Marcos 15
15
Gobernador Pilatoman Jesusta apasqankumanta
(Mt 27.1-2, 11-14. Lc 23.1-5. Jn 18.28-38)
1Achikyaruptinmi sacerdotekunapa kamachiqninkunawan ancianokuna, Diospa leynin yachachiqkuna hinaspa cortepi kamachikuqkuna huñunakururqaku, hinaspam Jesusta chaqnaruspanku gobernador Pilatoman entregaykurqaku. 2Chaymi Jesusta Pilato tapurqa:
¿Qamchu kachkanki judiokunapa reynin? nispa.
Hinaptinmi payñataq nirqa:
Qanmi nirunki, nispan.
3Sacerdotekunapa kamachiqninkunam Jesusta tukuy imamanta llumpayta acusarqaku. 4Chaymi Jesusta huktawan Pilato tapurqa:
¿Manachu imallatapas rimarinki? Uyariyá contraykipi tukuy ima rimasqankuta, nispa.
5Jesusmi ichaqa mana imatapas rimarirqachu, chaymi Pilatoqa hukmanyarurqaraq.
Jesusta wañunanpaq sentenciasqankumanta
(Mt 27.15-31. Lc 23.13-25. Jn 18.38-19.16)
6Sapa Pascua fiestapim Pilatoqa llapa runakunapa mañakusqanman hina huk presota kachariq. 7Carcelpim kachkarqa huk preso Barrabás sutiyuq, paymi wakin runakunawan kuska chaqwata ruwaspa runakunata wañurachirqa. 8Chaymi llapa runakuna hamuspanku Pilatota mañakurqaku costumbrenman hina huk presota kacharinanpaq. 9Hinaptinmi Pilato nirqa:
¿Munankichikchu judiokunapa reynin kacharinayta? nispa.
10Chaynataqa tapurqa Jesusmanta envidiakuspanku llapa sacerdotekunapa kamachiqninkuna payman entregasqankuta musyaruspam. 11Ichaqa sacerdotekunapa kamachiqninkunam llapa runakunata yacharachirqaku: “Barrabasta kachariy”, nispa mañakunankupaq. 12Pilatoñataqmi huktawan tapurqa:
Chaynaqa, ¿ima ruwanaytataq munankichik “judiokunapa Reynin” nisqaykichikwanqa? nispa.
13Paykunañataqmi huktawan qaparirqaku:
¡Chakatay! nispanku.
14Chaymi Pilato nirqa:
¿Ima mana allintañataq ruwarurqa? nispa.
Ichaqa runakunam astawanraq qaparirqaku:
¡Chakatay! nispanku.
15Chaymi Pilatoqa llapa runakunawan allinpi kananrayku Barrabasta carcelmanta kachaykachirqa, Jesustañataqmi azoterachispan chakatamunankupaq entregaykurqa.
16Hinaptinmi llapa soldadokunañataq palaciopa pationman aparuspanku llapa tropata huñururqaku. 17Chaypim morado pachawan hinarachispanku umanmanñataq kichkamanta simpasqa coronata churaykurqaku. 18Hinaspam burlakuspanku nirqaku:
¡Kawsachun judiokunapa Reynin! nispanku.
19Soqoswanmi umanpi waqtarqaku, hinaspam toqaykurqaku. Qonqorakuspankum hatunchaq tukuspankuraq burlakurqaku. 20Burlakuyta tukuruspankum morado pachata hurqoykuspa kikinpa pachanwan churarachirqaku, hinaspankum chakatanankupaq aparqaku.
Jesusta chakatasqankumanta
(Mt 27.32-44. Lc 23.26-43. Jn 19.17-27)
21 #
Ro 16.13. Cirene llaqtayuq Simonmi chakramanta hamuchkarqa, payqa karqa Alejandropawan Rufopa taytanmi. Simontam chayninta pasachkaqta soldadokuna hapiruspanku Jesuspa cruzninta hombrochirqaku.
22Jesustam Golgotaman aparurqaku. Golgotaqa “Calavera” ninanmi 23Hinaspankum mirra nisqanwan chaqrusqa vinota tomananpaq qorqaku, Jesusmi ichaqa mana tomarqachu. 24#Sal 22.18.Jesusta chakataruspankum, llapa soldadokuna Jesuspa pachanta sortearqaku apakunankupaq.
25Isqon hora paqariytam Jesusta chakatarurqaku. 26Hinaspankum imamantam wañuchisqankuta huk letrerota qellqarqaku: “KAYMI JUDIOKUNAPA REYNIN”, niqta. 27Jesustawan kuskatam iskay suwakunata chakatarurqaku, huknintam alleq lawninpi, huknintañataq ichoq lawninpi. 28#Is 53.12.#15.28 Kay textoqa ñawpaq manuscritokunapiqa manam kanchu, qepa copiaqkunam Lucaspa qellqasqanmanta churamunmanku karqa. (Lc 22.37)[Chaynapim Qellqapa kayna nisqan cumplikurqa:
Huchasapakunawan hukllawasqam karqa], nispa.
29 #
Sal 22.7; 109.25. #
Mr 14.58; Jn 2.19. Chaynin puriqkunapas umankuta aywispam kaynata kamirqaku:
¡Yaw! Qamqa templotapas tuñichispam kimsa punchawllapi hatarichisaq nirqanki, 30chaynaqa kikikita librakuspaykiyá chay cruzmanta uraykamuy, nispanku.
31Chaynallataqmi sacerdotekunapa kamachiqninkunawan Diospa leynin yachachiqkunapas Jesusmanta burlakuspanku ninakurqaku:
Wakinkunatam librarqa kikinmi ichaqa mana librakuyta atinchu. 32¡Israelpa reynin Cristo kaspaqa kunanyá cruzmanta uraykamuchun, chayta qawaspa iñinanchikpaq! nispanku.
Jesuswan kuska chakatasqa kaqkunapunipas kamirqakum.
Jesuspa wañukusqanmanta
(Mt 27.45-56. Lc 23.44-49. Jn 19.28-30)
33Chawpi punchawmanta kimsa hora tardeykuykamam kay pacha tutayarurqa 34#Sal 22.1.Hinaptinmi chay horata Jesús qaparirqa:
Eloi, Eloi ¿lama sabactani? nispan. Chayqa: “Diosnilláy, Diosnilláy ¿imanasqataq saqerullawanki?” ninanmi.
35Chaypi kaqkunamantam wakiqninku chayta uyarispan nirqaku:
Uyariychik profeta Eliastam qayakuchkan, nispanku.
36 #
Sal 69.21. Hinaptinmi huk runa kallpaykuspan esponjata vinagreman challpuykurqa, hinaspam soqosman wataruspan Jesusman tomachinanpaq haywarqa:
Qawasunchik, yaqachus cruzmanta uraykachinanpaq Elías hamurunqa, nispanku.
37Jesusmi ichaqa nisyuta qaparispan wañukurqa. 38#Ex 26.31-33.Hinaptinmi templopi velo hanaymanta urayman llikikuruspan iskayman rakikururqa. 39Soldadokunapa capitanninmi Jesuspa chimpanpi sayachkarqa. Paymi imaynam Jesuspa wañusqanta qawaspan nirqa:
Cheqaptapunim kay runaqa Diospa Churin kasqa, nispan.
40Chaypitaqmi kachkarqaku wakiqnin warmikunapas karullamanta qawaspanku. Paykunawanmi kachkarqa Magdala llaqtayuq Mariawan sullka kaq Jacobopa, Joseypa hinaspa Salomeypa mamanku Mariapas. 41#Lc 8.2-3.Chay warmikunam Galilea lawpi puriptin Jesusta qatispa yanaparqaku. Chaypitaqmi kachkarqaku Jesuswan kuska Jerusalenman hamuq warmikunapas.
Jesusta pampasqankumanta
(Mt 27.57-61. Lc 23.50-56. Jn 19.38-42)
42Viernes punchaw tardeykuytam (chay punchawpim samana punchawpaq allichakuqku), manaraq tutaykuruchkaptin, 43Arimatea llaqtayuq José kallpanchakuspan Pilatopa kasqanman yaykurqa Jesuspa cuerponta mañananpaq. Joseyqa karqa judiokunapa cortenpi reqsisqa runam, paypas Diospa munaychakuynintam suyachkarqa. 44Pilatoñataqmi Jesuspa wañukusqantaña yachaykuspan hukmanyarurqa, chaymi soldadokunapa capitanninta qayaspa tapurqa ima horatam wañukusqanta yachananpaq.
45Pilatoman Jesuspa wañukusqanta capitán willaykuptinmi, Jesuspa cuerponta Joseyman qoykunankupaq kamachikurqa. 46Chaymi Joseyqa Jesuspa cuerponta cruzmanta uraykachispan rantimusqan fino sabanaswan wankuykurqa. Chaymantam qaqapi toqosqa sepulturaman churaykuspan hatun rumiwan punkunta taparurqa. 47Magdala llaqtayuq Mariawan Joseypa maman Mariañataqmi maypim pampasqankuta qawarqaku.
Currently Selected:
Marcos 15: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012