1 Samuel 2
2
Diosta Ana yupaychasqanmanta
1Anam Diosta mañakuspan nirqa:
Dios Taytalláy,
tukuy sonqoymantam kusikuchkani,
qamllapim ñoqaqa kallpanchakuchkani,
enemigoykunapa simintam upallachini,
salvaykuwasqaykimantam kunanqa kusikuchkani.
2Dios Taytalláy,
¡Qam hina chuyaqa manam pipas kanchu!
¡Qanmanta hukqa manam pipas kanchu!
¡Qam hina harkaykuwaqniyqa manam pipas kanchu.
3Amayá pipas rimachunchu hatun tukuspaqa,
amayá pipas alabakuchunchu llumpaytaqa,
Tayta Diosmi yachan runapa tukuy allin mana allin ruwasqanta.
4Payqa kallpasapakunapa flechankuna pakipaqmi,
mana kallpayuq runata kallpanchaqmi.
5Saksaruspa puchupakuqkunam kunanqa parten tantallapaqña llamkapakuchkanku,
yarqaymanta kaqkunam saksasqaña kachkanku,
mana wachakuqkunapas qanchiskama wawayuqñam kachkanku,
achka wawayuqkunañataqmi mana wachakuqña kachkanku.
6Tayta Diosllam wañuchinpas kawsachinpas,
payllataqmi wañuqkunapa kasqanman wischuykuqpas,
chaymanta hurqomuqpas.
7Tayta Diosllam wakchayachiqpas apuyachiqpas,
payllataqmi uchuychaqpas hatunchaqpas.
8Diosllam wakchatapas hatarichin,
payllam millay lugarmanta usuqkunatapas sayarichin,
allin reqsisqa runakunawanmi tiyaykachin.
Tayta Diosmi kay pachata takyachin.
9Payqa hapipakuqninkunatam waqaychan,
mana allin runakunam ichaqa tutayaypi chinkanqaku,
manam pipas vencenmanchu kikinpa kallpallanwanqa.
10 #
Lc 1.46-55. Tayta Diosmi chinkarachinqa contranpi sayariqkunataqa,
hanaq pachamantam rayokunata hawankuman kachaykamunqa.
Tayta Diosmi juzganqa kay pachapi runakunataqa;
kallpanchanqam akllakusqan reytapas,
akllakusqanpa atiynintam hatunchanqa, nispa.
11Chaymantam Elcanaqa Ramá llaqtapi wasinman kutikurqa; Samuelñataqmi sacerdote Eliywan qeparurqa Tayta Diosta servinanpaq.
Eliypa churinkuna huchallikusmanta
12Eliypa churinkunam karqaku mana allin ruwaqkuna. Paykunaqa manam Diosta manchakurqakuchu, 13nitaq sacerdote kaspa llaqta nanachikuyninkutapas. Chaymi runakuna costumbreman hina sacrificiota Diosman ofreceptinku, sacerdotepa sirvienten trincheyuq rispan aychata yanuchkaptinku, 14chay trinchiwan mankamanta aychachata atisqanta sacerdotepaq hurqokamuq.
Chaynatam ruwaqku Silo llaqtaman riq llapallan Israel runakunawan. 15Chaynataqmi altarpi wirata manaraq kañachkaptinku, sacerdotepa sirvienten rispan, Diosman sacrificio ofreceq runata niq:
Sacerdotepaq kankanaypaqyá aychata qoway. Yanusqatañaqa manam chaskisunkimanchu, aswanqa chawallatam, nispan.
16Sichum animal ofreceq runa niq:
Wiranraqyá puntataqa ruparuchun chaymantañayá munasqaykita hurqokuykuy, nispa.
Hinaptinqa sirvientem niq:
Manam ¡Kunanmi qowankiqa! Mana chayqa qechurusqaykipunim, nispa.
17Chaynatam chay joven sacerdotekunaqa Diospa qayllanpi millakuypaqta huchallikuqku. Paykunaqa Diosman qosqanku ofrendakunatam mana kaqpaq hapiqku.
18Samuelñataqmi linomanta efodwan pachasqa Diosta serviq. Payqa karqa warmallaraqmi. 19Sapa watam Anaqa qosantin, costumbrenkuman hina sacrificiota Diosman ofrecenanpaq Silo llaqtaman hamuspa, Samuelpaq pachata ruwaspan apamuq. 20Chaymi sacerdote Elí, Elcanatawan warmin Anata bendecirqa kaynata nispan:
Tayta Diosyá kay warmikipi, Diosmanta mañakusqan wawapa rantinpi, achka churikikunata qosunki, nispa.
Chaymantam wasinkuman kutikurqaku. 21Hinaptinmi Diospa yanapakuyninwan Ana wiksayakururqa, chaymi wachakurqa kimsa qari wawakunata chaynallataq iskay warmi wawakunatapas. Samuelñataqmi Diospa ñawpaqninpi wiñarqa.
22Sacerdote Eliymi llumpay machuña karqa, yacharqam churinkunapa Israel runakunawan millay hucha ruwasqankuta, yacharqataqmi Diosman asuykuna carpapa punkunpi serviq warmikunawan puñukusqankutapas. 23Chaymi paykunata Elí nirqa:
¿Imanasqataq kaykunata ruwankichik? Ñoqamanmi llaqtantin runakuna willawanku mana allin ruwasqaykichikta. 24Churillaykuna amayá kaykunataqa ruwaychikchu, llaqtantin runakunam qamkunamanta mana allinta rimanku. 25Sichum pipas runamasinpa contranpi huchallikuptinqa Diosmi allinyanachinman. Ichaqa pipas Tayta Diospa contranpi huchallikuptinqa ¿pitaq paywan allinyanachinman? nispa.
Chaynata taytanku niptinpas paykunaqa manam kasukurqakuchu. Tayta Diosqa ñam tantearurqaña paykunata wañurachinanpaq.
26Samuelñataqmi wiñarqa, Diospa chaynataq runakunapa qayllanpi allin qawasqa.
27Huk punchawmi Diospa profetan, sacerdote Eliyman hamuspan nirqa:
Tayta Diosmi nin: “Egipto nacionpi ñawpaq taytaykikuna rey Faraonta servichkaptinkum, paykunaman rikurirqani.
28 #
Ex 28.1-4. #
Lv 7.35-36. Chaymi Israelpi llapallan ayllukunamanta ñawpaq taytayki Aaronpa castankunata akllarqani sacerdoteykunaña kanankupaq, chaynapi animalkunata altarniypa hawanpi chaynataq inciensotapas kañapuwanankupaq hinaspa efodwan churakuspa ñawpaqniypi serviwanankupaq. Qorqanitaqmi Israelpa mirayninkunapa kañasqan ofrendakunatapas. 29¿Imanasqataq ñoqapa kamachisqay sacrificiokunata chaynataq ofrendakunata mana valeqpaq hapirunkichik? ¿Imanasqataq ñoqamantapas mastaraq churikikunata hatuncharunki? Israel llaqtaypa allinnin ofrendakunawanmi paykunata wirayarachinki”, nispa.
30Chayraykum Israelpa yupaychasqan Tayta Dios kaynata nin: Ñoqam nirqani miraynikipas chaynataq ñawpaq taytaykikunapa mirayninpas wiñaypaqña serviwanankupaq. Kunanmi ichaqa prometekusqayta mana ruwasaqñachu. Ñoqaqa pim hatunchawaqniytam hatunchasaq, qepanchawaqniytam ichaqa asllapaq hapisaq.
31Hamuchkanmi punchawkuna aylluykiman chaynataq ñawpaq taytaykikunaman atiy qosqayta chinkarachinaypaq. Castaykimantaqa manañam pipas machuyayman chayanqachu.
32Israelpa mirayninkunata sumaqllataña yanapaptiymi paykunamanta envidiakunki. Qampa aylluykimantaqa manañam pipas yuyaqyaykamaqa chayanqañachu. 33Altarniypi serviwananpaq aylluykimanta hukllatapas puchuchispayqa puchuchisaq waqasqallaykipi kanaykipaqmi, sonqoykipas nanaypi kananpaqmi. Wakin miraynikikunaqa kallpankupi kachkaspallaraqmi wañuchisqa kanqaku.
34Kaymi qampaq señal kanqa: Churiki Fineeswan Ofnim chay punchawllapi wañunqaku. 35Ñoqam ichaqa allin sacerdoteyta akllakusaq sonqoyman hinaspa munasqayman hina ruwaqta, mirayninpas allin takyaqmi kanqa; sapaqchakusqay reytam sapa punchaw servinqa.
36Chaymi pipas aylluykimanta kawsasparaq qepaqqa, ñawpaqninpi qonqorakuykuspan ninqa: “Ama hina kaspaykiyá asllaña pagawanayki kaptinpas otaq parten tantallaña qowanayki kaptinpas, sacerdotekunaman hina llamkayta qoykullaway, chaynapi asllatapas mikunaypaq”, nispa.
Currently Selected:
1 Samuel 2: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012