Rut 4
4
Boozwan Rut casarakusqanmanta
1Boozmi llaqtapa punkunpi arreglo ruwaqkunapa tiyananpi tiyaykurqa, hinachkaptinmi Rutman Boozpa “kachkanraqmi aswan hichpa aylluyki”, nisqan runa pasachkarqa.
Payta qayaykuspanmi Booz nirqa: Hamuspayá kaypi tiyaykuy, nispa.
Chaymi pay asuykuspa tiyaykuptin 2llaqtapi chunka ancianokunata qayaykuspan Booz nirqa:
Taytakuna kaypiyá tiyaykuychik, nispa.
Hinaptinmi paykuna tiyaykurqaku. 3Hinaspanmi Rutta nanachikunanpaq kaq runata Booz nirqa:
Moab lawmanta kutimuq Noemiymi wawqenchik Elimelecpa chakranta rantikuchkan. 4Chaymi qanman willaykuyta munarqayki, rantiyta munaspaqa kay runakunapa hinaspa ancianokunapa qayllanpi rantinaykipaq. Qamqa kanki Elimelecpa hichpa ayllunmi, chaynaqa derechoykim reclamanaykipaq, mana munaspaykiqa willaykuwayá ñoqa rantirunaypaq, nispa.
Hinaptinmi chay runa nirqa: Rantisaqmi, nispa.
5Boozñataqmi nirqa:
Noemiymanta chakranta rantispaykiqa wañukuqpa viudan Moab nacionniyuq Rutwanpas casarakunaykim, chaynapi wañukuqpa miraynin mana chinkananpaq, nispa.
6Chaykunata uyariykuspanmi chay ayllunqa nirqa:
Manam ñoqaqa reclamaymanchu, manam munanichu herenciay hukpaq kananta, reclamayta munaspaykiqa qamyá rantiruy, derechoytam qoyki, nispa.
7Chay tiempokunapim Israel nacionpi karqa kay costumbre: Pipas imatapas reclamaptinqa otaq contratota ruwaptinqa, hukkaqninmi usutanta hurqokuykuspan contrato ruwaqmasinman qoykuq firmasqa hina kananpaq. 8#Dt 25.9.Chay costumbreman hinam Boozpa ayllunqa usutanta hurqokuykuspan nirqa:
Qamyá rantiruy, nispa.
9Boozñataqmi chaypi kaq ancianokunatawan runakunata nirqa:
Kunan punchawmi llapallaykichik testigo kankichik Elimelecpa tukuy kapuqninkuna rantisqaymanta. Noemiymantam rantini Quelionpa hinaspa Mahlonpa kaqninkunatapas. 10Casarakusaqtaqmi Mahlonpa viudan Moabita Rutwanpas. Chaynata ruwaptiymi wañukuq Mahlonpa chakrankunapas hina sutillanpi kanqa. Chaynapim paypa ayllunpas nitaq mirayninpas mana chinkanqachu. Chaynaqa, kunanmi qamkuna testigo kankichik, nispa.
11 #
Gn 29.31—35.18. Hinaptinmi llaqtapa punkunpi kaq llapallan runakuna hinaspa ancianokunapas nirqaku:
Arí, testigom kaniku. Diosyá wasikiman yaykumuq warmita Raqueltawan Leata hina ruwachun, chay iskaynin warmikunamantam ñoqanchik Israel castakuna mirarqanchik. Qamtapas Diosyá yanapasunki Efrata llaqtapi munaychakunaykipaq chaynataq Belén llaqtapipas ancha reqsisqa kanaykipaq. 12#Gn 38.27-30.Kay warmiwan casarakuptikiyá Diosninchik mirachisunki imaynam Farestapas mirachisqanta hina, nispanku. Farespa tayta-mamanqa karqa Judawan Tamarmi.
13Chaynapim Booz casarakururqa Rutwan, hinaptinmi Diospa munasqanman hina Rutqa wiksayakuspan qari wawata wachakururqa.
14Chaymi Noemiyta warmikuna nirqaku:
Diosyá hatunchasqa kachun, paymi qoykusunki willkata chaynapi yuyaqyaptikipas nanachikusunaykipaq. Chay willkaykiyá Israelpi kachun ancha reqsisqa runa. 15Willkaykiyá kachun sonqoyki tiyachiq hinaspa payayaynikipipas nanachikusuqniki, payqa llumpay kuyasuqniki llumchuynikipa wawanmi, Rutqa qanchis qari wawakunamantapas mastaraqmi qampaqqa valen, nispanku.
16Hinaptinmi wawata hoqariykuspan Noemí marqakuykurqa, chay punchawmantam Noemiyqa wawapa uywaqnin karqa. 17Chayta qawaspankum vecinankuna nirqaku:
“Noemiypaqmi nacerapun qari wawan” nispanku. Chaynata nispankum Obedwan chay wawata suticharqaku. Paymi karqa Isaipa taytan hinaspa Davidpa abuelon.
Davidpa taytankunamanta
18 # 1 Cr 2.5-15; Mt 1.3-6; Lc 3.31-33. Kaykunam Farespa mirayninkuna: Farespa churinmi karqa Hezrón, 19Hezronpañataqmi Ram, Rampa churinmi karqa Aminadab, 20Aminadabpañataqmi Naasón, Naasonpa churinmi karqa Salmón, 21Salmonpañataqmi Booz, Boozpa churinmi karqa Obed, 22Obedpañataqmi Isaí, Isaiypa churinñataqmi karqa David.
Currently Selected:
Rut 4: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012