Filiipu 2
2
Krɩstʋ luzi ɛ-tɩ nɛ ɛla ɛyáa tʋmɩyɛ
1Manawa se mɩ nɛ Krɩstʋ mɩ-kpɛndʋʋ yeki nɛ ɩkpa ɖoŋ nɛ ɛ-sɔɔlɩm ñeyele nɛ pɩlabɩ-mɩ hʋnʋm. Manawa ɖɔɖɔ se mɩ nɛ Fezuu Kiɖeɖeu ɩlabɩ nɔɔ kʋɖʋmaɣ nɛ ɩsɔɔlɩ ɖama nɛ ɩnaɣ ɖama pʋtɔdɩyɛ. 2Yee ḿbʋ́ ɩnɩɩnɩ ɖama siŋŋ nɛ man-taa tɛzɩ hʋlʋmʋʋ, ɩsɔɔlɩ ɖama nɛ ɩwɛnɩ hɔyɛ kʋɖʋmɖɩyɛ nɛ lɩmaɣza kʋɖʋmɛɛ. 3Ɩtaala nabʋyʋ se ɩkɩlɩnɩ lɛlaa yaa ɩkʋndɩnɩ-pʋ falaa. Ɛlɛ́, iluzi mɩ-tɩ ɖama tɛɛ, paa weyi ɛkpaɣ lɛlaa se pakɩlɩ ɛ-maɣmaɣ. 4Paa weyi lɛ, ɛtaañɩnɩ ɛ-maɣmaɣ ɛ-kɛzɛɣa ɖeke. Ɛlɛ́, ɛmaɣzɩ lɛlaa ñɩŋga yɔɔ ɖɔɖɔ. 5Ɩwɛnɩ wɛtʋ ndʋ́ Krɩstʋ Yesu kɛwɛna yɔ.
6Ɛ nɛ Ɛsɔ paawɛ kɩmaŋ. Ɛlɛ́, ɛtakpaɣ ɖɔndɩyɛ ńɖɩ́ nɛ ɛ́yáa pʋyʋ. 7Ɛ-maɣmaɣ eyebi mbʋ́ pɩtɩŋa payɩ ɛɛwɛna yɔ pʋ-tɔm nɛ ɛpɩsɩ tʋmlaɖʋ nɛ ɛwɛɛ ɛzɩ ɛyáa yɔ. 8Ɛpɩsɩ ɛyʋ lɛ, ɛtɛzɩ ɛ-tɩ luzuu kpem nɛ ɛña Ɛsɔ nɛ ɛkɔɔ ɛsɩ. Halɩ kaamaŋkaɣ yɔɔ ɛsɩba. 9Pʋ-yɔɔ ɛ́lɛ́ kpazɩ-ɩ lone nɖɩ́ ɖɩkɩlɩ kʋyʋʋ yɔ ɖɩ-taa nɛ ɛ́yáa-ɩ hɩɖɛ nɖɩ́ ɖɩkɩlɩ lɛɛna tɩŋa payɩ yɔ. 10Ɛlabɩ ḿbʋ́ se mbʋ́ pɩtɩŋa payɩ pʋwɛ ɛsɔdaa nɛ tataa cɩnɛ nɛ halɩ pɩkpɛndɩnɩ tɛtɛɛ yɔ, pɩnɩ hɩɖɛ ńɖɩ́ se Yesu lɛ, pɩñam-ɩ nɛ puluŋ pɩ-nɩmbɔla yɔɔ nɛ 11pʋtɔ se Yesu Krɩstʋ lɛ Kɩpaɣlʋ se Caa Ɛsɔ hɩɖɛ ɛsɛɛ.
Mbʋ́ pʋwɛɛ se Krɩstʋ ñɩma ɛla kedeŋa yɔɔ yɔ
12Mɛ-ɛgbaɣdɩnaa! Đenɖe Ɛsɔ yabɩ mɩ-ñʋʋ yɔ, ɩwɛɛ tʋmɩyɛ labʋ yɔɔ ñʋʋ yabʋ ḿbʋ́ pɩ-taa. Ɩlakɩ-ɖɩ lɛ, ɩña Ɛsɔ nɛ ɩsɔɔndɩ-ɩ. Ḿbʋ́ ɩpam labʋ alɩwaatʋ ndʋ́ maawɛ mɩ-cɔlɔ yɔ. Lɛɛlɛɛyɔ, ɖenɖe mɛnfɛyɩ mɩ-cɔlɔ yɔ, pʋwɛɛ se ɩla ḿbʋ́ ɖɔɖɔ nɛ pɩkɩlɩ. 13Toovenim lɛ, Ɛsɔ yekina se itisi nɛ ɩla tʋmɩyɛ ɛzɩ pɩkɛdɩnaʋ ɛ-maɣmaɣ nɛ ɛɖʋ yɔ.
14Mbʋ́ pɩtɩŋa payɩ ɩlakɩ yɔ, ɩlabɩ-pʋ, ɛlɛ́, ɩtaamidi mi-liŋ tɛɛ nɛ ɩhɔŋnɩ ɖama tɔm. 15Ɩla ḿbʋ́ nɛ pataana kawanaɣ nakɛyɛ mɩ-yɔɔ nɛ ɩwɛɛ cɩɖɩcɩɖɩ nɛ ɩkɛ Ɛsɔ piya nzɩ́ paanaɣ sɩ-yɔɔ kɩwɛɛkɩm nabʋyʋ yɔ kedeŋa yɔɔ cɩnɛ ɛyáa azaɣ́a nɛ kɩtatʋʋzɩŋ pɛ-hɛkʋ taa. Mɩ lɛ ñalɩmɩyɛ pɛ-hɛkʋ taa ɛzɩ ɛsɔdaa tɩɩnzɩ yɔ. 16Miheyiɣni-wɛ tɔm ndʋ́ tɩhaɣ wezuu yɔ. Ḿbʋ́ yekina nɛ mankʋndɩ puwiye nɖɩ́ Krɩstʋ lɩzɩɣ ɛ-tɩ nɛ ɛwɩlɩ yɔ. Ḿbʋ́ wɩlɩɣnɩ toovenim se tʋmɩyɛ nɖɩ́ mañaɣ pana nɛ mala yɔ, ɖɩtɛkɛ falaa ñɩnɖɛ. 17Mi-lidaʋ ŋgʋ́ ɩwɛnɩ Ɛsɔ yɔɔ yɔ, kʋwɛ ɛzɩ kɩlaʋ ŋgʋ́ ɩlaɣ-ɩ yɔ. Pʋtɔma yɔ, pakʋʋ-m nɛ man-calɩm sɔzɩ mɩ-kɩlaʋ ŋ́gʋ́ kʋ-yɔɔ. Paa pɩlaba ḿbʋ́ yɔ, man-taa hʋlʋmʋʋ nɛ ma nɛ mɩ ɖɩmayɩ amaya. 18Mɩ ɖɔɖɔ lɛ, mɩ-taa ɛhʋlʋmɩ nɛ ma nɛ mɩ ɖɩkpɛndɩ ɖɩmayɩ amaya.
Pɔɔlɩ tiyi Timootee nɛ Epafroditi Filiipu Krɩstʋ ñɩma cɔlɔ
19Mantaɣ liu se yee Kɩpaɣlʋ Yesu etisaa yɔ, mentiyiɣni-mɩ Timootee kɩyakɩŋ ɩnɛ ɩ-taa nɛ pɩpɩzɩ pɩlabɩ-m leleŋ alɩwaatʋ ndʋ́ ɛpɩsɩɣ ɛkɔɔ nɛ eheyi-m mɩ-tɔm yɔ. 20Mbʋ́ pʋyɔɔ yɔ, mbá patɩŋa payɩ pamaɣzɩɣ mɩ-yɔɔ yɔ, pa-taa lɛ, ma nɛ e-ɖeke koŋ ɖɩwɛnɩnɩ lɩmaɣza kʋɖʋmɛɛ nɛ ɖɩñɩnɩɣ mɩ-kɛzɛɣa. 21Lɛlaa tɩŋa payɩ ñɩnɩɣ pa-maɣmaɣ pɛ-kɛzɛsɩ, ɛlɛ́ paañɩnɩɣ Krɩstʋ Yesu ñɩŋga. 22Piyele ɛnʋ lɛ, ɩtɛm sɩm ɛ-yɔɔ se ɛlakɩ mbʋ́ ɛɖʋwa se ɛlakɩ yɔ: ɛsɩnɩ-m nɛ ma nɛ ɩ ɖɩla tʋmɩyɛ ɛzɩ pɩɣa nɛ ka-caa yɔ nɛ Laŋhɛzɩyɛ Tɔm tɛzɩɣ cɔʋ. 23Mantaɣ liu se manaɣ mbʋ́ pɩtɛŋnɩ-m yɔ lɛ, mentiyiɣni-mɩ-ɩ. 24Kɩpaɣlʋ yɔɔ lɛ, mantaɣ liu se ma-maɣmaɣ mɔnkɔŋ ɖɔɖɔ alɩwaatʋ tʋnɛ tɩ-taa nɛ mana-mɩ.
25Manawa se pʋwɛɛ se meyele nɛ man-taabalʋ Epafroditi pɩsɩ mɩ-cɔlɔ. Ma nɛ ɩ ɖɩlakɩnɩ tʋmɩyɛ nɛ ɖɩlʋkɩ Laŋhɛzɩyɛ Tɔm yɔɔ. Miitiyini-i mɔn-cɔlɔ se ɛkɔɔ ɛsɩnɩ-m alɩwaatʋ ndʋ́ maawɛ kɩcɛyɩm taa yɔ. 26E-liu kaawɛ siŋŋ se ɛna mɩtɩŋa payɩ. Peheyi-i se ɩnɩwa se pɩwɩɣ-ɩ lɛ, ɛ-lɩmaɣza wɛɛkɩ. 27Toovenim lɛ, pɩwɩ-ɩ sɩbʋ yɔɔ sɩbʋ yɔɔ. Ɛlɛ́, Ɛsɔ na ɛ-pʋtɔdɩyɛ. Pɩtɛkɛ e-ɖeke ɛ-ñɩnɖɛ ɛnawa. Ɛna ɖɔɖɔ ma-ñɩnɖɛ se mɛ-ɛsɛ ɛtaapaŋ ñɩŋʋʋ. 28Pʋ-yɔɔ menkpedesiɣ se meyele nɛ ɛpɩsɩ mɩ-cɔlɔ nɛ ɩna-ɩ nɛ mɩ-taa ɖaɣnɩ hʋlʋmʋʋ nɛ ma ɖɔɖɔ lɛ, mɛ-ɛsɛ ɛtaatasɩ ñɩŋʋʋ. 29Pʋ-yɔɔ lɛ, ɩmʋ-ɩ nɛ laŋhʋlʋmɩyɛ siŋŋ mɩ nɛ Kɩpaɣlʋ mɩ-kpɛndʋʋ taa. Pʋwɛɛ se ɩña ɛyáa mbá patɩŋa payɩ pɛwɛ ɖɔɖɔ ɛzɩ ɛnʋ yɔ. 30Mbʋ́ pʋyɔɔ yɔ, Krɩstʋ tʋmɩyɛ yɔɔ ɛcaɣaɣ sɩbʋ: ecoɖi sɩm se ɛsɩnɩ-m sɩnaʋ mbʋ́ mɩ-maɣmaɣ ɩtaapɩzɩɣ se ɩsɩnɩ-m yɔ.
Currently Selected:
Filiipu 2: KABI
Highlight
Share
Copy
Want to have your highlights saved across all your devices? Sign up or sign in