MIKKA 7
7
1Joot kanu,
kay nan ŋray ca ki hay li ma feɗ wan (menda) nala,
ki sa ma gar baŋal gulda-guldan nala.
Gulda-gulda ma sa jam may loɗi,
gu-gumna ma vuɗ gosoy a dikan dar kay tum mayɗi.
2Sa ma li kuɗ gatta may hay nagat loɗi,
sa ma tuɗ ɗiger may loɗi,
nisi kaf ka baray goy hay hagana kay gar a ɦok busuw goyo,
gigekaw gan jawt gaa vok ɓasulumna.
3Ɓisi ka koloyo kay na li law ma joona;
gurona vi muliyana hiɗi sa kitan gara' ti fita,
sum sa farayn garam mi hay ma hobna,
nisi li ki tuwsi nala.
4Sa jarsi ir maariyana hiɗi sa ir ɗiger ne'na,
muɗi ki gu-ma-zigiyna ma gi zlaɓna nala,
Awa, humgiya,
buur ma kitat co kigin coowa,
kayn mi buur ma sumuna vigi sa ŋom liyn di kalamna,
wulin kayn nisi kalgiyawa hay viyta-goyta.
5Vigi kuɗ dita vi boniyogin kafɗi,
digi lawta vigi goy mi boniyogin kafɗi lay,
lali cata ta bur gaa dikgit kaw ligi ŋali kay da' lawta.
6Kay goora as cen kuɗ bulumu,
goot as fok kulo kay su'a,
cat as fok kay kuno'ta,
sa gigekaw as li gaw hiɗi sa vo hay ziyna vaŋŋa.
Lawn minaya, nam li slugot kaya kaw
7May nanu, nan ma ɗuw dok-dok kay Ma-Vatɗina;
nan ma cubumti ɗawn mi nam Lawn ma min suɗanna,
nam ma hum siɗawta vanu.
8Naŋ sa ma gawt kanna,
naŋ ma firi ala nan nigawa gaa'aɗi,
la nan nig gaa'a, nan ma fok kulo'o,
la nan musi jar jufunda kaw,
Lawn ma mar haraŋa kanu.
9Nan as ziy ɦiyda-ŋolda vi Ma-Vatɗina,
kay nan li suluk kayn katam namu,
may liyn ma nam ma gut kanna ma co'o,
nam ma colan lawta van ɗigere,
nam ma colan goy hay haraŋa kaw,
nan ma ɗuw ɗigerta valamu hiɗi iranu.
10Hay li ma sa ma gaw kanna wi kaynawa,
zulot ma vumu.
Zulot vum kayni kay nam di ala
Ma-Vatɗina Lawna valam ka arige?
Iran ma cuk kalamu,
nisi ma tayis gaa kuɗ senu,
ki naga torɓok ma hay hagan nala.
11Hay buur ma gulmun ma tam nagata vigi in kulo ɗawni,
vun-nagata vigi ma ɦur vok ŋolo.
12Hay buur namna ɗawni, sum sa hay Asiriyana,
sum sa hay hoyok-ziy ŋulo ma Egiptena
fokay Egipte pa ta-ta vun niy-lum ma ŋolla,
tun caw ay vun niy-lum ma ŋolla pa ta-ta vun niy-lum mara'a,
tun caw ay tam hiɗiyt pa ta-ta tam hiɗiy tara'a.
Sum nisin zawn kaf ma co taŋu.
13Nagat ma ɓulak goyo kuɗ sum sa haya'na,
kuɗ vuɗna vi lopna visiya.
14Ŋomaŋ sumuna vaŋu hiɗi zugulda vaŋu,
nisi mi farayna ma vocota vaŋu,
nisi tuni goy visiya hay juru-ŋolla
jar hiɗiyt Karmel.
Hinsi ŋom kulo kay Basan,
hay Galaad kaw,
ki buur ma jew ɓa-ɓan nala.
15Ki hay buur ma nigi kalay goy hay Egipten pa nala,
nan ma li ɗekka ŋolo kirgiya.
16Jaf-sumun ŋolo ma wumu,
nisi ma muɗ zulo'o,
hiɗi donota visi ta ŋolda pet;
nisi ma tun ɓisi vunsiya,
humsi ma ŋel goyo.
17Nisi ma tilek nagan ki guyn nala,
ki sle ma harmat gaa kay nagatna nala,
hiɗi narta nisi ma cukay goyo hay liy ma ŋayna visi pa.
Tuwsi ma visi bat-bat' vok Ma-Vatɗina Lawna vaya.
Nisi ma li nar kaŋu Ma-Vatɗina.
18Lawn mara'a ma ŋray hiɗi naŋ ka su?
Ma vul gida kay jiw-zlata,
yalam jok sulukŋa vi sumuna valam kaw,
li slugot kay caw sumuna valam sa hinna kaw
Ki naŋ nala ka su?
Nam ŋom ɦiyda valamu ta-ta hay vatɗitɗi,
kay nam Lawn mi sa ma li slugo tam sa minimna.
19Nam ma li slugota valam kuma'a mara'a lo,
nam ma lak jiw-zlata vay gaa kuɗ selemu,
sulukŋa vuma'a kaf,
nam ma cukum gaa kuɗ niy-lum ma ŋolla ma zulla.
20Naŋ ma li kuɗ gasita vaŋu ta naŋ da' mi Yakub,
hiɗi bonota vaŋu ta jaraŋ hiɗi Abrahamta,
ki naŋ yi va kaŋ jewe tam sumayma nala.
Currently Selected:
MIKKA 7: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001