Jeremías 52
52
Judá nacionpi rey Sedequías munaychakusqanmanta
(2 R 24.18-20; 2 Cr 36.11-16)
1Rey Sedequiasmi iskay chunka hukniyuq watanpi kachkaspan munaychakuyta qallaykurqa. Chunka hukniyuq watam Jerusalén llaqtapi munaychakurqa. Mamanmi karqa Libna llaqtayuq Jeremiaspa churin Hamutal. 2Rey Sedequiasqa Tayta Diospa qayllanpim mana allinkunata ruwarqa, rey Joacimpa tukuy ruwasqanta hina.
3Chayraykum Jerusalén llaqtapa chaynataq Judá nacionpa contranpi Tayta Dios piñakuruspan qayllanmanta wischururqa.
Jerusalén llaqta tuñichisqa kasqanmanta
(2 R 24.20—25.7; Jer 39.1-7)
Chaymantam Sedequiasqa Babilonia nacionpa reyninpa contranpi hoqarikururqa. 4#Ez 24.2.Isqon wataña munaychakuchkaptinmi, chay watapa chunka kaq killapa chunka kaq punchawninpi Babiloniapa reynin Nabucodonosor llapa tropankunawan Jerusalenpa muyuriqninpi churakururqaku, hinaspankum llaqtaman yaykunankupaq rampakunata ruwarqaku.
5Chaynapim Jerusalén llaqtaqa enemigonpa muyurirusqan karqa, Sedequiaspa chunka hukniyuq wata munaychakunankama. 6Chay watapa tawa kaq killanpa isqon punchawninpim, llaqtapi runakuna llumpay yarqaymanta karqaku mikunankupaq manaña imapas kaptin.
7 #
Ez 33.21. Chaymi llaqtapa perqanta toqoruspanku, Jerusalenpa lliw soldadonkuna tutallan lluptirurqaku. Iskay murallakunapa chawpinpi punkunta lloqsispankum reypa huertankunaman riq ñanninta Arabá qechwaman ayqerqaku. 8Babilonia tropakunam ichaqa rey Sedequiasta qatispanku Jericó llaqtaman riq pampapi hapiramurqaku, tropankunañataqmi sapallanta saqeruspanku cheqerurqaku.
9Rey Sedequiastam presocharuspanku Hamat law Ribla llaqtaman Babilonia nacionpa reyninman pusarqaku. Chaypim Sedequiasta sentenciarqaku, 10hinaspam qawachkaptin churinkunata wañuchirqaku, kikintañataqmi ñawinkunata hurqorurqaku chaynataqmi Judá nacionpi llapallan kamachikuqkunatapas teqorurqaku.
11 #
Ez 12.13. Rey Sedequiastañataqmi ñawinkunata hurqorachispa bronce cadenawan watasqata Babilonia llaqtaman pusachirqa. Chaypim wañunankama carcelpi karqa.
Jerusalén llaqtapi templo tuñichisqankumanta
(2 R 25.8-21; 2 Cr 36.17-21; Jer 39.8-10)
12Babilonia nacionpa reynin Nabucodonosor chunka isqonniyuq wataña munaychakuchkaptinmi pichqa kaq killapa chunka kaq punchawninpim, Jerusalén llaqtaman chayaramurqa reyta waqaychaq soldadokunapa kamachiqnin Nabuzaradán.
13 # 1 R 9.8. Paymi kañaykurqa Tayta Diospa templonta, reypa palacionta, Jerusalén llaqtapi llapa wasikunata hinaspa kamachikuqkunapa llapallan wasinkunatapas. 14Chaymantam reyta waqaychaq soldadokunapa capitanninwan Babilonia nacionniyuq llapa soldadokuna Jerusalén llaqtapa muyuriqninpi murallata taqmarurqaku.
15Hinaspam reyta waqaychaq soldadokunapa capitannin Nabuzaradanqa presocharuspa pusarqa Jerusalén llaqtapi puchuqkunatawan Babilonia nacionpa reyninman kuskanchakuq runakunata chaynataq común runakunatapas. 16Wakin wakcha runakunallatañam saqerurqaku uvas huertakunapi hinaspa chakrakunapi llamkanankupaq.
17Babilonia tropakunaqa Tayta Diospa templonpi bronce pilarkunatawan, broncemanta estanquetapas, tiyanankunatapas ñutuparuspankum chay bronceta Babiloniaman aparqaku. 18Aparqakutaqmi mankakunatapas, palakunatapas, mechero limpianakunatapas, tazonkunatapas, wisllakunatapas, broncemanta llapa serviciokunatapas, 19lavatoriokunatapas, incienso qontichinatapas, tazonkunatapas, mankakunatapas, candelabrokunatapas, wisllakunatapas chaynataq vino tallinankupaq vasokunatapas. Tukuy ima qorimanta chaynataq qollqemanta kaqkunatam capitán Nabuzaradán aparqa.
20Tayta Diospa templonpaq Salomonpa ruwachisqan broncemanta iskay pilarkunapa, estanquepa chaynataq chay estanquepa tiyananpaq chunka iskayniyuq torokunapa haykam llasasqanqa manam yachakurqachu.
21Sapa pilarkunapa sayayninmi karqa pusaq metro masnin. Muyuriqninmi karqa pichqa metro parten. Chay pilarkunaqa karqa vacío ukuyuqmi hinaspa yaqa tawa dedo raktayuqmi. 22Sapa pilarkunapa puntanmi broncemanta adornoyuqkama karqa. Sapa adornopa sayayninmi karqa iskay metro masnin, chay adornopa muyuriqninpas broncemanta granadakunawan hinaspa broncemanta mallawan adornasqam karqa. Iskaynin pilarkunam hina chaynalla karqa. 23#1 R 7.15-47.Pilarkunapa puntanpi kaq sapa adornopim karqa pachak granadakuna, chay pachak granadakunamantam isqon chunka soqtayuq sutilla rikurirqa.
Judá nacionpi runakuna preso apasqa kasqankumanta
(2 R 25.18-21)
24Reyta waqaychaq soldadokunapa capitanninqa aparqataqmi sumo sacerdote Seraiastawan sacerdote Sofoniastapas chaynataq punkukunawan cuentallikuq kimsa runakunatapas. 25Llaqtapi runakunamantapas soldadokunapa capitannintawan rey Sedequiaspa umachaqnin qanchis runakunata, guerrapaq runakunata huñumuq capitanta hinaspa llaqtapi ancha reqsisqa soqta chunka runakunatam presocharurqa.
26Paykunatam reyta waqaychaq soldadokunapa capitannin Nabuzaradán, Ribla llaqtaman, Babilonia nacionpa reyninman pusarqa. 27Babilonia nacionpa reynin kamachiptinmi Hamat law Ribla llaqtapi paykunata wañurachirqaku. Chaynatam Judá nacionniyuq runakunata allpankumanta huklaw nacionman presota aparqaku.
28Qanchis wataña rey Nabucodonosor munaychakuchkaspanmi, Judá nacionmanta kimsa waranqa iskay chunka kimsayuq runakunata presota aparqa. 29Chunka pusaqniyuq wataña munaychakuchkaspanñataqmi, Jerusalén llaqtamanta pusaq pachak kimsa chunka iskayniyuq runakunata presota aparqa.
30Iskay chunka kimsayuq wataña rey Nabucodonosor munaychakuchkaptinmi, reyta waqaychaq soldadokunapa capitannin Nabuzaradán, Judá nacionmanta qanchis pachak tawa chunka pichqayuq runakunata presota aparqa. Llapallan preso apasqakunam karqaku tawa waranqa soqta pachaknin runakuna.
Babiloniapi kachkaptin rey Joaquinta kacharisqankumanta
(2 R 25.27-30)
31Judá nacionpa reynin Joaquín, Babilonia nacionpi kimsa chunka qanchisniyuq wataña preso kachkaptinmi, chay watapa chunka iskayniyuq killanpa iskay chunka qanchisniyuq punchawninpi, Babilonia nacionpa reynin Evil-merodac, punta kaq wata munaychakuyninpi, rey Joaquinta carcelmanta hurqorurqa. 32Kuyakuywan rimapayaspanmi Babilonia nacionpi wakin reykunamantapas aswan reqsisqataraq ruwaykurqa. 33Carcelpi kasqan pachankunatapas mudarachirqam, chaynapim rey Joaquinqa wañukunan punchawkama Babiloniapa reyninwan kuska mikurqa.
34Babilonia nacionpa reyninqa, sapa punchawmi rey Joaquinman wañukunan punchawkama mikuchirqa.
Currently Selected:
Jeremías 52: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012