Lucas 2
2
Jesuspa nacesqanmanta
(Mt 1.18-25)
1Chay punchawkunapim rey César Augusto kamachikurqa llapallan llaqtakunapi runakuna censasqa kanankupaq. 2Kay punta kaq censom apakurqa Siria nacionpi Cirenio gobernador kachkaptin. 3Chaynapim nacesqanku llaqtaman padronachikuq sapakama rirqaku. 4Chaymi Davidpa mirayninmanta kaq Joseypas rirqa Galilea lawpi Nazaret llaqtamanta Judea lawpi Belén llaqtaman. Chay llaqtatam “Davidpa Llaqtan” nispa suticharqaku. 5Joseymi padronachikunanpaq rirqa warmin Mariawan kuska. Mariaqa wiksayuqmi kachkarqa. 6Belenpi kachkaptinkum Mariapa wachakunan punchaw chayaramurqa, 7hinaptinmi piwi qari wawanta wachakururqa, hinaspanmi pañalkunawan maytuykuspan animalman qarana artesapi siriykachirqa. Chaynataqa ruwarqa samapakuna wasipi manaña sitio kasqanraykum.
Jesusman michiqkuna watukusqankumanta
8Belén llaqtapa hichpanpim michiqkuna kachkarqaku, ovejankuta purunpi tukuy tuta cuidaspanku. 9Paykunamanmi qonqaymanta Señorpa angelnin rikuriykurqa, hinaptinmi muyuriqninkuta Diospa achkiynin kanchariykurqa, chaymi anchallataña mancharikurqaku. 10Angelñataqmi nirqa:
Ama manchakuychikchu, allin willakuytam apamuchkaykichik, chaywanmi llapa runakunapas kusikunqaku. 11Salvaqnikichikmi “Davidpa Llaqtanpi” nacerapusunkichik, payqa Cristom hinaspa Señormi. 12Kaymi qamkunapaq señal kanqa: Wawatam pañalkunawan wankusqata tariykunkichik animalman qarana artesapi puñuchkaqta, nispa.
13Hinaptinmi qonqaymanta chay angelwan kuska hanaq pachamanta achkallaña angelkuna rikuriykamurqaku, paykunam Diosta yupaychaspanku kaynata takirqaku:
14¡Diosyá hanaq pachapi yupaychasqa kachun!
¡Kay pachapipas Diospa kuyasqan runakunapaqyá hawkayay kachun! nispanku.
15Llapa angelkuna hanaq pachaman kutikuptinkum michiqkunañataq ninakurqaku:
Rispanchikyá Señorpa willachiwasqanchikman hina Belén llaqtapi imam pasakusqanmanta qawamusunchik, nispanku.
16Hinaspam chaylla pasaspanku Mariatawan Joseyta tariykurqaku chaynataq wawatapas animalman qarana artesapi puñuchkaqta. 17Qawaykuspankum wawamanta angelpa tukuy imam nisqanta willakurqaku. 18Chaymi llapa uyariqkunapas michiqkunapa willakusqankuwan admirakurqaku. 19Mariam ichaqa tukuy chaykunata sonqollanpi hatallispan yuyaymanarqa. 20Michiqkunañataqmi imaynam angelpa nisqanman hina tukuy ima pasakusqanta qawaykuspanku chaynataq uyariykuspanku kusisqallaña Diosta yupaychastin kutikurqaku.
Jesusta presentasqankumanta
21 #
Lv 12.3. #
Lc 1.31. Pusaq punchawninmanmi wawata señalarqaku qari kayninpa qarachanta kuchuspa, hinaspam Jesuswan suticharqaku, imaynam Mariaman manaraqpas wiksayakuchkaptin angelpa nisqanman hina.
22Moisespa kamachisqanman hina chuyanchakunanku punchawkuna cumplikuruptinmi, wawata Jerusalén llaqtaman aparqaku Señorman presentamunankupaq. 23#Ex 13.2, 12.Chaynataqa ruwarqaku Señorpa kamachikuyninpi: “Punta naceq qari wawaqa Señorpaq sapaqchasqam kanqa”, nisqanraykum. 24#Lv 12.6-8.Rirqakuqa Señorpa kamachikuyninman hina, iskay qoqñukunata otaq iskay mallqo palomakunata ofrecemunankupaqmi.
25Jerusalenpim Simeón sutiyuq runa yacharqa, payqa allin kaqkunata ruwaspa kuyapayakuq runam karqa. Paymi Israel nación salvasqa kananta suyachkarqa. Payqa Chuya Espiritupa huntasqanmi karqa. 26Paymanmi Chuya Espíritu revelarqa Señorpa kachamusqan Cristota rikuykuspaña wañukunanpaq. 27Paymi temploman rirqa Chuya Espiritupa kallpanchasqan. Jesuspa tayta-mamanmi leypa nisqanta cumplinankupaq wawata temploman aparqaku. 28Hinaptinmi Simeonñataq wawata marqakuykuspan Diosta kaynata yupaycharqa:
29Señorlláy, prometewasqaykim cumplikurun,
chaynaqa hawkañayá wañukusaq.
30Salvaqniykutam rikuykuniña,
31paytaqa qanmi kachamurqanki,
chaytam lliw runakuna rikunqaku,
32 #
Is 42.6; 49.6. Paymi llapa nacionkunapaq achkiy kanqa,
llaqtayki Israelpaqñataqmi hatunchakunan kanqa, nispa.
33Jesuspa tayta-mamanñataqmi, wawamanta Simeonpa nisqankunata uyariykuspanku admirasqallaña karqaku. 34Simeonñataqmi paykunata bendeciykuspan Jesuspa maman Mariata nirqa:
Kay wawam Israelpi runakunapaq kanqa wakinpaq urmachiqnin, wakinpaqñataq hatarichiqnin. Paymi huk señal kanqa, achkaqmi contranpi hatarinqaku. 35Chaynapim achkaq runakunapa imaynam piensasqanku yachasqa kanqa. Tukuy chaykunam espada hina sonqoykita llakichinqa, nispa.
36Chaypitaqmi kachkarqa Aserpa mirayninmanta kaq Fanuelpa churin profetisa Anapas, payqa ancha yuyaqñam karqa. Paymi warmallaraq kachkaspan casarakururqa, ichaqa qanchis watallam qosanwan kawsarqa. 37Viudayaruspam pusaq chunka tawayuq watanpiña karqa. Payqa manam templomanta lloqsiqchu, aswanqa tuta punchawmi ayunowan hinaspa oracionwan Señorta servirqa. 38Chayllamanmi pay chayaramurqa, hinaspanmi Diosman graciasta qospan Jerusalén salvasqa kananta suyaqkunaman Jesusmanta willakuyta qallaykurqa.
Joseywan María Nazaret llaqtaman kutisqankumanta
39 #
Mt 2.23. Señorpa kamachikuyninkunata cumpliruspankum, Galilea lawpi Nazaret llaqtankuman kutikurqaku. 40Wawañataqmi wiñasqanman hina kallpata hapirqa, yachaypa huntasqanmi karqa, Diospa kuyakuyninpas paywanmi karqa.
Jesuspa Pascua fiestaman risqanmanta
41 #
Ex 12.1-27; Dt 16.1-8. Jesuspa tayta-mamanmi Pascua fiestaman sapa wata Jerusalenta riqku. 42Chunka iskayniyuq watanpiña Jesús kachkaptinmi, costumbrenkuman hina Jerusalenta fiestaman rirqaku. 43Fiesta tukuytam wasinkumanña kutirqaku, Jesusñataqmi tayta-mamanpa mana yachasqallanta Jerusalenpi qeparurqa. 44Runakunawan kuska hamusqanta piensaspankum tayta-mamanqa huk punchaw puriytaña rirurqaku, ichaqa watukuykuspankum ayllunkunata hinaspa reqsinakusqankunata tapukachakurqaku. 45Manaña tarispankum Jerusalén llaqtaman kutirqaku maskamunankupaq.
46Kimsa punchawmantañam templopi tarirurqaku Diospa leynin yachachiqkunata uyarispan hinaspa tapuspan paykunawan tiyachkaqta. 47Llapa uyariqninkunapas yachayniyuq kasqanwan hinaspa tapukuykuna kutichisqanwanmi admirakurqaku. 48Tayta-mamanñataqmi tariruspanku admirakurqaku. Chaymi maman nirqa:
Wawalláy ¿imanasqataq kayta ruwaruwankiku? Taytaykiwan ñoqam llakisqallaña maskamuchkaykiku, nispa.
49Chaymi Jesusñataq nirqa:
¿Imanasqataq maskawarqankichik? ¿Manachu yacharqankichik Taytaypa kaqninkunapi kanayta? nispa.
50Paykunam ichaqa chay nisqanta mana entienderqakuchu.
51Chaymantam Jesusqa tayta-mamanwan Nazaretman kutirqa, hinaspam paykunata kasukuspan chaypi yacharqa. Mamanñataqmi tukuy chaykunata sonqollanpi waqaycharqa. 52#1 S 2.26; Pr 3.4.Jesusmi wiñarqa yachayninpi, sayayninpi chaynataq Diospa hinaspa runakunapa allin qawasqan kawsayninpi.
Currently Selected:
Lucas 2: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012