رِسَالَةْ تْسَالُونِيكِي التَّانِيَّة 3
3
الْفَصْلْ التَّالْتْ
صْلِّيوْ مْنْ جِهْتْنَا
1وْفْاللّْخْرْ آ الْخُوتْ، صْلِّيوْ مْنْ جِهْتْنَا، بَاشْ كْلَامْ الرَّبّْ يْوْصَلْ دْغْيَا، وْبَاشْ يْتّْعْطَى لِيهْ الْعَزّْ كِمَا تّْعْطَى لِيهْ عَنْدْكُمْ حْتَّى نْتُمَ، 2وْبَاشْ اللَّهْ يْعْتَقْنَا مْنْ النَّاسْ الْمْشْرَارِينْ وْالْقْبَاحْ. حِيتْ مَاشِي ݣَاعْ النَّاسْ مُومْنِينْ. 3وَلَكِنْ الرَّبّْ رَاهْ أَمِينْ، وْهُوَ اللِّي غَيْتَبّْتْكُمْ وْغَيْحْفَضْكُمْ مْنْ الشِّيطَانْ. 4وْعَنْدْنَا التِّقَة فْالرَّبّْ مْنْ جِهْتْكُمْ بْلِّي رَاكُمْ كَتْدِيرُو دَاكْشِّي اللِّي وْصِّينَاكُمْ بِيهْ وْغَتْبْقَاوْ تْدِيرُوهْ. 5وْالرَّبّْ يْهْدِيكُمْ بَاشْ تْبْغِيوْ اللَّهْ، وْبَاشْ يْكُونْ عَنْدْكُمْ الصّْبَرْ دْيَالْ الْمَسِيحْ.
خَاصّْ ݣَاعْ الْمَسِيحِيِّينْ يْدِّيوْهَا فْخْدَمْتْهُمْ
6وْنْوَصِّيكُمْ آ الْخُوتْ، فْإِسْمْ رَبّْنَا يَسُوعْ الْمَسِيحْ، بَاشْ تْبَعّْدُو عْلَى كُلّْ خُو مْعْݣَازْ، وْمَا كَيْدِيرْشْ بْدَاكْشِّي اللِّي تْعَلّْمُه مْنَّا. 7وْرَاكُمْ كَتْعَرْفُو مْزْيَانْ كِيفَاشْ خَاصّْكُمْ تْكُونُو بْحَالْنَا، عْلَاحْقَّاشْ مَا كْنَّاشْ مْعْݣَازِينْ مْلِّي كْنَّا مْعَاكُمْ، 8وْعَمّْرْنَا مَا عْشْنَا عْلَى حْسَابْ شِي حَدّْ، وَلَكِنْ كْنَّا كَنْخَدْمُو وْكَنْكَافْحُو لِيلْ وْنْهَارْ بَاشْ مَا نْتَقّْلُو عْلَى حْتَّى وَاحْدْ فِيكُمْ. 9مَاشِي حِيتْ مَا عَنْدْنَاشْ الْحَقّْ فْالْمُعَاوَنَة دْيَالْكُمْ، وَلَكِنْ حِيتْ بْغِينَا نْكُونُو مْتَالْ لِيكُمْ وْتْكُونُو بْحَالْنَا. 10حِيتْ حْتَّى مْلِّي كْنَّا عَنْدْكُمْ، وْصِّينَاكُمْ بْهَادْشِّي: «اللِّي مَا بْغَاشْ يْخْدَمْ، رَاهْ مَا خَاصُّوشْ يَاكُلْ». 11وْݣْلْنَا هَادْشِّي حِيتْ سْمَعْنَا بْلِّي شِي وْحْدِينْ مْنّْكُمْ مْعْݣَازِينْ وْمَا عَنْدْهُمْ حْتَّى خْدْمَة وْفْضُولِيِّينْ. 12بْحَالْ هَادْ النَّاسْ كَنْوَصِّيوْهُمْ وْكَنْرَغْبُوهُمْ فْالرَّبّْ يَسُوعْ الْمَسِيحْ بَاشْ يْدِّيوْهَا فْخْدَمْتْهُمْ، وْيَاكْلُو خُبْزْهُمْ بْعْرَقْ كْتَافْهُمْ. 13أَمَّا نْتُمَ آ الْخُوتْ، مَا تْعْيَاوْشْ مْنْ عَمَلْ الْخِيرْ. 14وْإِلَا مَا بْغَاشْ شِي وَاحْدْ يْدِيرْ بْكْلَامْنَا اللِّي فْهَادْ الرِّسَالَة، عْزْلُوهْ وْمَا تْبْقَاوْشْ تْتْعَامْلُو مْعَاهْ بَاشْ يْحْشَمْ، 15وْمَا تْحَسْبُوهْشْ بْحَالْ عْدُوكُمْ، وَلَكِنْ نَبّْهُوهْ بْحَالْ خُوكُمْ.
16وْكَنْطْلَبْ رَبّْ الْهْنَا بْنَفْسُه يْعْطِيكُمْ الْهْنَا عْلَى الدّْوَامْ كِمَا بْغَا يْكُونْ الْحَالْ. وْالرَّبّْ يْكُونْ مْعَاكُمْ كُلّْكُمْ.
17وْهَادَا سْلَامِي مْكْتُوبْ بْخَطّْ يْدِّي أَنَا بُولُسْ، وْهُوَ الْعَلَامَة بَاشْ تْمَيّْزُو الرَّسَائِلْ دْيَالِي. رَاهْ هَكَّا كَنْكْتَبْ. 18وْالنِّعْمَة دْيَالْ رَبّْنَا يَسُوعْ الْمَسِيحْ تْكُونْ مْعَاكُمْ كُلّْكُمْ.
Currently Selected:
رِسَالَةْ تْسَالُونِيكِي التَّانِيَّة 3: MSTD
Highlight
Share
Copy
Want to have your highlights saved across all your devices? Sign up or sign in
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved