2 S 3
3
1Nimtoj tenju' q'oj kyxol toj tja Sawul kyuk'i'lju' toj tja Dab'i, xi'toqtzu'n tten kyipumalju' te Dab'i, aye'tzu'n te Sawul xi'toq kykub' b'aj.
Aye' toj tja Dab'i
(1 Cr 3.1-4)
2Aye' tk'wal Dab'i ja'lu e itz'ji tej atitoq toj Eb'ron: Amnon, tnejel k'wal, tal Aynoam aj Jesreel; 3atzu'n tkab', a Kyilab', tal Ab'ikayl, t-xu'jilb'en qtzan Nab'al, aj Karmel; toxi'n Ab'salon, tal Maaka, ju' tmyal Talmay, nimaqkawil te Kyesur; 4tkyaji'n Adoniy, tal Awit; tjwe'yi'n Sepatiy, tal Ab'ital; 5twaqaqi'n Itream, tal Ewla, juntl t-xu'jil Dab'i. Kykyaqil ja'lu e'itz'ji tej atitoq Dab'i Eb'ron.
Taq'tib' Ab'ner tuk'i'l Dab'i
6Tetzunj intoq noktaq'lju' q'oj kyxol tyajajil Sawul kyuk'i'lju' tyajajil Dab'i, xi'toq ttenxi'x tipumal Ab'ner kyib'aju' tyajajil Sawul. 7Atitoqtzun jun tqya Sawul, Rispa tb'i, tal Aya. Xi'tzun tma'n Is-b'oset te Ab'ner:
—¿Tiqu'n xkub'a' kẍeya tuk'i'lju' tqya nma'ne'?, chij.
8Tzaj txqan ttx'u'jil Ab'ner tu'n tpaju' xitma'n Is-b'oset te, ex xittzaq'we'n te:
—¿Ma tx'yanqine' tu'n wajb'ene' kye aj Juda? Matxi' chin okye' b'a'n kyeju' toj tja Sawul, ju' tmana, kyuk'i'l twitze'l ex kyuk'i'lju' tamiw, expe' min xxi'nq'o'na toj tq'ob' Dab'i. ¿Atzunta ja'lo nchin tpoqo'na qama chin b'inchan ile' tuk'i'l jun qya?, chij. 9¡Ja'lotzun, tz'e'ysanjtzxwit nwitze' kuw tu'n Qman Dyos qa min xnb'inchaye' matxi' ttziya Qman Dyos te Dab'i, 10tu'n kyel wiq'i'nju'ye' tk'wal Sawul toju' kawb'il, tu'ntzun tkawin Dab'i toj Israel ex toj Juda, tzajx Dan twitz nqach toj tb'a'nq'ob'kya'j ponx B'eerseb'a twitz nqach toj tnayajkya'j!, chij te.
11Majx jpet ttzi Is-b'oset tu'n Ab'ner, qu'n intoq xob' te. 12Atzunte Ab'ner e'xitchq'o'n sanjelj q'malte te Dab'i kjalu: ¿Alqetzun kjela' tx'otx'? Qb'inchamti'j jun qyol: chin onile' tuk'i'la toj chukchaq tu'me'l tu'n tok tkyaqil Israel tjaq' tkawb'ila, chij xitma'n tq'umli.
13Atzunte Dab'i xittzaq'we'n: B'a'na'tzun qama kyej b'entti'j jun qyol, naq o'kx ati tu'n ttzaj tiq'i'na Mikal, ju' tmyal qtzan Sawul, ajtula nk'etze', chij. 14Expe' e'xitchq'o'n Dab'i jte' sanjelj q'malte te Is-b'oset: Q'ontzju'ya nxu'jile' Mikal, ju' inmejeye' tuk'i'l ex nchoje' tu'n jo'naq (100) ttxo'w kypich' pilistey, chij.
15Atzunte Is-b'oset tchaq' tu'n tel iq'i'n te Paltyel ju' tchmil, tk'wal Lays; 16atzunte Paltyel xi' lpe ti'j intoq oq', pon wab'alte toj B'awrim. Atzuntzu' xa' tma'na' Ab'ner te tu'n tanj, ex anjtzti'j Paltyel.
17Yajxi'tzuntel yolin Ab'ner kyuk'i'lju' tijwnaq kyxol aj Israel, ex xitma'n kye: Ojtxi'ku' nkyqani'ne' tu'n tok Dab'i te nimaqkawil. 18Matxi'tzun ponju' kmuj tu'n tok te nimaqkawil, qu'n oje ttziya Qman Dyos te, qa naqx tu'nel ktzaqpajela' nintnam Israel tjaq' kykawb'il pilistey ex toj kyq'ob' txqantl tajq'oj, chij kye.
19Ex ikx yolin Ab'ner kyuk'i'lju' tyajajil B'enjamin, tetzunj tb'aj yolin xi'tl toj Eb'ron q'malte te Dab'i titi' kyma aj Israel exqe' tyajajil B'enjamin. 20Pon kyuk'i'l junaq (20) xjal toj Eb'ron tk'etz Dab'i, atzunte Dab'i kub' tq'o'n jun ninwan te Ab'ner ex kyeju' tuk'i'l. 21Xi'tzun tma'n Ab'ner te Dab'i:
—Machinxe' ja'lo b'uyilkye aj Israel tu'n tkyajb'ent jun kyyol tuk'i'la, nimaqkawil, tu'ntzun tkawina kse'nxju' b'a'n toj twitza, chij.
Etztzun Dab'itz wab'alte Ab'ner, atzunte Ab'ner anj toj tzalajb'il.
Kub' tb'yo'n Joab' Ab'ner
22Tojtzunju' kmuj lu pon Joab' kyuk'i'lju' t-xjal Dab'i tzajniqe' toj q'oj, iq'i'n txqan ti'xti' kyu'n, aju' matxi'toq tz'elkyiq'i'n kye ajq'oj. Atzunte Ab'ner matxi'toq tz'etz tk'etz Dab'i toj Eb'ron, ex matxi'toq tz'anj toj tzalajb'il, tetzlenxi' tk'etz Dab'i. 23Tetzunj tpon Joab' kyuk'i'lju' xjal te q'oj, xijask'u'n te qa pon Ab'ner, tk'wal Ner, tk'etzju' nimaqkawil, exqa exwab'aj tu'n Dab'i. 24Xi'tzun Joab'tz tk'etzju' nimaqkawil, ex xitma'n te:
—¿Titi'tzu'n matxi' tb'inchaya, nimaqkawil? Matzul Ab'ner tk'etza, ex matz'anj ttzaqpi'ntla. 25¿Ma mixtzunti' b'i'n tu'na qa naq sul Ab'ner, tk'wal Ner, sb'ulteya, exqa naq sul ka'yilte titi' nb'aj tza'lu, ex tu'n tb'inte tkyaqilju' ntb'incha'na?, chij te.
26Naqtzun nb'aj yolin Joab' tuk'i'l Dab'i, e'xitchq'o'n jte' xjal knolteti'j Ab'ner, ewaj twitz Dab'i, ex anjtzti'j kyu'n tzmax ttzi xoch te Sira. 27Tetzunj tpon jumajtl Ab'ner kyu'n toj Eb'ron, xiq'i'n tu'n Joab' tk'etzu' tjpel nintnam, tu'n kyolin kykab'ilx, atzuntzu' kub'a' tb'yo'n, tu'n tpaj kub' tb'yo'n Asael ju' titz'in. 28Yajxi'tzuntl, tej tb'inte Dab'i, tma: Lu Qma Dyos nka'yin, qa myaqinwe' exju' ntaname' ati tpaj, tu'n xkyim Ab'ner, tk'wal Ner. 29¡Kub'xwit tz'aqju' tilil tib'aj Joab' ex kyib'aju' toj tja, kukxwit kyab'tiju' tu'n chk'oj, tx'a'k mujqa koxil, che kub'xwit b'yo'n ex tu'n tik'x we'yaj kyu'n!, chij.
30Kub' b'yo'n Ab'ner kyu'n Joab' tuk'i'l Ab'isay, qu'n kub' tb'yo'n Ab'ner kyitz'in toju' q'oj b'aj Kab'aon.
31Tchaq'tzun Dab'itz te Joab' ex kyeju' k'le'nqe'toq tu'n: Kyẍilunku'ye' kyi'je' ex kyq'onk kyi'je' jochin te b'is, ex kynimanku'ye' tkamik Ab'ner, chij. Xi' lpe Dab'i ti'ju' anmi, 32ex ku'x kymqu'n Ab'ner toj Eb'ron. Atzuntzu' kub'a' oq'a' nimaqkawil b'a'nxi'x tib'aju' muqb'il te Ab'ner, ex kykyaqilju' xjal ax kyb'inchaju'. 33Xi'tzun tb'itza'n nimaqkawil jun b'itz b'isb'ajil tu'n tkamik Ab'ner:
¿Se'n taq'wi xkyima Ab'ner,
mixya toj tu'me'l ja'lu,
34myana' xmo'n ta tq'ob'
ex min tokx tqana toj xpatx'k'uxb'il?
¡Mab'aja kse'n nkyima' jun xjal
toj kyq'ob' b'inchal taq'wixil!, chij.
Exqe' xjal inxi'xtoq che oq' ti'j. 35Exi'tzuntz kub'sal te Dab'i tu'n twan ch'i'n, na'mxku' texju' q'ij, atzunte Dab'i tma:
—¡Kub'xwit ttz'e'ysa'n Qman Dyos nwitze' kuw qama chin wan wab'je' mujqa juntl ti'xti' na'mxtoq tex q'ij!, chij.
36Kykyaqil kane toj kywitz ex b'a'n ela' kye, qu'n tkyaqilju' ntb'incha'n nimaqkawil intoq che tzalaju' xjal ti'j. 37Kane toj kywitz kykyaqil aj Israel toju' q'ij lu qa mixti'te' nimaqkawil toklen ti'ju' tkamik Ab'ner, tk'wal Ner.
38Xitma'ntzun nimaqkawiltz kyeju' nejenel kye t-xjal te q'oj:
—Kanli kywitze', matxi' kub' qojli jun nejenel nim toklen toj Israel, jun nimaqxjal. 39Tu'npetzu'n ayine' nimaqkawil sk'o'n tu'n Qman Dyos, machin kub' numje' tu'nju' b'yojxjali'n xkyb'inchaju' tk'wal Seruya. ¡Awt Qman Dyos q'onte tu'me'l t-xel teju' xb'inchante il lu!, chij.
Currently Selected:
2 S 3: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999