NAHUM 1
1
Kitata kay Ninive
1Ɗerwelda kayni ka law kat Ninive. Kayni mi sle ma ɗekay kir sa ma jobta-Lawna ma yum Nahum, ma hay Elkosna.
2Ma-vatɗina nam mi Lawn ma hunay ŋolo,
nam job yalamu;
Ma-Vatɗina job yalamu tam sa gaw kalamna,
sa gaw kalamna nam ŋom lawta visi hay dikamu.
3Ma-Vatɗina may muɗ ɦiy gosoyɗi,
donota valam suwiya;
nam as hin sa'a bay ka kitat kalamɗi.
Ma-Vatɗina poy jar billa ma ŋolla,
nam poy jar ɦiwliŋŋa;
Ɗugulla mi butuw ma nam tun selem kalamna.
4Nam as ɦiwir niy-lum ma ŋolla, som goyo,
niy-lumna ma gurayn kaw nam as som goyo.
Yam nagat Basan hiɗi yam hiɗiyt Karmel nam ɓom goy haɓi,
ɓona vi slen ma hay Libaŋ yakay goy kafe,
5Hay li ma nam jika,
hiɗiyn kaf geɗ vokomu,
boŋoloŋŋa mun goyo,
vokomu nagat wira,
slen ma gaa kay nagatna kaf kaw.
6Sa ma as col vok ɦiyda valamu mi gige?
Sa ma as li nar kay ɦiyda vi Ma-Vatɗinɗi mi gige?
ɦiyda valamu mer goyo ki kuta nala,
hiɗiyn mun goy vokomu.
7Ma-Vatɗina nam ŋaa'a,
hay li ma nay ka vun-zlata,
nam as ŋayay talamu,
sum sa vi kuɗumna nam wisiya.
8May nam ma ɓulak hoyok-ziyn ŋolona goyo,
hiɗi birina ma sulur niyn goyna,
sa gawt kalamna nam ma gisi dirsi ta-ta hay jufunda.
9Nigi var joo'o kay Ma-Vatɗin lo kay mige?
Namu mi ma ɓulak slen goyo.
Nay as kal vun-zlat sem ma' loɗi.
10La nisi slewi jar-tuwsi ki zigiyn nala kaw,
la nisi hiwiri kay dolay ma nisi cumna kaw,
kut ma ŋalsi goy noŋ kafe ki us ma soyn nala.
11Goy hay nak (Ninive) pa,
sa ma ka hiɗi varta joota kalay goyo,
namu mi ma ka hiɗi varta ta ɦay-ɦayta.
12Ki kayn nala Ma-Vatɗin di'e:
La sa gaw kigina ka ŋolo,
dono misi kaw,
feɗna ma co kisiya ta-ta nisi as hin loɗi,
nan hotgi yigi gaa'a,
hot yam gaa'a mara ma suw kayn may loɗi.
13Jak ma nekŋa ma nisi tunum kigina nan ma slum goyo,
zigew ma nisi jungi hiɗi namna nan min butum goyo.
14Humgi va ma Ma-Vatɗin dum kigina:
Jafgiya ma semda vigi ma yi talamu bugolda ma li loɗi.
Slen ma ceɗayna hiɗi slen ma yorayna,
ma nigi lakam kalaf hay ziyna vi lawayna vigina,
nan ma yawam goyo,
nan min jugoɗ zulda ta pigi haya'ta,
kay nigi muɗi hefteŋ ŋolo.
Currently Selected:
NAHUM 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001