1 Samuel 3
3
Samuelta Tayta Dios qayasqanmanta
1Samuelmi warmallaraq kachkaspan sacerdote Eliyta yanapaspan Tayta Diosta servirqa. Chay punchawkunapiqa Diosqa manañam pitapas ancha rimapayarqañachu, nitaqmi pimanpas revelarqañachu. 2Huk tutam sacerdote Eliyqa cuartonpi puñuchkarqa, ñawsayayta qallaykuspanmi manaña allintaqa qawakurqañachu. 3Samuelñataqmi Diospa templonpi puñuchkarqa, chaypitaqmi tarikurqa Diospa Arcanpas. Mecheropas hinallaraq ratachkaptinmi, 4Samuelta Tayta Dios qayarqa:
¡Samuel, Samuel! nispan.
Samuelñataqmi, nirqa:
“Kaypim kachkani”, nispan.
5Hinaspam Eliypa kasqanman kallpaspan nirqa:
Taytáy ¿imapaqtaq qayamuwarqanki? nispan.
Hinaptinmi Eliyñataq nirqa:
Manam ñoqaqa qayaykichu, kutispayki puñukamuy, nispa.
Chaymi Samuelqa kutirispan huktawan puñuykurqa. 6Ichaqa Tayta Diosmi huktawan Samuelta qayarqa:
¡Samuel, Samuel! nispan.
Chaymi Samuel hatarispan rirqa Eliypa kasqanman, hinaspam nirqa:
Taytáy ¿imapaqtaq qayamuwarqanki? nispan.
Hinaptinmi Eliyñataq nirqa:
Churilláy manam ñoqaqa qayamurqaykichu, kutispayá puñukamuy, nispa.
7Samuelqa manaraqmi Tayta Diosta reqsirqachu, Diospas manataqmi chay punchawkamaqa imatapas rimapayarqachu. 8Samuelta kimsa kutikamaña Tayta Dios qayaptinmi, Samuelqa hatarispan Eliypa kasqanman rirqa, hinaspam nirqa:
Taytáy ¿imapaqtaq qayamuwarqanki? nispan.
Chaynapim Elí musyarurqa Samueltaqa Tayta Dios qayasqanta. 9Chaymi Samuelta Elí nirqa:
Kutispayki puñukamuy, huktawan qayamusuptikiqa kaynatam ninki: “Rimapayaykullawayá Dios Taytalláy, kay serviqnikiqa uyarichkaykim”, nispayki.
Chaynata niptinmi Samuelqa kutikuspan kaqlla puñuykurqa. 10Chaymi Tayta Diosqa asuykuspan puntata hina qayarqa:
¡Samuel, Samuel! nispan.
Samuelñataqmi nirqa:
Rimapayaykullawayá Diosnilláy, kay serviqnikiqa uyarisuchkaykim, nispan.
11Hinaptinmi Samuelta Tayta Dios nirqa:
Israelpim hatun manchakuypaqta ruwasaq, chayta uyariqkunapaqqa rinrinkupas chanchanyanqam. 12Chay punchawpim cumplisaq sacerdote Eliyman ayllunkunamanta tukuy ima nisqayta. 13Nirqaniñam churinkunapa millay hucha ruwasqanmanta aylluntapas wiñaypaq juzganaymanta, ñoqapa contraypi rimachkaptinkupas payqa manam qaqcharqachu. 14Chayraykum Eliypa ayllunpa contranpi jurani, kay mana allin ruwasqanmantaqa manam haykapipas pampachasaqñachu, sacrificiota ruwaptinpas nitaq ofrendakunata qowaptinpas, nispan.
15Chaymantam Samuelqa achikyanankama puñururqa, hinaspam Tayta Diospa wasinpa punkunta kicharqa. Samuelmi manchakurqa imam uyarisqankunata sacerdote Eliyman willaykuyta. 16Qayaspanmi Samuelta Elí nirqa:
Kuyasqay churilláy Samuel, nispa.
Samuelñataqmi nirqa: Kaypim kachkani, nispan.
17Chaymi sacerdote Elí tapurqa:
¿Imatataq Dios nisurqanki? Ama pakawaspa willaykuway. ¡Diosyá castigasunki imapas nisusqaykita pakawaptikiqa! nispan.
18Hinaptinmi Samuelqa Tayta Diospa imam nisqanta lliwta willarqa. Eliyñataqmi nirqa:
¡Payqa Diosmi! ¡Imam munasqanman hina ruwachun! nispa.
19Samuelpa wiñasqanman hinam, Tayta Diosqa paywan karqa; payqa manam usuchirqachu nitaqmi yanqacharqachu Diospa Chuya simintapas. 20Chaymi Israelpa llapallan mirayninkuna, Dan llaqtamanta qallaykuspan Beerseba llaqtakama yacharqaku Samuelqa cheqap profeta kasqanta. 21Kaqllamantam Tayta Diosqa Silo llaqtapi rikuriykurqa. Chaypim Samuelta rimapayaspan reqsichikurqa, hinaptinmi Samuelñataq Israelpa mirayninkunaman willarqa.
Currently Selected:
1 Samuel 3: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012