Filiipu 1
1
Sɛtʋ
1Ma Pɔɔlɩ, ma nɛ Timootee ɖɩkɛ Krɩstʋ Yesu tʋmlaɖaa. Ɖamaɣnɩ takayaɣ kanɛ. Đɩmaɣ-kɛ mbá mɩ ɩkɛ Ɛsɔ ñɩma mɩ nɛ Krɩstʋ Yesu mɩ-kpɛndʋʋ yɔɔ nɛ ɩwɛɛ Filiipu tɛtʋ taa yɔ mɩtɩŋa payɩ. Đɩmaɣ-kɛ mɩ nɛ mɩ-ŋgbɛyɛ taa ñɩma yɔɔ cɔnɩyaa nɛ mbá pɛkɛ tayɩyaa ɖɩ-taa yɔ. 2Đɩsɛ-mɩ: ɖa-Caa Ɛsɔ nɛ Kɩpaɣlʋ Yesu Krɩstʋ palabɩ-mɩ lootiye nɛ pɛhɛzɩ mɩ-laŋa.
Pɔɔlɩ sɛɣ Ɛsɔ
3Alɩwaatʋ ndʋ́ tɩtɩŋa payɩ mɔntɔzʋʋ mɩ-yɔɔ yɔ, mansaŋ Ɛsɔ mɩ-yɔɔ. 4Alɩwaatʋ ndʋ́ tɩtɩŋa payɩ mɛnsɛɣ Ɛsɔ mɩtɩŋa mɩ-yɔɔ yɔ, mɛnsɛɣ-ɩ nɛ laŋhʋlʋmɩyɛ. 5Mbʋ́ pʋyɔɔ yɔ, kpaɣ kɩyakʋ ŋgʋ́ ɩpɩsɩ Krɩstʋ ñɩma yɔ, ɩwɛ sɩnaʋ yɔɔ nɛ pʋkɔɔ pɩsɩɩnɩ alɩwaatʋ tʋnɛ nɛ ɛ-Laŋhɛzɩyɛ Tɔm tɛzɩɣ cɔʋ. 6Manawa se paa pɩɩla ɛzɩma yɔ, Ɛsɔ weyi ɛpazɩ tʋmɩyɛ kɩbanɖɛ mɩ-taa yɔ, ɛlakɩ-ɖɩ ḿbʋ́ nɛ ɛkɔɔ ɛtɛm-ɖɩ kɩyakʋ ŋgʋ́ Krɩstʋ Yesu kɔŋ yɔ. 7Pʋmʋnaa se mamaɣzɩ mɩtɩŋa mɩ-yɔɔ ḿbʋ́. Mɔnsɔɔlɩ-mɩ siŋŋ, mbʋ́ pʋyɔɔ yɔ, lootiye nɖɩ́ Ɛsɔ labɩ-mɩ yɔ, ma nɛ mɩtɩŋa payɩ ɛlabɩ-ɖɩ paa lɛɛlɛɛyɔ mɛwɛʋ salaka taa yɔ, yaa maawɛʋ man-tɩ yɔɔ nɛ malʋkɩ Laŋhɛzɩyɛ Tɔm yɔɔ nɛ mawɩlɩɣ ɛyáa se tɩkɛ toovenim yɔ. 8Ɛsɔ na sɔɔlɩm mbʋ́ mɔnsɔɔlɩ mɩtɩŋa siŋŋ yɔ. Ḿbʋ́ lɛ Krɩstʋ Yesu sɔɔlɩm kpem.
9Mentendiɣ Ɛsɔ se eyele nɛ ɩtɛzɩ ɖama sɔɔlʋʋ nɛ ɩpɩzɩ ɩtɩlɩ toovenim nɛ ɩtɛzɩ nɩʋ pɩtɩŋa pɩ-taa 10nɛ ɩpɩzɩ ɩlɩzɩ mbʋ́ pɩkɩlɩ ɖeu yɔ. Ḿbʋ́ yekina nɛ ɩwɛɛ cɩɖɩcɩɖɩ nɛ paanaɣ kawanaɣ nakɛyɛ mɩ-yɔɔ puwiye nɖɩ́ Krɩstʋ lɩzɩɣ ɛ-tɩ nɛ ɛwɩlɩ yɔ 11nɛ ɛ-lakasɩ kʋtʋʋzasɩ tɛzɩ ɖɔʋ mɩ-taa nɛ siyele pasa Ɛsɔ nɛ paɖʋ-ɩ hɩɖɛ.
Laŋhɛzɩyɛ Tɔm yɛlɩɣ
12Taabalaa! Mancaɣ se ɩtɩlɩ se mbʋ́ pɩtalɩ-m yɔ, halɩ piyeba nɛ ɖɩtɛzɩɣ Laŋhɛzɩyɛ Tɔm susuu. 13Ḿbʋ́ yebina nɛ wiyaʋ sɔsɔ ɖɩɣa yɔɔ ɖaŋɩyaa nɛ ɛyáa lɛlaa, patɩŋa payɩ patɩlɩ se malakɩ Krɩstʋ tʋmɩyɛ yɔɔ paɖʋ-m salaka. 14Đɔɖɔ lɛ, mbá pɛkɛ ɖa-taabalaa pa nɛ Kɩpaɣlʋ pɛ-kpɛndʋʋ yɔɔ yɔ, pa-taa sakɩyɛ nawa se mɛwɛ salaka taa lɛ, pɩlabɩ-wɛ hʋnʋm nɛ pɛtɛzɩɣ susuu Ɛsɔtɔm kaalɛyɩtʋ.
15-17Toovenim lɛ, pa-taa nabɛyɛ taa wɛnɩ-m nɛ posusuu Krɩstʋ tɔm nɛ ɛsɩsɛmɩyɛ. Ɛlɛ́, pa-taa lɛlaa ñosusaɣ-tʋ nɛ lɩmaɣza kɩbana. Paba lakɩ ḿbʋ́ nɛ sɔɔlɩm, mbʋ́ pʋyɔɔ yɔ, pɛtɛm naʋ se Ɛsɔ ɖʋnɩ-m cɩnɛ se malʋ Laŋhɛzɩyɛ Tɔm yɔɔ. Piyele kajalaɣ ñɩma yɔ, paasusuu Krɩstʋ tɔm nɛ lɩmaɣza kɩbana. Pañɩnɩɣ se pala mɔ-yɔɔ ɛsɩsɛmɩyɛ nɛ piyele mɛntɛzɩ labʋ kʋñɔŋ salaka taa.
18Pɩna-m nɛ we! Paa pɛwɛnɩ lɩmaɣza kɩdɛkɛdɛɛ yaa wena amʋnaa yɔ yɔ, Krɩstʋ tɔm posusuu. Pʋ-yɔɔ lɛ, man-taa hʋlʋmaa. Halɩ pʋhʋlʋmʋʋ ḿbʋ́ tam. 19Mbʋ́ pʋyɔɔ yɔ, manawa se mɩ-Ɛsɔ sɛʋ nɛ Yesu Krɩstʋ Fezuu sɩnaʋ pɔ-yɔɔ lɛ, pɩtɩŋa payɩ pʋkɔŋ yabʋ ma-ñʋʋ. 20Mbʋ́ me-liu wɛɛ siŋŋ nɛ manɖaŋ-pʋ yɔ lɛ se fɛyɛ ɛtaatɩɩkpaʋ-m kpem. Ɛlɛ́, lɛɛlɛɛyɔ paa mansɩba yaa mɛwɛ wezuu yɔ, pɩtɩŋɩɣnɩ mɔ-yɔɔ ɛzɩ pɩpam labʋ yɔ nɛ Krɩstʋ hɩɖɛ sɛɛ nɛ paa weyi ɛna kaŋŋ. 21Mbʋ́ pʋyɔɔ yɔ, Krɩstʋ kɩlɩnɩ-m wazaɣ me-wezuu caɣʋ taa nɛ sɩm ñɛkɛnɩ-m kɛzɛɣa. 22Ɛlɛ́, yee mɛwɛ wezuu nɛ manpɩzɩɣ se mantasɩ tʋmɩyɛ wazaɣ ñɩnɖɛ naɖɩyɛ labʋ yɔ, pʋbʋ maanaɣ se malɩzɩ wezuu naa sɩm. 23Mɛwɛ cenje: me-liu wɛɛ se meyele kedeŋa yɔɔ wezuu kʋnɛ nɛ mowolo ma nɛ Krɩstʋ ɖɩwɛɛ. Ḿbʋ́ kɩlɩnɩ ɖeu kpem. 24Ɛlɛ́, mɩ-yɔɔ lɛ, pɩkɩlɩ wazaɣ se mantasɩ caɣʋ wezuu. 25Ḿbʋ́ manawa kpem. Manawa se mantasɩɣ caɣʋ wezuu nɛ mɛwɛɛ mɩtɩŋa payɩ mɩ-cɔlɔ nɛ mansɩnɩ-mɩ nɛ ɩɖɛɛnɩ ɛsɩndaa nɛ mɩ-laŋa hʋlʋmɩ mi-lidaʋ wɛnaʋ taa. 26Yee ḿbʋ́, alɩwaatʋ ndʋ́ manpɩsɩɣ mɩ-cɔlɔ yɔ, ɩtɛzɩɣ-m kʋndɩnaʋ mɩ nɛ Krɩstʋ Yesu mɩ-kpɛndʋʋ taa.
Laŋhɛzɩyɛ Tɔm susuu lʋbɩyɛ
27Mbʋ́ pʋwɛɛ yɔ lɛ se: ɩɖɔ camɩyɛ ɛzɩ Krɩstʋ Laŋhɛzɩyɛ Tɔm pɔzʋʋ yɔ. Yee ḿbʋ́, paa mɔnkɔm se mana-mɩ yaa mɔntɔkɔɔ yɔ, manɩɩ se ɩɖɔkɩ mɩ-tɩ kpam ḿbʋ́ nɛ ɩwɛnɩ lɩmaɣza kʋɖʋmɛɛ nɛ laŋɩyɛ kʋɖʋmɖɩyɛ, tʋmɩyɛ nɖɩ́ ɩlakɩ se ɛyáa etisi Laŋhɛzɩyɛ Tɔm ńdʋ́ yɔ ɖɩ-taa. 28Pʋbʋ, sɔɔndʋ ɛɛkpaɣ-mɩ nɛ mi-koyindinaa nabʋyʋ taa. Ḿbʋ́ wɩlɩɣnɩ-wɛ se nʋmɔʋ kilebuu taa pɛwɛɛ nɛ pɩwɩlɩ-mɩ se mɩ mɩwɛ ñʋʋ yabʋ nʋmɔʋ taa, Ɛsɔ cɔlɔ pɩlɩnaa. 29Ɛsɔ ha-mɩ se ɩwɛnɩ lidaʋ Krɩstʋ yɔɔ nɛ ɩtɛ ɩtɔɔ kʋñɔŋ ɛ-yɔɔ ɖɔɖɔ 30nɛ ɩlʋ lʋbɩyɛ nɖɩ́ ɩna malʋkaɣ yɔ. Ńɖɩ́ mɔnɖɔŋ lʋbʋ lɛɛlɛɛyɔ nɛ ɩnɩɣ ɖɩ-taŋ.
Currently Selected:
Filiipu 1: KABI
Highlight
Share
Copy
Want to have your highlights saved across all your devices? Sign up or sign in