Jer 49
49
Tpakb'al kyi'j aj Amon
1A tqanil ja'lu tu'n Qman Dyos ti'j Amon:
¿Ja ta'qe' kyk'wal aj Israel?
¿Ja ta'qe' etzalkye ti'xti' kye?
¿Tiqu'ntzun atlju' dyos Milkom tajaw Kad?
¿Tiqu'ntzun najliqe' aj Amon kyoju' nimaqkytnam?
2Ja'lotzun, ayine' Dyos Manb'aj nchin yolin:
Kpomel q'ij, knb'incha'ye'
tu'n t-xikyb'i'n aj Amon najlqe' toj nintnam Rab'a
nche ẍch'in ajq'oj ajkyul q'ojil kyi'j;
majx kjel xitju' nintnam,
che b'ajelju' tnam ti'jile tu'n q'aq'.
Che kanb'eteltzun jumajtl nimaqkytanam aj Israel.
Ayine' Dyos Manb'aj nchin yolin.
3¡Che oq'e' aj Esb'on, matxi kub' xitu'n tnam Ay!
¡Che oq'e' qya aj Rab'a!
¡Kyq'onk kyi'je' te b'is, kyjumam ttzikyk'u'je'!
¡Che ojqelanqe'ye' naku'j okni toj kywi'ye', kyk'ixb'sam kyib'e'!
qu'n kxel q'i'n dyos Milkom toj juntl tnam,
kyuk'i'lxi' pale nche ajb'en te exqe' xjal nimaq kyoklen.
4¿Tiqu'ntzun nkynima'n kyib'e' ti'ju' kyipumale'?
Xi'na' tb'aj kyipumale', pi's tnam,
ju' q'uqlok kyk'u'je' ti'ju' txqan q'inumal b'aj kychmo'ne'
ex nkytma'ne': ¿Alxi'xkye tzul q'ojil wi'je'? chechije'.
5Ja'lotzun ktzajel nq'o'n xob'ajil kyi'je' toj tkyaqil plaj.
Ayine' Dyos Manb'aj nimwipumale' nchin yolin.
Teyle junjunkye' k'elex oq tjunal,
ex mix-a'lo'tl kb'uyilkye.
6Yajxi'tzuntl knch'exb'eye' kyanq'ib'l aj Amon.
Ayine' Dyos Manb'aj nchin yolin, chi Dyos.
Tpakb'al kyi'j aj Edom
7A tqanil ja'lu tu'n Qman Dyos ti'ju' tnam Edom kjalu:
¿Ma mixti'tl nab'l toju' tnam Teman?
¿Ma mixti'tl tu'me'l kyu'n k'atzkywi'?
¿Ma naq xkub'naju' kynab'l?
8¡Kukyetze' ojqel nalqe'ye' Dedan,
kukyxi'ye' ewal!
Qu'n kb'el nxitu'ne' tnam Esawu,
matxi' pon q'ij te tu'n tkub' ntz'e'ysa'ne' twitz.
9Ajtjaw b'uyit twitz awal
nkyajq'et junjun txkyij,
ajtzun kypon eleq' qonik'an,
o'kx nxikyiq'i'nju' nojqelan kye.
10Ayintzunwe' majx mache kub' nnajsa'ne' najlqe' Esawu,
mab'jo'kyal wu'ne' ja e'wa'na'kyib'
ex lay b'ent kyewantl.
Kykyaqil ẍeb'ajkub'xitj,
e'kyk'wal, kywitze'l exqe' ate' nqayin kyk'etz,
mix-a'lo'tlte xkyaj tu'n tmante:
11Q'onqe'kja tk'wala ẍekyaj meb'a, che kxelnka'yi'we'.
B'a'n kytenju' qya kyimni kychmil nk'etze', chij.
12Intma'n Qman Dyos kjalu:
Mana' tz'e'yset kywitzju' mixtoqti' tu'n ttz'e'yset kywitz, ex ikxkye' ati tu'n ttz'e'yset kywitze'. 13Axxi'x kxe'l nma'ne' ayine' Dyos Manb'aj: kyjel chq'ajlajixte' nintnam B'osra, kjel xitj te yek'b'il qanb'en taq'wix ex me'sa'n, ex che kjel xitju' txqantl nimaqtnam tejumajx, chi Dyos.
14Ultq'on Qman Dyos jun tqanil weye',
ul jun t-sanjel Dyos q'malte kye nimaqtnam kjalu:
¡Kyb'uyim kyib'e' ex kukyxi'ye' q'ojil ti'j Edom!
¡Kyb'incham kyib'e' tu'n kyxi'ye' q'ojil!
15Che okyel nq'o'ne' aj Edom b'o'sxi'x kyolju' tnam,
che elel ik'o'nxi'xe' kyxol xjal.
16Mache sb'ete' tu'nju' nkynima'n kyib'e',
qu'n inxi'x che xob'tzane' kye txqantl tnam.
Najlqe'ye' toj tpa'xil pik,
tzmajx te'qe'kxa'ye' kywi'witz.
B'a'nqa tzmajx tokxa' kyjaye' jawl kse'n t'iw,
tzmajxtzuntzu' che tzajela' tz'aqe' wu'ne'.
Ayine' Dyos Manb'aj nchin yolin.
17Nimxi'xju' xitb'il tzul ti'ju' tnam Edom ex xob'ajilx, kykyaqilju' che ik'el tk'etz che jawil sak'puj ajtok kykya'yi'n tz'e'ysb'il twitz, 18ikyk'okyela' kse'n tej kykub' xitju' tnam Sodom ex Komor exqe' nimaqtnam ate'toq nqayin kyk'etz. Mix-a'lo'tlte knajal toj, tk'i'xpe'wt jun xjal tu'n tten jte' q'ij. Ayine' Dyos Manb'aj nchin q'mante. 19Naqx myanim ajwule', kse'n jun b'alun ajtetz toju' k'ul ttzi a' Jordan, ntzaj ojqelantzuntz jata' cha'x k'ul k'ik'leb'l, knb'incha'tzuntze' tu'n kyb'aj oq aj Edom, ex tu'n tkawinju' xjal kjawil nsk'o'ne'. ¿Alxi'xkye jun kse'n ayine'? ¿Alxi'xkye kq'ojil wuk'i'le'? ¿Alkye jun k'ik'lel kmqol weye'? 20Kyb'intze' nxime' matxi' b'entten ti'j Edom, ayine' Dyos Manb'aj, aju' aq'untl matxi' b'aj nnk'u'ne' kyi'ju' najlqe' Teman, expe' che kxelq'i'n qpoj tman rit, ex tb'anil k'ul che b'ajel qutxet. 21Okxi'x q'ajtel ajtkub'kyi'j aj Edom, kyokchelju' tx'otx', kche ẍch'il kuw nche qanin o'nb'il, ex kpomel tq'ojq'ojel kywi' tzmajx ttzi ninnjab' kyeq tb'i. 22Kpomel tzaqpaju' ajq'oj ti'j B'osra kse'n jun t'iw lik'u'nqe' t-xik', ex che lu'lulju' aj Edom te q'oj naku'j qya ajtitz'ji tal toju' q'ij lu.
Tpakb'alil ti'j Damask
23A tqanil ja'lu tu'n Qman Dyos ti'j Damask:
Mache kub'ch'ixwi xjal najlqe' kyoju' nimaqtnam Amat ex Arpad,
qu'n mache pon tqanil myab'a'n kye.
Inxi'x che xob', layx b'entkyten toj nak'b'il.
24Mixti'tl kyipumal aj Damask, nkub' kyma'n tu'n kyik' oq.
Mache kub'numj tu'n xob'el, b'is ex k'ixk'oj,
naku'j jun qya ajtitz'ji tal.
25Matxi' kyej kolb'e'n nintnam
tb'anilxi'xtoq ex tzalajb'iltoq ta'.
26Che kjel woqonje kyku'xun toj b'e toju' q'ij lu,
ex che kyimel kykyaqil kyxjal te q'oj.
Ayine' Dyos Manb'aj nim wipumal nchin yolin.
27K'okyel nq'o'ne' kyq'aq'al nimaqtapi ti'j Damask,
ex che b'ajel tja nimaqkawil B'en-adad tu'n q'aq' lu.
Tpakb'al kyi'j Kyedar ex Asor
28A tqanil ja'lu tu'n Qman Dyos kyi'j tyajajil Kyedar ex kyi'ju' nejenel toj Asor, ju' kub'kyi'j tu'n Nab'ukodonosor, nimaqkawil aj B'ab'ilon:
¡Lwiqe'xe', che q'ojinqe'ye' kyi'j tyajajil Kyedar!
¡Kyxitunqeku'ye' tyajajil lu ate' toj tjawetzq'ij!
29Kyetzanqeku'ye' kyja ex kyalu'n,
e' kyxb'alun ex tkyaqilju' nche ajb'en kye.
Kyiq'inqemile' kykamey ex kyẍch'inxe' kye:
¡Ati xob'el toj tkyaqil plaj! chechiku'ye'.
30¡Kukyex oqe' najlqe'ye' toj Asor!
¡Kukyxi'ye' ewal!
Ayine' Dyos Manb'aj nchin q'mante.
Ati t-xim Nab'ukodonosor kyi'je',
ju' nimaqkawil aj B'ab'ilon.
31Nxinma'ne' kyeye', ayine' Dyos Manb'aj.
¡Wiqe'xe', che q'ojinqe'ye' ti'ju' tnam lu
q'uqlixi'x tk'u'j ex min nb'ajx tk'u'j,
mixti' tjpel ex mixti' jupb'ilte
ex tjunalxi'x ati!
32¡Kyalq'anqemile' kykamey ex kykyaqilju' kyalu'n!
Che b'ajxe'l nsputi'ne' xjal lu toj tkyaqil plaj
inxi'x b'aj kyjso'n kywi' ttx'u'k kyplaj,
ktzajel wiq'i'ne' xitb'il kyi'j toj tkyaqil plaj.
Ayine' Dyos Manb'aj nchin yolin.
33Kjelte' Asor tejumajx
te kynajb'il xo'j.
mix-a'lo'tlte knajal toj ex mix-a'lo'tl ktenb'el jte' q'ij toj, chi Dyos.
Tpakb'alil ti'j Elam
34Tej ttzyet tkawin Sedekyiy toj Juda, tzaj tma'n Qman Dyos tqanil te Jeremiy ti'ju' nintnam Elam ikjalu:
35Ayine' Dyos Manb'aj nimwipumale' nchin yolin:
Che b'ajel ntoqi'ne' kysmaj aj Elam,
aye' kyq'ojb'il nche ajb'enxi'x.
36Ktzajel nq'o'ne' kyq'iq' ti'ju' tnam lu
toj kykyajel plaj te kya'j,
tu'n kyb'ajx t-slamu'n toj tkyaqil plaj,
tu'ntzun mixti'tl tnam che kjel jatu'n kypona'tl kyxjal klolkyib'.
37Knb'incha'ye' tu'n kylu'lun aj Elam kye kyajq'oj che ul b'yolkye,
ktzajel nq'o'ne' jun xitb'ilkye,
ktzajel nb'ajsa'ne' nq'oje kyi'j,
tzajel nchq'o'ne' q'oj kyi'j majx tu'n kykub' xitj.
Ayine' Dyos Manb'aj nchin yolin.
38Kb'el nq'o'ne' nq'uqb'ile' te toju' tnam Elam,
ex che kb'el nb'yo'ne' kynimaqkawil ex kynejel.
Ayine' Dyos Manb'aj nchin yolin.
39Yajxi'tzuntl knch'exb'eye' kyanq'ib'l aj Elam.
Ayine' Dyos Manb'aj nchin yolin, chi Dyos.
Currently Selected:
Jer 49: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999