Lucas 1
1
Kay libropa qallariyninmanta
1-3Ancha kuyasqay Teófilo, achkaqñam qellqayta qallaykunku ñoqayku ukupi tukuy imam pasakusqanmanta, paykunam qellqarqaku qallariyninmantapuni Jesuswan kuska kaqkunapa imam willawasqankuta. Paykunatam Jesús kamachirqa evangelionta willakamunankupaq. Chaymi ñoqapas tukuy imakunam pasakusqanmanta sumaqta qatipaykuspay imam kaqta qellqamuyki, 4chaynapi uyarisqaykikunaqa cheqap kasqanta yachanaykipaq.
Zacariasman Ángel rikuriykusqanmanta
5 # 1 Cr 24.10. Judea lawpi Herodes munaychakuchkaptinmi, Zacarías sutiyuq runa sacerdote karqa, paymi sacerdote Abiaspa gruponwan kuska templopi servikurqa. Zacariaspa warmin Elisabetqa sacerdote Aaronpa mirayninmanta kaqmi karqa. 6Paykunaqa warmi-qarim Diospa qayllanpi allin ruwaq runakuna karqaku. Diospa kamachikuyninkunatapas lliwtam kasukuqku. 7Ichaqa warmin Elisabet qolluq kasqanraykum mana wawa-churiyuq karqaku. Iskayninkum yuyaqkamaña karqaku.
8Huk punchawmi Zacariaspa gruponman templopi serviy tuparurqa. 9Sacerdotekunapa costumbrenman hina sorteaptinkum, Zacariasman tuparurqa Señorpa templonpi Chuyay-chuyay lugarman yaykuspa incienso kañay. 10Inciensota kañanankamam, llapa runakunañataq Diosta mañakuspanku hawapi karqaku. 11Hinachkaptinmi Zacariasman Señorpa angelnin qonqayllamanta rikuriykurqa, incienso kañananku altarpa alleq lawninpi sayaykuspa. 12Zacariasñataqmi angelta rikuykuspan llumpayta mancharikurqa. 13Ichaqa chay angelmi nirqa:
Zacarías ama manchakuychu, mañakuynikitam Dios uyariykun. Warmiki Elisabetmi qari wawata wachakunqa, paytam Juan nispa sutichanki. 14Naceruptinmi ancha-anchata kusikunki, llapa runakunapas anchallataña kusikunqaku. 15#Nm 6.3.Payqa Diospa qayllanpipas llumpay hatunchasqam kanqa. Manam vinotapas nitaq ima sinkachikuqtapas tomanqachu. Manaraq nacechkaspanmi Chuya Espiritupa huntasqanña kanqa. 16Israelpa achkaq mirayninkunatam Señor Diosninkuman kutichinqa. 17#Mal 4.5-6.Paymi Señorpa ñawpaqninta rinqa Eliaspa espiritunwan hinaspa atiyninwan, chaynapi tayta-mamakunata wawa-churinkuwan allinyanachinanpaq, mana kasukuqkunapas kasukuqña kanankupaq. Chaynatam llapa runakunapa sonqonta allichanqa Señorta chaskinankupaq, nispa.
18Hinaptinmi Zacariasñataq angelta tapurqa:
¿Imaynatataq nisqaykikunaqa cheqap kasqanta yachasaq? Ñoqapas chaynataq warmiypas llumpay yuyaqñam kaniku, nispan.
19 #
Dn 8.16; 9.21. Chaymi angelñataq nirqa:
Ñoqaqa Diospa qayllanpi servikuq Gabrielmi kani, paymi kachamuwarqa kay allin noticiata qanman willanaypaq. 20Chaynaqa, nisqaykunata mana creesqaykiraykum churiki nacenankama mana rimaq kanki. Kay nisqaykuna cumplikunankamam mana rimankichu, nispa.
21Chaykamam runakunañataq Zacariasta hawapi suyarqaku, santuariomanta manaña lloqsirimusqanmanta tapukuspanku. 22Lloqsiramuspanmi paykunata imayna rimapayaytapas mana atirqachu, chaynapim musyarurqaku visionta santuariopi chaskiramusqanta. Manaña rimayta atispanmi señasllawanña entiendechirqa.
23Zacariasmi templopi servikunan punchawkunata cumpliruspan wasinman ripukurqa. 24Chaykunapa qepantam warmin Elisabet wiksayakuruspan pichqa killatapuni wasinmanta mana lloqsirqachu, kaynata nisqanrayku:
25“Señormi kaynata ruwaruwan, chaynapi runakuna manaña asipayawananpaq”, nispa.
Jesuspa nacenanmanta
26Elisabetpa wiksayakusqan soqta killa qepatam, ángel Gabrielta Dios kacharqa Galilea lawpi Nazaret llaqtaman, 27#Mt 1.18.manaraq qari reqsiq sipasta watukamunanpaq, paypa sutinmi karqa María. Chay sipasmi casarakunanpaq Davidpa mirayninmanta kaq Joseypa rimapayasqanña karqa. 28Chay angelmi Mariapa wasinman yaykuykuspan nirqa:
Diospa bendecisqan María, rimaykullaykim, Señormi qanwan kachkan, nispan.
29Mariañataqmi angelpa rimaykusqanwan hukmanyarurqa, hinaspam sonqollanpi tapukurqa chay rimaykusqanpa ima ninanmi kasqanmanta. 30Angelñataqmi nirqa:
María ama manchakuychu, Diospa kuyapayakuynintam haypaykunki. 31#Mt 1.21.Kunanmi wiksayakuspayki qari wawata wachakunki, paytam Jesuswan sutichanki. 32Payqa atiyniyuqmi kanqa, chayraykum tukuy imapa hawanpi munaychakuq Diospa Churinwan sutichasqa kanqa. Kikin Diosmi Rey kananpaq ñawpaq taytan Davidpa trononta qoykunqa. 33#Is 9.7.Chaynapi Israel nacionpi wiñaypaq munaychakunanpaq, munaychakuyninqa manam haykapipas tukunqachu, nispa.
34Hinaptinmi Mariañataq tapurqa:
Manaraq qariwan kachkaptiyqa ¿imaynataq chayqa kanman? nispa.
35Chaymi angelñataq nirqa:
Chuya Espiritum qanman hamunqa, hinaptinmi hanaq pachapi Diospa atiynin llantuy hina pampaykusunki. Chayraykum naceq chuya wawaqa Diospa Churinwan sutichasqa kanqa. 36Qolluq nisqanku aylluyki Elisabetpas yuyaqña kachkaspam soqta killa wiksayuqña kachkan, huk qari wawatam wachakunqa. 37#Gn 18.14.Diospaqqa manam imapas sasachu, nispa.
38Mariañataqmi nirqa:
Ñoqaqa Diospa serviqllanmi kani, nisqaykiman hinayá ñoqawan ruwasqa kachun, nispa.
Chaymantam ángel pasakurqa.
Elisabetman Mariapa watukamusqanmanta
39Chay punchawkunapim utqayman María rirqa Judá law orqopi kaq llaqtaman. 40Hinaspanmi Zacariaspa wasinman yaykuykuspan Elisabetta rimaykurqa. 41Rimaykusqanta Elisabet uyariykuptinmi wiksanpi wawa chaylla kuyurirurqa. Chaymi Elisabetqa Chuya Espíritu huntaykuptin 42kusikuymanta qaparispan Mariata nirqa:
¡Diosmi wakin warmikunamantapas masta bendeciykusunki, bendeciykuntaqmi wiksaykipi kaq wawatapas! 43¿Pitaq ñoqaqa karqani Señorniypa maman watukaykamuwananpaqqa? 44Rimaykuwasqaykita uyariykuptiymi wiksaypi wawa kusikuymanta kuyurirun. 45Creesqaykiraykum qamqa ancha kusisqa kanki, Señorpa nisusqaykikunaqa cumplikunqapunim, nispa.
46 # 1 S 2.1-10. Mariañataqmi nirqa:
Almaymi Señorta hatunchan,
47espirituypas Salvaqniy Diospim kusikun.
48Diosmi kay wakcha serviqninpi ñawinta churaykun,
chayraykum kunanmantaqa lliw miraykuna
“ancha kusisqa” nispa sutichawanqaku.
49Tukuy Atiyniyuq Diosmi
hatun kaqkunata ñoqawan ruwarun,
¡paypaqa sutinpas Chuyam!
50Payqa wiñaypaqmi kuyapayan kasukuqninkunataqa.
51Atiyninwanmi admirakuypaq kaqkunata ruwarqa,
hatun tukuqkunapa imam ruway munasqankutam yanqacharun.
52Munaychakuqkunatam trononkumanta wichichin,
uchuychakuqkunatam hatunchan.
53Wakchakunatam tukuy imawan huntaykachin,
apukunatañataqmi mana imayuqta kutirichin.
54Serviqnin Israeltam yanapaykurqa,
kuyapayakuywan yanapakuqtaqa manam qonqarqachu.
55 #
Gn 17.7. Chaynatam ñawpaq taytanchik Abrahamman
hinaspa mirayninkunaman prometerqa, nispa.
56Mariaqa yaqa kimsa killam Elisabetwan yacharqa, chaymantam wasinman kutikurqa.
Bautizaq Juanpa nacesqanmanta
57Elisabetpa wachakunan tiempo cumplikuruptinmi huk qari wawata wachakururqa. 58Chaymi vecinonkunawan ayllunkunapas Diospa bendeciykusqanta yachaykuspanku paywan llumpayta kusikurqaku. 59#Lv 12.3.Pusaq punchawninmanmi wawata señalachinankupaq aparqaku, hinaptinmi taytan Zacariaspa sutinwan sutichayta munarqaku. 60Mamanñataqmi nirqa:
Juanmi sutinqa kanqa, nispa.
61Paykunañataqmi nirqaku:
Aylluykikunapiqa manam pipas chayna sutiyuqqa kanchu, nispanku.
62Hinaptinmi señaschaspanku wawapa taytanta tapurqaku: Imataq sutin kanqa, nispanku. 63Zacariasñataqmi tablachata qoykuptinku qellqarqa “Juanmi sutinqa” niqta. Chaymi llapallanku admirakurqaku. 64Chayllamanmi Zacariaspa siminqa kicharikururqa, qallunpas paskarikururqam, hinaspam Diosta yupaycharqa. 65Chaykuna pasakusqanwanmi vecinonkuna llumpay mancharisqallaña karqaku, hinaspam Judea law orqokunapi lliw willakurqaku. 66Chaymi haykam uyariqkuna kaynata tapukurqaku:
¿Imaraq kay wawa kanqa? nispanku.
Diospa atiyninmi wawawan karqa.
Diosta Zacarías yupaychasqanmanta
67Juanpa taytan Zacariasmi Chuya Espíritu huntaykuptin kaynata profetizarqa:
68Israelpa Diosninyá qapaqchasqa kachun,
payqa llaqtanta salvaykunanpaqmi hamurqa.
69Tukuy Atiyniyuq Salvaqninchiktam kachamuwarqanchik,
payqa serviqnin Davidpa mirayninmi.
70Paymi ñawpaqmantaraq chuya profetankunatakama prometekurqa,
71enemigonchikkunamanta hinaspa cheqniqninchikkunamanta salvawananchikpaq;
72ñawpaq taytanchikkunamanta llakipayarikuspan
pacto ruwasqanta yuyarinanpaq.
73Ñawpaq taytanchik Abrahammanmi prometerqa,
74enemigonchikkunamanta librawananchikpaq
chaynapi mana manchakuspa payta servinanchikpaq,
75Diosllapaqña kawsaspa,
allin kaqkunata ruwaspa payllapaqña sapa punchaw kawsananchikpaq.
76 #
Mal 3.1. Churilláy, qamñataqmi tukuy imapi munaychakuq Diospa profetanwan sutichasqa kanki,
qanmi ñanta allichastin Señorpa ñawpaqninta rinki.
77Hinaspam llaqtanman willamunki
huchankumanta pampachasqa kaspa salvasqa kanankuta.
78Diosninchikmi kuyapayawaspanchik
hanaq pachamanta musoq punchawpa kanchariyninta qoykuwanchik,
79 #
Is 9.2. chaynapi nisyu tutayaypi kaqkunata kancharinanpaq,
hinaspa ñoqanchiktapas hawkayay ñanninta pusawananchikpaq, nispan.
80Juanmi wiñaspan espiritupi kallpanchakurqa, hinaspam chunniqkunapi yacharqa Israelpa mirayninkunaman reqsichikunankama.
Currently Selected:
Lucas 1: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012