Jeremías 51
51
Babilonia purmachisqa kananmanta
1Tayta Diosmi kaynata nin:
Babilonia nacionpa contranpim,
contraypi hatariq runankunapa contranpim,
tuñichiq wayrata pukuchimusaq.
2Babilonia nacionpa contranpim enemigonkunata kachamusaq,
paykunam trigota wayrachichkaq hina runankunata wischunqaku,
allpantapas manaña runayuqtam saqenqaku;
sasachakuy punchaw chayamuptinmi
muyuriqninmanta atacanqaku.
3Flechaqkuna flechananku arcota alistachunku,
qasqonkuta wasankuta harkachikunawan churakuchunku,
Babilonia nacionpa jovenninkunataqa ama llakipayaychikchu,
tropankunatapas lliwta wañuchiychik.
4Lliw Caldea nacionpim wañuchisqa kanqaku,
lanzawan wañuchisqakunam callenkunapi wischurayanqaku.
5Israel runakunawan Judá runakunam
contraypi huchallikuspanku nacionninkuta huchawan huntachirqaku,
chaywanpas ñoqa Tukuy Atiyniyuq Tayta Diosqa
manam Israel naciontawan Judá naciontaqa saqerqanichu.
6¡Vidaykichikta salvanaykichikpaq Babiloniamanta lluptiychik!
¡Ama paykunapa huchanmanta wañuychikchu!
¡Ñoqa Tayta Diospa vengakunay punchawmi chayaramun!
¡Imam ruwasqankuman hinam pagapusaq!
7 #
Ap 17.2-4; 18.3. Babilonia nacionqa qorimanta vaso hinam makiypi karqa,
llapallan nacionkunatam sinkachirqa.
Llapa nacionkunam chay vasomanta upyaspanku
muspaypi hinaña karqaku.
8Babilonia nacionmi qonqaymanta wichirun,
vencerachikuspanmi lliw ñutupakurun.
¡Paymanta qaparkachaychik!
Heridankunapaq hampita apamuychik,
icharaqpas sanoyanman.
9 #
Ap 18.5. ¡Babiloniataqa hampirunikuñam,
ichaqa manam sanoyanchu!
¡Saqeychik! Llaqtanchikman sapakama ripukusun.
Huchankunaqa cielokamaraqmi chayarun,
puyukamaraqmi hoqarikurun.
10Tayta Diosmi sentenciaspa favoreceykuwanchik.
Hamuychik, ñoqanchikpaq Diosninchikpa imam ruwasqanta
Sión llaqtapi willakamusunchik.
11Tayta Diosmi Babiloniata chinkachinqa,
templonta tuñichisqanmantam vengakunqa.
Flechaykichikta alistakuychik,
escudoykichikta hapiychik.
Babilonia nacionta tuñichinankupaqmi
Media nacionpa reyninkunata Tayta Dios kallpanchamuchkan.
12¡Babilonia nacionpa murallankunapa hawanpi banderata sayachiychik!
¡Llaqta waqaychaqkunata yapaychik!
¡Vigilaqkunata churaychik!
¡Llaqta wateqaqkunata churaychik!
Tayta Diosmi Babilonia nacionpa contranpi tanteasqankunata ruwayman churanqa.
13 #
Ap 17.1. ¡Yaw, Babilonia nación!
Iskay hatun mayukunapa chawpinpim yachanki,
tukuy imayuq apu-apum kankipas.
Puchukanayki punchawmi chayaramunña,
wañunayki punchawmi chayaramunña.
14Tukuy Atiyniyuq Tayta Diosmi kikinrayku juraspan kaynata nin:
Enemigoykikunawanmi aqaruway urukunawan hinaraq inturachisqayki,
paykunam vencesusqaykita hatunmanta qaparinqaku, nispa.
Tayta Diosta yupaychanapaq takimanta
(Jer 10.12-16)
15Tayta Diosmi kay pachata atiyninwan ruwarqa,
Tukuy kay pachapi kaqtam yachayninwan takyachirqa,
yachayninwanmi cielokunata mastarirqa.
16Rimariptinmi cielopi yakukunapas sinchillataña qaparimun,
kay pachapa patankunamantam puyukunata hatarichimun,
paymi paramunanpaq llipyachimun,
maymi waqaychasqanmantam wayrakunatapas hurqomun.
17Llapa runakunam mana yachayniyuq rikurirunku,
ídolo ruwaqkunamanmi ídolo ruwasqanmanta penqakuy yaykurun.
Chay idolokuna ruwasqankuqa mana imapaq valeqmi,
chaykunapaqa manam kawsaynin kanchu.
18Mana imapaq valeqmi chaykunaqa,
asikuypaqmi chay idolokunaqa,
Tayta Diospa castiganan punchaw chayamuptinmi
pasaypaq ñutusqa kanqaku.
19Jacobpa Diosninqa manam chaynachu,
payqa tukuy imapas unanchaqmi.
Israeltam llaqtanpaq akllakurqa
Tukuy Atiyniyuq Tayta Diosmi sutinpas.
Babiloniaqa nacionkunata castigananpaq Tayta Diospa arman kasqanmanta
20Tayta Diosmi Babilonia nacionta kaynata nin:
Maqanay arma hinam qamqa kanki,
Guerrapi peleanay arma hinam qamqa kanki.
Qanwanmi nacionkunata purmachini,
qanwanmi munaychakuykunata tuñichini.
21Qanwanmi wañuchini
caballokunatawan sillakuqninkunatapas,
carretakunatawan manejaqninkunatapas.
22Qanwanmi wañuchini
qarikunata warmikunatapas,
warmakunatawan machukunatapas,
jovenkunatawan sipaskunatapas,
23michiqkunatawan ovejakunatapas,
yapuqkunatawan torokunatapas,
munaychakuqkunatawan kamachikuqkunatapas.
Babilonia castigasqa kananmanta
24Ñoqa Tayta Diosmi kaynata nini:
Babilonia nacionmanwan Caldea runakunamanmi,
Sión llaqtapi mana allinkuna ruwasqankumanta
qayllaykichikpi pagasaq.
25Ñoqa Tayta Diosmi nini:
Nacionkunata tuñichiq orqo,
qampa contraykipim kachkani.
Makiytam castiganaypaq hoqarisaq,
qaqapa hawanmantam kumpaykusqayki,
hinaspaymi kañasqa orqoman tikrasqayki.
26Purmasqa perqaykikunapa ruminkunaqa
manañam wasi ruwananpaqpas servikunqañachu,
pasaypaq purmachisqam kanki.
Ñoqa tayta Diosmi chaynata nini.
27Banderata kay nacionpi hoqariychik,
nacionkunapi trompetata tocaychik,
Babiloniata atacanankupaq nacionkunata alistamuychik.
¡Araratpi, Minipi hinaspa Askenazpi tropakunata hatarichimuychik!
Chay tropakunapa capitanninta churaychik.
Caballopi silladakunata aqaruway urukunata hinaña hatarichimuychik.
28Babiloniata atacanankupaq nacionkunata alistaychik,
atacanankupaq Media nacionpi reykunatawan kamachiqninkunata qayamuychik,
munaychakusqan nacionkunata hatarichimuychik.
29Babilonia nacionta manchakuypaq chunniqman tikrananpaq tanteasqanta
Tayta Dios ruwayman churaptinqa allpapas katkatatanqaraqmi.
30Babilonia nacionpa allinnin qari-qari soldadonkunam
mana peleanankupaq pakakurunku,
mana kallpayuqñam rikurirunku,
warmikuna hinañam rikurirunku;
wasinkunam kañasqaña kachkan,
punkunkunapi cerrojonkunapas pakipasqañam kachkan.
31Willakuqkunam qatinasninpi kallpachkanku,
Babilonia nación vencesqa kasqanta reyman willanankupaqmi kallpachkanku.
32Mayupa vadonkunapim churakurunku,
soqosllaña sitiokunatam kañaykunku,
soldadokunam manchakuypa huntasqan kachkanku.
33Ñoqa Tukuy Atiyniyuq Tayta Diosmi kaynata nini:
Suma-sumaq Babilonia nacionmi
trillana era hinaña rikurirunqa,
Babilonia nación cosechasqa kanan punchawmi chayaramunqaña.
34Sión llaqtam kaynata nin:
Babiloniapa reynin Nabucodonosormi ñutuparuwaspan mikuruwarqa,
mana imayuq platota hinam saqeruwarqa,
rakrapu hinam millpuruwarqa,
ñoqawan wiksanta huntarachispanmi atqoruwarqa.
35Jerusalenmi kaynata nin:
Ñakarichiwasqanmanta Babilonia ñakarichun,
imaynam runaykunata wañuchisqankuta hinayá
Caldea nacionpi runakunapas wañuchunku, nispa.
Babiloniapa sasachakuyninmanta
36Chayraykum Tayta Dios kaynata nin:
Ñoqam qamta nanachikusqayki,
enemigoykikunatam vengakusaq,
Babiloniapa pukyunkunatawan mayuntam chakichisaq,
37Babiloniaqa pasaypaq tuñichisqam kanqa,
atoqkunapa yachananñam kanqa,
runapa mana yachananñam kanqa,
qawaqninkunapas admirakuspam burlakunqa.
38Leonkuna hinam qaparinqaku,
malta leonkuna hinam qaparkachanqaku.
39Rupaypi yakunayachikuptinkum machachiqninkuta upyachisaq,
muspaypi hinaña kanankukamam upyachisaq,
chaynapim wiñaypaq manaña rikchanankukama puñurunqaku.
Ñoqa Tayta Diosmi chaynata nini.
40Nakana wasiman malta carnerokunata,
chivatokunata, poqosqa carnerokunata pusachimuchkaq hinam
paykunataqa pusachimusaq.
Babilonia tuñichisqa kananmanta
41Babiloniam presochasqa rikurirun,
llapallan nacionpa alabanan nacionmi vencesqa rikurirun,
chayta qawaspam wakin nacionkunapas mancharikunku.
42Lamar qocham Babiloniata pamparun,
olankunam lloqsiramuspa pamparun.
43Llaqtankunapas pasaypaq chunnichisqam rikurirun,
manaña imapa kanan chaki allpam rikurirun,
chaypiqa manañam pipas yachanqañachu,
manañam pipas chaynintaqa pasanqañachu.
44Bel idolotam Babiloniapi castigasaq,
imapas millpusqankunatam atqochisaq,
nacionkunapas manañam paymanqa hamunqakuñachu.
Babiloniapa murallankunam tuñichisqa kanqa.
45Kuyasqay llaqtalláy,
chay nacionmanta lloqsiy,
vidaykichikta sapakama libraychik.
Tayta Diospa nina hina piñakuyninmanta
vidaykichikta lluptichiychik.
46Kay nacionpi rimaykuna kaptinqa
ama hukmanyaychikchu nitaq manchakuychikchu.
Sapa watam hukta-hukta rimanqaku,
kay nacionpi ñakariy kananmantam rimanqaku,
kamachikuqpuram peleanqaku.
47Chaynaqa, hamuchkanmi punchaw
Babilonia nacionpa idolonkunata castiganaypaq.
Babiloniam penqaypi rikurinqa,
ayankunapas chawpinpim wischurayanqa.
48 #
Ap 18.20. Norte lawmanta tuñichiqkuna hamuptinmi,
Babilonia tuñichisqa kaptinmi,
cielokunawan chaypi tukuy ima kaqkuna,
kay pachawan chaypi tukuy ima kaqkuna
kusikunqaku.
Ñoqa Tayta Diosmi chaynata nini.
49 #
Ap 18.24. Israel runakunata wañuchisqanmantam
Babilonia tuñichisqa kanqa,
kay pachapi runakunata wañuchisqanmantam
Babilonia purmachisqa kanqa.
Babiloniapi kaq Israel miraykunapaq willakuymanta
50¡Wañuymanta lluptiqkuna,
ama sayaykuspa ayqeychik!
¡Karupiña kaspapas,
Tayta Diosmanta yuyariychik!
¡Jerusalén llaqtamanta yuyariychik!
51Qamkunam ninkichik:
“Tratawasqankuta uyarispaykum
hatun penqaypi kachkaniku,
Tayta Diospa templonman huklaw llaqtayuqkuna yaykusqanmantam
penqakuyllawanña kachkaniku”, nispaykichik.
52Chaynaqa, hamuchkanmi punchaw
Babiloniapa idolonkunata ñutupanaypaq,
llapa heridokunapas lliw nacionpim nanaywan ñakarinqaku.
53Babilonia naciontaqa,
cielokamaña hoqarikuruptinpas,
amparakunanta chaypiña ruwaruptinpas,
ñoqam tuñichiqninkunata kachaykusaq.
Ñoqa Tayta Diosmi chaynata nini.
Babiloniapa tuñichiqninkuna hamunanmanta
54Babiloniapa nanaywan qaparisqanmi uyarikamuchkan,
Caldea lawmantam hatun qapariy uyarikamuchkan.
55Tayta Diosmi Babiloniata tuñichichkan,
ancha qapariynintam upallachichkan.
Enemigonkunam achka yakupa olankuna hinaraq qaparichkanku,
lamar qocha hinaraqmi qaparichkanku.
56Babiloniata tuñichiqkunam hamurunku,
tropankunatam presocharunku,
flechananku arcotam pakiparunku.
Tayta Diosqa imam ruwasqankuman hinam pimanpas pagapun.
57Ñoqam machachisaq Babiloniapa kamachiqninkunata, yachaysapa runankunata,
ancha reqsisqa runankunata, gobernadorninkunata hinaspa soldadonkunata.
Paykunataqa wiñaypaq manaña rikchanankukamam puñurachisaq.
Tukuy Atiyniyuq Tayta Diosmi chaynata nin.
58Tukuy Atiyniyuq Tayta Diosmi kaynata nin:
Babiloniapa rakta-rakta perqakunatam
pasaypaqta purmachinqaku,
hatu-hatun punkunkunatam kañaykunqaku.
Yanqapaqmi llamkaqkunapas hatarichirqaku,
nina tukurunanpaqmi pisipaywan llamkarqaku.
Babiloniapi kaqkunaman Jeremiaspa willachimusqanmanta
59Judá nacionpi rey Sedequías tawa wataña munaychakuchkaspanmi Babilonia nacionman rirqa, paywanmi rirqa Maasiaspa willkan otaq Neriaspa churin Seraiaspas paymi riqkunata pusarqa; hinaptinmi Babiloniapi Israelpa mirayninkunaman huk kunakuyta profeta Jeremías apachirqa. 60Babiloniapa contranpi castigokuna hamunanmantam Jeremías huk libropi qellqarqa, 61hinaspanmi Seraiasta nirqa:
Babilonia llaqtaman chayaspaykim kay libropi qellqasqa kaqta leenki, 62hinaspam ninki: “Dios Taytalláy, kay nacionta manaña runayuq manaña animalniyuq kanankama chinkachinaykipaqmi rimarqanki, chaynapi wiñaypaq chunniptin manaña pipas chayninta pasanankupaq”, nispayki. 63Leeyta tukuruspaykim kay libroman rumita watarunki, hinaspam Eufrates mayuman wischuykuspa 64#Ap 18.21.kaynata ninki: ¡Tayta Dios castigaptinmi Babilonia kaynata chinkarunqa! ¡Tuñiruspanqa manañam haykapipas hatarinqañachu! nispayki.
Kaypim Jeremiaspa rimasqankuna tukun.
Currently Selected:
Jeremías 51: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012