Proverbios 4
4
Allinta kawsakunapaq yachachikuykunamanta
1Warmakuna, taytaykichikpa yachachikuyninta uyariychik,
allin tanteakuq kanaykichikpaq sumaqta uyariychik.
2Allin yachachikuytam qoykichik,
yachachikuyniykunata ama qonqaychikchu.
3Ñoqapas taytayuq warmam karqani,
mamaypa ancha kuyasqanmi karqani.
4Taytaymi yachachiwaspan kaynata niwaq:
Yachachikuyniykunata sonqoykipi waqaychay,
kamachikuyniykunata kasukuy,
hinaspaqa unaymi kawsakunki.
5Yachayta maskay, allin yuyayniyuq kayta maskay,
yachachikuyniykunata ama qonqaychu,
amataq haykapipas sapaqchakuychu.
6Yachaymanta ama rakikuychu
paymi waqaychasunki,
yachayta kuyaptikiqa
paymi waqaychasunki.
7Tukuy imamantapas puntataqa
yachaytawan allin yuyayniyuq kaytayá maskay.
8Yachayta kuyaptikiqa
paypas hatunchasunkim,
yachayman hapipakuptikiqa
ancha reqsisqatam ruwasunki,
9suma-sumaq adornotam churasunki,
corona hinam umaykipi kanqa, nispa.
10Churilláy, rimapayasqaykunata uyariy,
rimapayasqaykunata chaskikuy,
hinaspaqa unay watakunatam kawsakunki.
11Ñoqam chay yachay ñanninta pusasqayki,
allin ñannintam purichisqayki.
12Purispapas manam arwitakunkichu,
kallpaspapas manam mitkakunkichu.
13Yachayman hapipakuy
ama kacharikuychu;
waqaychay, payqa kawsachisuqnikim.
14Mana allin runakunapa ñanninmanqa ama yaykuychu,
mana allin kawsaynintapas amataq qatipakuychu,
15paykunapa ñanninmanta ayqekuy,
chaymanta rakikuspayki ñawpaqman riy.
16Paykunaqa manam puñuytapas tarinkuchu
ima mana allintapas mana ruwaspankuqa,
pitapas urmachinankukamam rikchankupas,
17mikuyninkupas mana allin ruwayllam,
upyayninkupas runa wañuchiyllam.
18Allin runakunapa ñanninqa
pacha achikyay hinam,
achkimusqanman hinam suma-sumaqta kancharimun.
19Mana allin runakunapa ñanninmi ichaqa tutayay,
paykunaqa manam yachankuchu imapim urmaruytapas.
20Churilláy, rimapayasqaykunata uyariy,
yachachikuyniykunata sumaqta uyariy,
21chaykunamantaqa ama sapaqchakuychu,
sonqoykipi waqaychay,
22chaykunaqa tariqninkunapaqqa kawsaymi,
chaykunaqa cuerponkupaqpas hampim.
23Tukuy ima waqaychasqaykimantapas,
aswanqa sonqoykitayá waqaychay,
chaymantam imayna kawsaypas lloqsimun.
24Simikimanta mana allin rimaykunata wischuy,
simikimanta llullakuyta wischuy.
25Ñawikikunapas allin kaqta qawachun,
ñawikiqa ñawpaqmanyá qawachun.
26 #
Heb 12.13. Maymi purisqaykita allinta qaway,
puriynikikunaqa allinyá kachun.
27Alleqmanpas nitaq ichoqmanpas ama sapaqchakuychu.
Mana allin ñanmantaqa chakikita asuchiy.
Currently Selected:
Proverbios 4: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012