Hechos 3
3
Suchu runapa sanoyasqanmanta
1Huk punchawmi kimsa hora tardeykuyta, Dios mañakuna horata, Pedrowan Juan temploman rirqaku. 2Chay templopa punkunmanmi nacesqanmanta suchu runata sapa punchaw apaqku, hinaspam Hermosawan sutichasqa punkupi churaqku, chaynapi yaykuq runakunamanta limosnata mañakunanpaq. 3Chay suchu runam Pedrotawan Juanta temploman yaykuchkaqta rikuruspan limosnata mañakurqa. 4Pedrowan Juanñataqmi chay suchu runata qawarayaykurqaku, hinaptinmi Pedro nirqa:
Qawawayku, nispa.
5Suchuñataqmi paykunata qawarayarqa imallapas qoykunankuta suyaspan. 6Pedroñataqmi nirqa:
Manam kanchu qoriypas nitaq qollqeypas, aswanqa kapuqllaytam qosqayki: Nazaretmanta kaq Jesucristopa sutinpiyá hatarispayki puriy, nispa.
7Chaynata nispanmi alleq makinmanta hapiykuspa aysariykuptillanmi chakinkunawan moqo tullunkuna kallpata hapirurqa. 8Hinaptinmi chay runaqa pawarispan puriyta qallaykurqa. Paykunawanmi temploman yaykurqa puristin, pawaykachastin hinaspa Diosta yupaychastin. 9Chaymi lliw runakuna puriqtaña hinaspa Dios yupaychaqtaña rikuspanku, 10reqsirurqaku chay runaqa templopa “La Hermosa” sutiyuq punkunpi tiyaykuspan limosna mañakuq kasqanta. Chay runata puriqtaña rikuruspankum mana ima niytapas atispanku admirakurqaku.
Salomón sutiyuq hatun portalpi Pedropa rimasqanmanta
11Chay sanoyaruq runam Pedrotawan Juanta mana kacharispa qatikacharqa. Hinaptinmi lliw runakuna admirakuspanku paykunaman huñunakururqaku Salomonwan sutichasqanku punkupi. 12Pedroñataqmi hamusqankuta qawarispan nirqa:
Israelpa mirayninkuna ¿imanasqataq admirasqallaña kachkankichik? ¿Imanasqataq ñoqaykuta qawarayawachkankiku? Manam kikillaykumantachu, nitaqmi atiyniykuwanchu kay runataqa purirachiniku. 13Aswanqa ñawpaq taytanchik Abrahampa, Isaacpa hinaspa Jacobpa yupaychasqan Diosmi serviqnin Jesusta hatuncharqa. Paytam autoridadkunaman qoykurqankichik, gobernador Pilato librayta munaptinpas harkakurqankichikmi. 14#Mt 27.15-23; Mr 15.6-14; Lc 23.13-23; Jn 19.12-15.Jesusqa Chuya hinaspa justo kachkaptinmi Pilato libraykunanta harkakuspa runa wañuchiq runataraq kacharinanpaq mañakurqankichik. 15Chaynapim kawsay qokuq Jesusta wañuchirqankichik. Ichaqa Dios Taytam kawsarichimurqa, chaymi Jesús kawsarimusqan rikusqaykumanta testigo kaniku. 16Paypa sutinpim kay rikusqaykichik hinaspa reqsisqaykichik suchu runa sayarirun. Paypa sutinpim hinaspa payman iñisqanraykum kay runaqa pasaypaqta sanoyarun kunan qawasqaykichikpi hinapas.
17Wawqekuna, ñoqaqa sumaqtam yachani, qamkunapas chaynataq kamachiqnikichikkunapas pim Jesús kasqanta mana yachasqaykichikraykum wañurachirqankichik. 18Chaynapim ñawpaqmantaraq llapallan profetankunapa imaynam Cristopa ñakarinanmanta nisqankuta Dios cumplichirqa. 19Chaynaqa, huchaykichikmanta wanakuspayá Diosman kutirikuychik, chaynapi tukuy huchaykichik chinkachisqa kaptin hamuq punchawpi Señorpa hawkayaynin hamusunaykichikpaq. 20Chaynataqa ruwanqa Jesucristota qamkunaman kachamuspanmi. Chaytaqa ñawpaqmantaraqmi willasurqankichikña. 21Jesucristoqa hanaq pachapiraqmi kamunan, tukuy imakunatapas ñawpaqpi hina Dios allichanankama, chaytaqa ñawpaq tiempopi profetankunatakamam nirqaña. 22#Dt 18.15-16.Moisesmi ñawpaq taytanchikkunata nirqa:
“Señorninchik Diosmi ayllunchikkunamanta huk profetata ñoqata hina hatarichinqa. Chaynaqa, paypa nisusqaykichiktam lliwta kasukunkichik. 23#Dt 18.19.Pipas chay profetapa nisqanta mana kasukuqtaqa Diosmi llaqtanmanta pasaypaqta chinkachinqa”, nispa.
24Llapallan profetakunam Samuelmanta qallaykuspa qatinasninpi kay punchawkunapi imam pasakunanmanta rimarqaku. 25#Gn 22.18.Qamkunaqa profetakunapa castanmi kankichik, qamkunapaqmi pactota Dios ruwarqa ñawpaq taytaykichikkunawan, hinaspam Abrahamta nirqa: “Kay pachapi llapallan ayllukunam miraynikirayku chaninchasqa kanqaku”, nispa. 26Churinta Dios kawsarichimuspanmi puntataqa qamkunaman kachamurqa bendecisunaykichikpaq, chaynapi sapakama huchaykichikmanta wanakunaykichikpaq.
Currently Selected:
Hechos 3: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012