Hechos 2
2
Chuya Espiritupa hamusqanmanta
1 #
Lv 23.15-21; Dt 16.9-11. Pentecostés fiesta chayaramuptinmi lliw iñiqkuna huñunasqa kachkarqaku. 2Hinaptinmi qonqayllamanta cielomanta qapariyllawanña wayra hina hamuqta uyarirurqaku, chaymi tiyasqanku wasitapas qapariyninwan huntariykurqa. 3Hinaptinmi sapakamapa umankupa hawanman nina hina lenwachkaq tiyaykurqa. 4Llapallankuman Chuya Espíritu huntaykuptinmi mana yachasqanku rimaykunapi rimayta qallaykurqaku Chuya Espiritupa rimachisqanman hina.
5Jerusalén llaqtapim kachkarqaku karumanta hamuq judiokuna, paykunam lliw nacionkunamanta hamurqaku Diosta yupaychanankupaq. 6Chay wayra hina qapariyta uyariruspankum lliw runakuna chay apostolkunapa kasqanman huñunakaramurqaku, hinaspankum sapakamapa rimayninkupi rimaqta uyariruspanku mana ima niytapas atirqakuchu. 7Chaymi admirakuspanku nirqaku:
¿Kay rimaqkunaqa manachum lliwchanku Galilea law runakuna? 8Hinaptinqa ¿imaynanpimá sapakamapa rimayninchikpiqa rimaqta uyarinchik? 9Kaypiqa kachkanchik achka nacionkunamantam: Partiamanta, Mediamanta, Elanmanta, Mesopotamiamanta, Judeamanta, Capadociamanta, Pontomanta, Asiamanta, 10Frigiamanta, Panfiliamanta, Egiptomanta, Cirenepa waklawnin Africamanta. Kachkantaqmi kaypi yachaq Roma llaqtayuq runakunapas. Wakinmi nacesqankumanta judío kanku, wakinñataqmi judiokunapa religionninman tikrakuqkuna. 11Kachkankutaqmi Cretamanta hinaspa Arabia lawmanta kaqkunapas. Kaynaña kachkaptinchikpas sapakamapa rimayninchikpim Diospa admirakuypaq ruwasqankunamanta uyarichkanchik, nispanku.
12Llumpayta admirakuspankum ninakurqaku:
¿Ima ninantaq kayqa? nispanku.
13Wakinñataqmi asikuspanku nirqaku:
Sinkam kachkanku, nispanku.
Pedropa punta kaq willakusqanmanta
14Pedrom chunka hukniyuq apostolkunawan sayariykuspan hatunmanta qaparispan kaynata nirqa:
Jerusalenpi yachaqkuna chaynataq llapallan judío masillaykuna, yachanaykichikpaqyá kay nisqayta sumaqta uyariwaychik. 15Ñoqaykuqa manam qamkunapa nisqaykichikman hina sinkachu kachkaniku. Manaraqpas isqon horataqa manam pipas sinkaqa kanmanchu. 16Aswanqa kay uyarisqaykichikmantaqa ñam profeta Joel rimarirqaña:
17Diosmi nin:
Tukupay punchawkunapim chaqchurimuq hina
lliw runakunaman Espirituyta kachamusaq.
Chaymi qari churikichikpas,
warmi churikichikpas profetizanqaku.
Jovenkunapas visionkunatam rikunqaku,
yuyaqkunapas mosqoykunatam mosqokunqaku.
18Chay punchawkunapim Espirituyta kachamusaq,
qarimanpas warmimanpas lliw serviwaqniykunaman,
hinaptinmi profetizanqaku.
19Cielopim admirakuypaq kaqkunata ruwasaq,
kay pachapim yawartawan ninata qawachisqaykichik,
qawachisqaykichiktaqmi suyullaña hoqarikuq qosnitapas.
20Manaraq Señorpa suma-sumaq punchawnin
chayamuchkaptinqa intipas tutayanqam,
killapas yawaryanqam.
21 #
Jl 2.28-32. Ichaqa haykam Señorpa sutinta qayakuqmi salvasqa kanqa.
22Israelpa mirayninkuna, uyariwaychik: Yachasqaykichikpi hinapas, Diosmi qamkuna ukupi Nazaretmanta kaq Jesuspa atiyninta qawachirqa, paynintakama admirakuypaq milagrokunata hinaspa señalkunata ruwaspan. 23#Mt 27.35; Mr 15.24; Lc 23.33; Jn 19.18.Diosqa ñawpaqmantaraq yachasqanman hinam hinaspa munasqanman hinam Jesusta qamkunapa makikichikman churaykurqa. Qamkunam payta presocharurqankichik, hinaspam mana allin runakunawan chakatachispa wañurachirqankichik. 24#Mt 28.5-6; Mr 16.6; Lc 24.5.Ichaqa Diosmi wañuymanta libraruspan kawsarichimurqa, paypiqa wañuypas mana munaychakuyta atisqanrayku. 25Ñawpaqtam Jesusmanta rimaspan David nirqa:
“Tukuy tiempom Señorniyqa ñoqawan kachkan,
pay alleqniypi kaptinqa,
manam imapas urmachiwanqachu.
26Chayraykum sonqoypas kusikun,
simiywanpas kusikuymantam takisaq,
cuerpoypas hawkallam samaykunqa.
27Cuerpoytapas amam sepulturapiqa saqerunkichu,
kuyasqaykitaqa amam sepulturapi asnarinantaqa saqerunkichu.
28 #
Sal 16.8-11. Kawsay ñantam reqsiykachiwanki,
ñoqawan kasqaykim kusikuyta huntaykuwan”, nispa.
29Wawqellaykuna, cheqaptam nikichik: Ñawpaq taytanchik Davidqa wañukuspanmi pampasqa karqa, kunankamapas sepulturanqa hinallam kaypi kachkan. 30#Sal 89.3-4; 132.11.Davidqa profetam karqa, chaymi payman juraspan Dios prometekusqanrayku yacharqa paypa mirayninmanta Cristo hamunanta hinaspa David hina Israel nacionpi munaychakunanta. 31Chaynapim Davidqa qawachkanmanpas hina ñawpaqmantaraq Jesucristopa kawsarimunanmanta rimarqaña “Sepulturapiqa manam saqesqachu kanqa, nitaqmi cuerponpas ismunqachu”, nispa. 32Kay Jesustam Dios kawsarichimurqa, cheqaptapunim chaytaqa llapallayku rikurqaniku. 33Chaynapim Diosqa Jesusta hatunchaykuspan alleq lawninpi chaskiykurqa, Tayta Diospa prometekusqanman hinam Chuya Espirituta Jesús chaskirqa, chay Chuya Espirituntam chaqchurimuwarqanchik, chaytam qawachkankichik hinaspa uyarichkankichik. 34-35#Sal 110.1.Manam Davidchu hanaq pachamanqa hoqarisqa karqa, chaywanpas paymi nirqa:
“Señor Diosmi Señorniyta nirqa:
Enemigoykikunata chakikipa sarupakunanta ruwanaykama
alleqniypi tiyaykuy”, nispa.
36Israelpa llapallan mirayninkuna, yachaychikyá, qamkunapa chakatarusqaykichik Jesustam Cristo hinaspa Señor kananpaq Dios churaykun, nispa.
37Kaykunata uyariruspankum sonqonkupi llumpayta llakikuruspanku Pedrotawan wakin apostolkunata tapurqaku:
Wawqekuna ¿imatataq ruwallasaqku? nispanku.
38Chaymi Pedroñataq nirqa:
Huchaykichikmanta wanakuspayá sapakama Jesucristopa sutinpi bautizakuychik, chaynapi huchaykichikmanta pampachasqa kanaykichikpaq, hinaspam Chuya Espiritupa atiyninta chaskinkichik. 39Kay promesaqa qamkunapaqwan, miraynikichikkunapaq, llapallan karu llaqtapi kaqkunapaq hinaspa Señorninchik Diospa munasqanman hina lliw qayasqakunapaqwanmi.
40Pedrom runakunata qaqchaspan kaynata nirqa:
¡Kay huchasapa miraykunamanta rakikuychik! nispa.
41Hinaptinmi Pedropa nisqanta kasukuqkunaqa bautizachikurqaku, chaynapim iñiqkunaman chay punchawpi yaqa kimsa waranqa runakuna yapakurqaku. 42Paykunam apostolkunapa yachachikuyninpi takyarqaku, kapuqninkuwanmi yanapanakuqku, huk sonqollam tantatapas partenakuqku, Dios mañakuypipas hukllam karqaku.
Punta kaq iñiqkunapa imaynam kawsasqankumanta
43Apostolkunapa hatun milagrokuna hinaspa señalkuna ruwasqankuwanmi, llapa runakuna admirakuspa mancharisqallaña karqaku. 44#Hch 4.32-35.Lliw iñikuqkunam huk sonqolla karqaku, ima kapuqninkutapas llapallankum qonakurqaku. 45#Mt 19.21; Mr 10.21; Lc 12.33; 18.22.Chakrankutawan imapas kapuqninkutam rantikuqku hinaspam sapakamapa necesitasqankuman hina rakinakuqku. 46Sapa punchawmi templopi huk sonqolla huñunakuqku, wasin-wasin huñunakuspam hatun kusikuywan mikuyta mikuqku, tantatapas partinakuspankum mikuqku. 47Diosta yupaychaspam lliw runakunapa allin qawasqam karqaku. Señorñataqmi sapa punchaw paykunaman salvasqa kaqkunata yaparqa.
Currently Selected:
Hechos 2: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012