رِسَالَةْ تْسَالُونِيكِي التَّانِيَّة 2
2
الْفَصْلْ التَّانِي
آشْ غَيْجْرَا قْبَلْ رْجُوعْ الْمَسِيحْ؟
1آ الْخُوتْ، رَاهْ رَبّْنَا يَسُوعْ الْمَسِيحْ غَيْرْجَعْ وْغَنْتّْجَمْعُو مْعَاهْ. وْعْلَى هَادْشِّي، كَنْطْلَبْ مْنّْكُمْ#1تسالونيكي 4:15-17 2بَاشْ مَا تّْزَعْزْعُوشْ فْأَفْكَارْكُمْ دْغْيَا، وْمَا تّْخَلْعُوشْ بْشِي رُوحْ، وْلَا بْشِي كْلَامْ آخُرْ، وْلَا بْشِي رِسَالَة تّْݣَالْ لِيكُمْ بْلِّي هِيَ مْنْ عَنْدْنَا، وَاخَّا يْخَلِّيكُمْ هَادْشِّي تْضَنُّو بْلِّي نْهَارْ الرَّبّْ وْصَلْ. 3مَا تْخَلِّيوْ حْتَّى وَاحْدْ يْخْدَعْكُمْ بْشِي طَرِيقَة كِمَا بْغَاتْ تْكُونْ، حِيتْ قْبَلْ مَا يْوْصَلْ دَاكْ النّْهَارْ لَابْدّْ مَا يْبَانْ الْكُفْرْ فْاللّْوّْلْ، وْبْنَادْمْ الْمْشْرَارْ اللِّي غَيْتّْهْلَكْ فْجَهْنَّمْ، 4هَادَاكْ اللِّي غَيْضَادّْ وْيْدِيرْ رَاسُه فُوقْ ݣَاعْ دَاكْشِّي اللِّي كَيْحَسْبُوهْ النَّاسْ إِلَاهْ وْكَيْعَبْدُوهْ، لْدَرَجْةْ غَيْݣْلَسْ فْبِيتْ اللَّهْ وْغَيْݣُولْ بْلِّي هُوَ اللَّهْ وْغَيْدِيرْ رَاسُه حْسَنْ مْنُّه. 5وَاشْ مَا كَتّْفَكّْرُوشْ بْلِّي ݣْلْتْ لِيكُمْ هَادْشِّي مْلِّي كْنْتْ عَنْدْكُمْ؟ 6وْدَابَا رَاكُمْ عَارْفِينْ أَشْنُو كَيْحَبْسُه بَاشْ مَا يْبَانْشْ، حْتَّى يْوْصَلْ الْوَقْتْ دْيَالُه. 7حِيتْ السِّرّْ دْيَالْ الشَّرّْ رَاهْ كَيْخْدَمْ دَابَا، حْتَّى يْتّْحَيّْدْ هَادَاكْ اللِّي كَيْحَبْسُه، 8وْدِيكْ السَّاعَة غَيْبَانْ الْمْشْرَارْ، اللِّي غَيْفْنِيهْ الرَّبّْ يَسُوعْ بْنَفْخَة مْنْ فُمُّه، وْغَيْغَبّْرْ لِيهْ لَاتَرْ بْالْقُوَّة دْ الرّْجُوعْ دْيَالُه. 9الْمْجِي دْيَالْ الْمْشْرَارْ غَيْكُونْ بْالْقُوَّة دْ الشِّيطَانْ، وْغَيْدِيرْ ݣَاعْ الْمُعْجِزَاتْ وْالْعَلَامَاتْ وْالْعْجَايْبْ اللِّي فِيهُمْ الْخْدِيعَة،#متى 24:24 10وْݣَاعْ نْوَاعْ الشَّرّْ، اللِّي بِيهْ غَيْخْدَعْ هَادُوكْ اللِّي غَيْتّْهَلْكُو، عْلَاحْقَّاشْ مَا قْبْلُوشْ مْحَبَّةْ الْحَقّْ بَاشْ يْنْجَاوْ. 11وْعْلَى هَادْشِّي كَيْصِيفْطْ لِيهُمْ اللَّهْ اللِّي يْغَلّْطْهُمْ بَاشْ يْآمْنُو بْالْكْدُوبْ، 12وْهَكَّا غَيْتّْعَاقْبُو ݣَاعْ اللِّي مَا آمْنُوشْ بْالْحَقّْ، وَلَكِنْ فْرْحُو بْالدّْنُوبْ.
اللَّهْ خْتَارْكُمْ بَاشْ تْنْجَاوْ
13وَلَكِنْ حْنَا آ الْخُوتْ الْعْزَازْ عْلَى الرَّبّْ، رَاهْ وَاجْبْ عْلِينَا نْشَكْرُو اللَّهْ دِيمَا عْلَى وْدّْكُمْ، عْلَاحْقَّاشْ اللَّهْ خْتَارْكُمْ مْنْ الْبْدُو بَاشْ تْنْجَاوْ بْالتّْقْدِيسْ دْيَالْ الرُّوحْ الْقُدُسْ، وْبْالْإِيمَانْ دْيَالْكُمْ بْالْحَقّْ. 14وْعْلَى هَادْشِّي عَيّْطْ لِيكُمْ بْالْإِنْجِيلْ اللِّي خَبّْرْنَاكُمْ بِيهْ، بَاشْ يْكُونْ لِيكُمْ الْعَزّْ دْيَالْ رَبّْنَا يَسُوعْ الْمَسِيحْ. 15إِيوَا آ الْخُوتْ، تْبْتُو وْشْدُّو فْالْعَادَاتْ اللِّي تْعَلّْمْتُوهَا مْنَّا، سْوَا بْكْلَامْنَا وْلَا بْالرَّسَائِلْ دْيَالْنَا. 16وْكَنْطْلَبْ رَبّْنَا يَسُوعْ الْمَسِيحْ، وْاللَّهْ بُونَا اللِّي بْغَانَا وْبْالنِّعْمَة دْيَالُه عْطَانَا التَّشْجِيعْ الدَّايْمْ وْالرّْجَا الْمْزْيَانْ، 17بَاشْ يْشَجّْعْكُمْ وْيْتَبّْتْكُمْ فْݣَاعْ الْأُمُورْ الْمْزْيَانَة اللِّي كَتْدِيرُوهَا وْكَتْݣُولُوهَا.
Currently Selected:
رِسَالَةْ تْسَالُونِيكِي التَّانِيَّة 2: MSTD
Highlight
Share
Copy
Want to have your highlights saved across all your devices? Sign up or sign in
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved