Jer 50
50
Kb'elti'j nintnam B'ab'ilon
1A tqanil ja'lu tma Qman Dyos te Jeremiy ti'j B'ab'ilon kytanam kaldey:
2Kymanx tqanil jaye'lu, kymane' kye nimaqtnam.
Kyq'onktze' techlalju' tqanil, lan kub' kyewa'ne'.
Kymanxe': ¡Matzyetju' tnam B'ab'ilon!
¡Mixti'tlte xb'ent tu'n dyos B'el,
mab'aj xob'ju' dyos Marduk!
¡Mixti'tlte xb'ent kyu'n kywitzleb'
ex ma'xi'x b'je'l kych'ixaw!
3Qu'n matxi' tzaj lq'e jun nintnam ti'j toj tb'anq'ob'kya'j
kjel tq'o'n tnam lu chq'ajlajtl.
Mixti'tlte xjal ex alu'mj knajal toj,
kykyaqil che kxel oq, chi Dyos.
K'anjetztl kyi'j aj Israel
4A ntma'n Qman Dyos ja'lu:
Tojtzu'n tq'ijlalil lu, che ulju' aj Israel ex aj Juda nche oq' jyolweye' ayine' Dyos Manb'aj, nche ajb'en weye'. 5Che xjelul ti'ju' tb'eyil Syon, ex che kxe'ltzuntz, kkyma'n: Qo'qe' tk'etz Qman Dyos, ex qolpex ti'j tuk'i'l jun qyol kjel b'entti'j tejumajx, mixti' tu'n tik' tna'l, chechiku'.
6Ikytoq ntanamju'ye' kse'nqe' rit tzpetniqe', myab'a'n iq'b'enkye kyu'n k'ik'lel kye, eb'ajkyaj kytzpet-sa'n toj k'ul. Inche'x twi' jun witz ex nche'xtl twi' juntl witz, ex majx ik'tna'ju' kych'lajil kyu'n. 7Inche'x ch'yo'n kyu'n kyajq'oj ajkyelyal kywitz ex nkyma'ntzuntz: Mya qpajqe', qu'n eb'inchan kye'lu il twitz Qman Dyos, ju' k'a'chalkye, ja oka' qe kyk'u'ju' ojtxi' kyyajilb'en, chechij.
8¡Kukyoqe' te B'ab'ilon, kytanam kaldey!
¡Kukyetze' nejlqe'ye' kywitzju' rit!
9Knb'incha'we' tu'n kyok tzaqpaj
jun b'yoj tnam nim kyipumal te tb'a'nq'ob'kya'j
junx kmoj q'ojil ti'j B'ab'ilon.
Kxel kytxoli'n kyib' ex kb'elti'j kyu'n.
Nimaq q'ojil qexi'x,
b'a'nxi'x che nik'un ajt-xi kyxon tal kysmaj.
10Kb'ajxelkyiq'i'nju' ati kye kaldey,
kxe'l kyiq'i'n tkyaqilju' maponkyk'u'j ti'j.
Ayine' Dyos Manb'aj nchin yolin.
Tej tkub'ti'ju' tnam B'ab'ilon.
11E'kaldey, b'je'l kyiq'i'ne' ati kye ntaname',
¡Che tzalajxe', che xlik'punqe'ye'
kse'n jun qpoj ttxu wakx toj cha'x k'ul!
¡Che t'iqchaje' kse'nqe' b'anchej!
12Atzunte' kynajb'ile' ex ninkytaname' ja itz'jna'qe'ye'
majx k'elel tch'ixaw.
Kjel te mankb'il kyxol nimaqtnam,
kjel kolb'e'n chq'ajlajtl ex tzqij.
13Qu'n ktzajel ntx'u'jile' ti'j ex kjel nq'o'ne' mixti'tl najalte,
Majx kjel chq'ajlaltl.
Kykyaqilju' che ik'el atzu' che jawil sak'puj
ajkyka'yinte tz'e'ysb'il twitz matxitoq tzaj.
14¡Kynk'unx kyib'e' smajil, kyi'jile aj B'ab'ilon!
¡Kyxonxe' tkyaqilju' tal kysmaje' kyi'j,
qu'n mache b'inchan il nwitze', ayine' Dyos Manb'aj!
15¡Kyẍch'inktze' q'oj kuw toj tkyaqil plaj!
¡Matxi' taq'tib' B'ab'ilon!
¡Mache kub' tz'aqu' ja nimaq kywe', mache kub'tilju' nimaqtapi!
¡A tu'me'l t-xelju' wu'ne': kyq'ome' tu'me'l t-xel kye!
¡Kyb'inchame' kye kse'nxju' kyb'incha!
16Mix-a'lo'tlte kjel kyq'o'ne' toj B'ab'ilon tu'nwt tawan mo tu'nwt tjaw tb'u'yi'n twitz awal.
K'anjelkyi'ju' najchaq xjal toj kytanam
aj kylonte q'oj kuw nxi'x xitun,
teyle junjun kxel oq toj ttanam.
K'anjetz kyi'j aj Israel
17Ikyqe' aj Israel kse'n rit tzpetni, xla'ja'n kyu'n b'alun. Tnejel xxiwan tu'n nimaqkawil aj Asirya; yajxi'tl tu'n Nab'ukodonosor nimaqkawil aj B'ab'ilon, majx b'aj ttoqi'n tb'aqil. 18Qu'mtzun in nma'ne', ayine' Dyos Manb'aj nimwipumale'. Kb'el ntz'e'ysa'ne' twitzju' nimaqkawil aj B'ab'ilon tuk'i'lju' ttanam, kse'n nb'inchaye' ti'ju' nimaqkawil aj Asirya. 19Knb'incha'ye' tu'n tanjtzkyi'j aj Israel toju' kytx'otx', ex tu'n tten kywa kse'nqe' rit nim kywa toj Karmelo, B'asan, kywi' witz te Eprayin ex Kalaad. 20Ayine' Dyos Manb'aj nchin yolin. Tojtzu'n tq'ijlalil lu che tenb'el aj Israel tzaqpi'n te il, qu'n kb'el nnajsa'ne' kyilju' che kjel anq'in wu'ne'.
Kb'elti'ju' tnam B'ab'ilon
21¡Che q'ojinqe'ye' ti'ju' tx'otx' Merataym
ex kyi'ju' najlqe' Pekod!
¡Kykna'qe'ke' ex che kyb'yonqeku'ye' jumajx!
¡Kyb'inchanqe'xe' nchaq'b'ile' tkyaqil!
Ayine' Dyos Manb'aj nchin q'mante.
22Inxi'x q'ajti q'oj toj tkyaqilju' tx'otx',
tuk'i'l jun nin xitb'il.
23¡Matxi' kub' yuchju' B'ab'ilon tx'nolkye kykyaqil tnam,
naq tb'uchub'tl xkyajten!
¡Taq'wixi'x k'elela' kye nimaqtnam
ajkyka'yinteju' mab'aj ti'j B'ab'ilon!
24Axta tnam B'ab'ilon xkub' q'onte jun xpatxab' teya,
ex min xitka'yi'na xkub' tz'aqa toj.
Makyej jupliya, makyej jitz'liya,
qu'n maq'ojina wi'je' ayine' Dyos Manb'aj.
25Majaw njqo'ne' k'ub'l nq'ojb'ile', ayine' Dyos Manb'aj,
ex mache b'jatz wiq'i'ne' q'ojb'il tu'n nq'oje,
qu'n ayine' nimwipumale',
ati tu'n nb'inchanteye' jun waq'une'
toju' kytanam kaldey.
26¡Che q'ojinqe'ye' ti'j toj tkyaqil plaj!
¡Kyjqomqe'ye' kyk'uja!
¡Kyb'uyinqeme' xjal ex che kyb'yonqeku'ye'!
¡Lalun kyej anq'in juntl kyu'ne'!
27¡Kyb'yonqeku'ye' kykyaqilju' kyxjal te q'oj,
che kyq'onqe'xe' toj b'iyb'il!
¡Malayqe'xwit! ¡Matxi' pon q'ij kye,
matxi' che q'nax tu'n ttz'e'yset kywitz!
28(Mache ponju' ẍetzaqpaj B'ab'ilon toj Syon, nkyma'n se'n tu'me'l xtaq'a' Qman Dyos tz'e'ysb'il kywitz aj B'ab'ilon tu'n tpaju' kyb'incha ti'ju' tja Dyos).
29¡Che kytxkonqe'tze' kykyaqil smajil,
tu'n kyq'ojin kyi'ju' aj B'ab'ilon!
¡Che tenku'ye' ti'jileju' nintnam
tu'ntzun mix-a'lo' jun ktzaqpajel!
¡Che kyb'yonqeku'ye' toj kyil!
¡Kyb'inchanke' kyi'j kse'nxju' kyb'incha!
Qu'n pi'sqe' weye',
ayine' Dyos Manb'aj xjan, nche ajb'en aj Israel weye'.
30Qu'mtzun che kyimelju' kyku'xun kyoj b'e
ex che kyimel kykyaqilju' kyq'ojil toju' q'ij lu.
Ayine' Dyos Manb'aj nchin yolin, chi Dyos.
31Intma'n Qman Dyos kjalu:
Pi's nintnam, nchin q'ojine' ti'ja,
matxi' pon q'ij teya, matxi' q'naxa tu'n ttz'e'yset twitza.
32Ktokpajel tqana pi's nintnam ex kjawil tz'aqa,
ex mix-a'lo' kjawil wab'anteya.
K'okyel nq'o'ne' kyq'aq'al kykyaqil nimaqttanama,
ex kb'ajel tkyaqilju' ti'jileya tu'n q'aq' lu, chij.
33Intma'n Qman Dyos kjalu:
Inche yajti tnam aj Israel ex aj Juda toju' jitz'b'il. Jpu'nqe' ex min nche tzaqpinjtz kyu'n kyajq'oj. 34Atzunte' tzaqpilkye kuw ex a tb'iju' Qman Dyos nimtipumal. A kb'inchalte tnik'alilti'j, tzultq'o'n nak'b'il toju' tx'otx' ex xob'ajil kye aj B'ab'ilon, chij.
35Chi Qman Dyos kjalu:
¡Tzul q'oj ti'ju' tnam B'ab'ilon ex kyi'ju' najlqe' toj!
¡Kyi'ju' nejenel ex kyi'ju' ati kynab'l toj!
36¡Tzul q'oj kyi'ju' ajnab'lil toj: ju' nok toj kywitz!
37¡Tzul q'oj kyi'ju' kyxjal te q'oj: che lu'lul tu'n xob'el!
¡Tzul q'oj kyi'ju' kychej ex kykarwaj!
¡Tzul q'oj kyi'ju' xjal te q'oj chjo'nqe' tu'n:
che okyel naku'j qya!
¡Tzul q'oj kyi'ju' kyk'uwen: che b'ajxku' alq'a'nj!
38¡Tzul q'oj kyi'ju' nin a' toj: che'xku' tzqij!
Qu'n twi' witzleb'il taq'wixi'xte' nintnam B'ab'ilon,
tu'ntzu'n xkub'a' xitj tnab'l.
39Qu'mtzun kb'ajel kyb'incha'n twiẍ k'ul ex xo'j kyja toj B'ab'ilon, ex che najal toj k'ul pich' toj. Layx che najan jumajtl xjal yajxi'tl toj. 40Kjel kse'nqe' tnam Sodom ex Komor, exqe' nimaqtnam nqaku' kyk'etz, tej kykub' xitj. Mix-a'lo'tl knajal toj, tk'i'xpe'wt naq jte' q'ij. Ayine' Dyos Manb'aj nchin yolin.
41Ntb'incha'ntib' jun nintnam nimtipumal
tzmajx toju' tx'otx' te tb'a'nq'ob'kya'j kyuk'i'l txqan nimaqkawil,
tu'n kytzaj q'ojil
42Q'i'nile kysmaj ex kych'ut;
mya'lqe', mixti'x nlaq kyk'u'j,
iky toj kywi'ju' ajkyẍch'in kse'n tq'ojq'ojil ninnjab',
ex kyi'j chej nche b'eta'.
B'incha'ntl kyten tu'n kyq'ojin ti'j B'ab'ilon.
43Atzu'n nimaqkawil aj B'ab'ilon,
majx kub' sq'anax tej tb'inteju' tqanil lu,
inxi'x b'aj tu'n b'is ex k'ixk'oj
kse'n qya ajtitz'ji tal.
44Naq myanim ajntzaje' kse'n b'alun netz kyoj k'ul ttzi nin a' Jordan, nxi'tzuntz jata' k'ik'leb' cha'x, ex knb'incha'ye' tu'n kyb'aj oqju' aj B'ab'ilon, ex knb'incha'ye' tu'n tkawinju' kjawil nsk'o'ne'. ¿Alkye kpomel kse'nwe'? ¿Alkye jun k'ik'lel kb'antel tq'ojin wuk'i'le'? 45Kyb'intze' nxime' matxi' b'ajnk'et kyi'j aj B'ab'ilon, ayine' Dyos Manb'aj, aju' aq'untl matxi' b'antten wu'ne' ti'j kytnanam kaldey: Okpe' che b'ajex q'i'n qpoj tman rit b'o'sqe', ex che b'ajel xitu'n b'us. 46Okxi'x q'ajtel B'ab'ilon ajtkub'ti'j, majx kyokchel tx'otx', ex kb'injtzel tq'ojq'ojel kywi' xjal kyoju' txqantl nimaqtnam ajkyẍch'in, chi Dyos.
Currently Selected:
Jer 50: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999