel iq'et ti'ju' twi' q'ma'ntl kse'nxju' jte' ab'q'itl tu'n tponju' ab'q'i te tzaqpib'l.
19Qatzun tajb'ilju' xxjansanteju' tx'otx' tu'n tkolpetl tu'n, ati tu'n tq'onte jun tjwe'yi'n tnejtl tib'aju' twi' xima'n, kyjeltzun tx'otx'tz te; 20qatzun min xkolpet tu'n, exqa matxi k'ayetju' tx'otx' te juntl xjal, laytzun b'ent tkolpetltz tu'n. 21Ajtzun ttzaqpetju' tx'otx' toju' ab'q'i te tzaqpib'l, kjelten xjansa'n weye' ex kttzyu' pale te kyetzb'il.
22Qa ati jun matzaj tq'o'n jun tx'otx' tu'n t-xjanset weye' loq'oj tu'n, mya ti'ju' tetzb'il kyxolju' toj tja, 23kxel t-xima'n pale twi' tuk'i'lju' xjal lu tzmajx ajtul kanunju' ab'q'i te tzaqpib'l, textzu'n q'ij lu ktchja' xjal lu kse'nx twi' tx'otx' xb'aj ximet, kt-xjansa'tzuntz weye'. 24Tojtzunju' ab'q'i te tzaqpib'l, k'anjelti'ju' tx'otx' lu teju' k'ayinte, aju' tajawku'xi'x.
25Tkyaqilju' twi' kxel t-xima'na kse'nxju' pwaq in ajb'en toju' ja xjan, ch'inxmi tz'aqla' nik'jan ons talal.
26Aye'tzu'n tnejel kyal alu'mj, weqe'ye' tu'n tpaju' tnejelqe', mix-a'lokye kxjansalkye. B'a'ntzun qpoj tman wakx mujqa qpoj tman rit, weqe'ye'. 27Qatzun jun alu'mj tz'il, b'a'n tu'n tkolpet kse'nxju' twi' kxel ximet tuk'i'l jun tjwe'yi'n tnejtl tib'aju' twi'. Qatzun min xkolpet, b'a'n tu'n t-xi' k'ayet kse'nxju' twi' xima'ntl.
28Qa ati jun matzaj tq'o'n jni'ju' ati te tu'n t-xjanset weye', b'a'ntzun xjal, alu'mj mujqa tx'otx' ti'ju' tetzb'il kyxolju' toj tja, mixti'x jun tu'n tk'ayet ex tu'n tkolpet; tkyaqilju' ktzajel tq'o'n che kyjelten xjanxi'x tu'n kyajb'en weye'. 29Ex Lay b'ant tkolpet jun xjal b'entnitlti'j tu'n tkyim: ati tu'n tkyim.
30Aju' tlajoji'n tnej kyeju' kwitz tawalju' tx'otx' injaw, triy ex kywitz tze, weye' ex xjansa'nqe' weye'. 31Qa ati jun tajb'il tu'n tkolpinte jni' ti'ju' tlajoji'n tnej lu, ati tu'n tchjonte jte' twi' tuk'i'l jun tjwe'yi'n tnejtl.
32Jun ti'j lajojchaq alu'mj, wakx mujqa rit, ktzajel kyq'o'ne' weye' te tlajoji'n tnej, 33mixti' tu'n kyjaw sk'etju' tb'anil exju' toq'wixqe', ex lay ch'exb'et jun tu'n juntl. Qatzun mab'aj jun ch'exb'eb'l, kykab'ilju' alu'mj kche kyjelten xjan, aju' tnejel exju' kyjel te t-xel, qu'mtzun lay tz'anjtl kyi'j teju' xkub' q'onkye, chi Qman Dyos.
34Aye'tzun chaq'b'ilju' tzaj tma'n Qman Dyos te Moyses twi' witz Sinayi tu'n t-xitma'n kye aj Israel.
Currently Selected:
Lv 27: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999