2 S 2
2
Ok Dab'i te nimaqkawil toj Juda
1Tb'ajlenxi'tzun ja'lu, xitqani'n Dab'i te Qman Dyos kjalu:
—¿Ma b'a'n tu'n nxi'ye' toj junju' nimaqtnam toj Juda?, chij.
Tzajtzun ttzaq'we'n Qman Dyos te:
—Ilti'j tu'n txi'ya, chij.
—¿Jatzun b'a'na' tu'n nxi'ye'?, chi Dab'i.
—Toj Eb'ron, chi Dyos.
2Xi'tzun Dab'itz atzu' kyuk'i'lju' kab'e' t-xu'jil: Aynoam, tzajni toj tnam Jesreel, ex Ab'ikayl, t-xu'jilb'en qtzan Nab'al aj Karmel. 3Ex eb'ajx tiq'i'nju' t-xjal tuk'i'l, kyuk'i'lju' toj kyja, e'kub' najantzuntz kyoj nimaqtnam Eb'ron. 4Yajxi'tzuntel eponju' xjal aj Juda atzu', ex okkyq'o'n Dab'i te nimaqkawil tib'aj Juda.
Tetzunj txi' q'ma'n te Dab'i qa aye' aj Jab'es toj Kalaad eku'x mqunte Sawul, 5e'xitchq'o'n Dab'i jte' xjal q'malte kye kjalu: Awt Qman Dyos k'i'wlankyeye', tu'nju' b'a'n xkyb'inchaye', ma ku'x kymqu'ne' Sawul ju' kyajawe'. 6B'a'nwt tb'incha Qman Dyos kyeye', ex japunxwitju' tyol. B'aywe' knq'a'we' tu'me'l t-xel kyeye' tu'nju' xkyb'inchaye'. 7Atzu'n ja'lo, kuwqe'xe' ex lalun che xob'e', maskye matxi' kyim Sawul ju' kyajawe', matxi' chin xjansanjtzwe' kyu'n tyajajil Juda te nimaqkawil, chij kye.
Q'oj kyxol aj Israel kyuk'i'l aj Juda
8Atzunte Ab'ner, tk'wal Ner, nejenel kye t-xjal Sawul te q'oj, tzaj ttxko'n Is-b'oset tk'wal Sawul, ex xitiq'i'n toj Maanaym, 9ex oktq'o'n toklen atzu' te nimaqkawil toj Kalaad, Kyesuri, Jesreel, Eprayin, B'enjamin ex kykyaqil aj Israel. 10Tetoq kab'naq (40) ab'q'i Is-b'oset tej ttzyet tkawin toj Israel, ex naq kab'e' ab'q'i kawin. Aye'tzunkye' tyajajil Juda nima'ntoq Dab'i kyu'n te kynimaqkawil, 11qu'mtzun wuq ab'q'i tk'i' nik'jan kawin Dab'i toj Juda ex atzu' tena' tkawb'il toj Eb'ron.
12Etztzun Ab'nertz toj Maanaym ex pon toj Kab'aon, nejli kywitzu' t-xjal Is-b'oset te q'oj. 13Ex ikxte Joab', tk'wal Seruya, etz toj Eb'ron kyuk'i'lju' t-xjal Dab'i te q'oj, ex kyk'ulkyib' kyuk'i'l tk'etzju' k'anb'il a' toj Kab'aon. Kykab'ilju' tnej xjal te q'oj e'kub'ten junjun toj junjun plaj teju' k'anb'il a'. 14Xi'tzun tma'n Ab'ner te Joab':
—Kukyexju' ku'xun q'ojil qwitz, chij.
—B'a'natzun, chi Joab' te.
15Qu'mtzun e ik' kab'lajoj (12) kyxolju' tyajajil B'enjamin ex t-xjal Is-b'oset ju' tk'wal Sawul tu'n kyq'ojin, ex e ik' kab'lajoj (12) kyxolju' t-xjal Dab'i te q'oj. 16Teyile junjun tzyetju' tajq'oj tu'n ti'j twi' ex okt-xyu'n tk'uẍtx'e'nb'il ttxa'n tchil, ex junx kykub'tz'aq kykyaqil kyimniqe'tl kyu'n. Qu'mtzun Elkat-asurim tb'iju' najb'il lu okq'o'n toj Kab'aon. 17Kuw oka'ju' q'oj toju' q'ij lu, kub'kyi'j Ab'ner kyuk'i'lju' aj Israel te q'oj kyu'nju' t-xjal Dab'i. 18Ate'toqju' oxe' tk'wal Seruya, aye': Joab', Ab'isay ex Asael. Kuwtoq tz'ojqelan Asael kse'n msat toj plan tx'otx', 19oktzinetzuntz knolteti'j Ab'ner tu'n mi tzaqpaja'. 20Tetzunj tanjtz ka'yin Ab'ner ti'jxi', tma:
—¡A pe'loya Asael!, chij.
—¡Ayinatzune'!, chi Asael.
21Xi'tzun tma'n Ab'ner te:
—Chin tq'onkja. Ate b'a'n tzyum junju'ya majen ex q'inkja tkyaqilju' iq'i'n tu'n, chij.
Atzunte Asael mixti'x kyej ttzaqpi'n, 22xitma'n jumajtl Ab'ner te:
—¡Chin tq'onkja, mujqa tajb'ila tu'n tkub' nb'yo'na! ¿ti'tzun kxe'l nma'ne' ajnpone' yek'ul wib'e' twitzju' ttzika Joab'?, chij te.
23Atzu'n txi' tka'yi'n Ab'ner rinchix Asael ti'j, ex tq'o'n tch'ut ti'jxi' ex okt-xyu'n ttzitk'u'j Asael ex majx jlajin ttze'lti'j, axtzuntzu' kub'a' tz'aq Asael ex majx kyim. Kykyaqiltzunju' ntoq che ik' ja kub'a' tz'aq Asael kyimnitl, intoq che kub' we' ka'yilte. 24Aye'tzunkye Joab' ex Ab'isay xikyljo'n tkanliti'j Ab'ner. Atzu' epona' toju' b'ya' Ama, ju' ati tk'etz Wiya, toj tb'eyil chq'ajlaj toj Kab'aon, tej tex q'ij. 25Atzuntzu' b'aja' kychmo'na' kyib' tyajajil B'enjamin tuk'i'l Ab'ner, ex b'aj kynk'u'nkyib' kykyaqilx tu'n kyq'ojin twi' jun witz. 26Xitzun t-ẍch'i'n Ab'nertz te Joab':
—¿Ma layxtzun b'aj ttxa'nju' b'yoj xjal? ¿Ma na'mx teltnik'a qa naq b'is kjel tq'o'n qe? ¿Jtojtzun txitma'na kye t-xjala tu'n lalun che q'ojintl kyi'ju' kyitz'in mo kytzik?, chij.
27Atzunte Joab' xittzaq'we'n:
—Axxi'x lu Qman Dyos nka'yin, naqwit mixti' saj tma'na lu weye', ma'wtlo che q'ojinju' nxjale' kyi'ju' kyitz'in mo kytzik tzmax ajqsqix, chij.
28Tchaq'tzun Joab'tz tu'n kyjaw q'ajtza'n chun, ex ju'm kywe'ju' t-xjal, min xikyljo'ntl tkanlikyi'j aj Israel ex min e'q'ojintl. 29Eb'et Ab'ner kyuk'i'lju' t-xjal te q'oj toju' plan tx'otx' te Arab'a toj tkyaqilu' qonik'an lu, xikytaqk'u'n kyb'e toju' nin a' Jordan ex toj B'itron, e'pontzuntz Maanaym.
30Mixti' xi'tl Joab' knolteti'j Ab'ner ex b'aj tb'u'yi'nju' t-xjal te q'oj, atzunj ttzyet t-ẍch'injtzu' kyb'i, elyal qa matxi'toq che b'aj b'eljlajoj (19) kynejel t-xjal Dab'i te q'oj ti'jxi'tl Asael. 31Aye'tzunkye' t-xjal Dab'i te q'oj, kub' kyb'yo'n wajxaqlajnaq (360) xjal kyxol tyajajil B'enjamin ex t-xjal Ab'ner.
32Tb'ajlenxi'tzun ja'lu, xiq'i'n t-xmilal Asael B'elen ex ku'x mqu'n atzu', ja mqu'na' tman. B'aj qonik'an kyu'n Joab' kyuk'i'lju' t-xjal te q'oj eb'et, ex atzu' espik'e'ya' Eb'ron.
Currently Selected:
2 S 2: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999