2 Pɩyɛ 3
3
Kɩpaɣlʋ pɩsɩɣ kɔm
1Mɛ-ɛgbaɣdɩnaa, ɩɩnaɣ takayaɣ naalɛ ñɩŋga ŋgá mamaɣ-mɩ yɔ. Ka nɛ kajalaɣ ñɩŋga sɩ-naalɛ sɩ-taa lɛ, mancaɣ se mɔntɔzɩ-mɩ mbʋ́ ɩtɛm sɩm yɔ nɛ menfezi mɩ-lɩmaɣza nɛ ɩmaɣzɩ camɩyɛ. 2Me-liu wɛɛ se ɩtɔzɩ tɔm ndʋ́ náyaa kiɖeɖema yɔɔdɩ ɖooo lɔŋ yɔ tɩ-yɔɔ. Ɩtɔzɩ ɖɔɖɔ paɣtʋ ndʋ́ Kɩpaɣlʋ weyi ɛkɛ ɖa-ñʋʋ yaɖʋ yɔ, ɛtɩŋnɩ e-tiyiyaa yɔɔ nɛ eheyi-mɩ se ɩla yɔ tɩ-yɔɔ. 3Mbʋ́ pʋwɛɛ se ɩtɩlɩ kpem yɔ lɛ se kɛtɛzaɣ alɩwaatʋ taa lɛ, mbá powoŋuu-mɩ yɔ, pɔkɔŋ lɩʋ. Pɔkɔŋ labʋ ɛzaɣ́tʋ ndʋ́ pa-maɣmaɣ pe-liu wɛɛ yɔ 4nɛ pɔtɔ se: «Kɩpaɣlʋ tɔm se ɛkɔŋ lɛ, pɩla ɛzɩma? Le ɛwɛɛ yɔ? Mbʋ́ pʋyɔɔ yɔ, ɖooo ɖa-caanaa sɩbʋ nɛ halɩ nɛ sɔnɔ yɔ, pɩtɩŋa payɩ pʋwɛ pi-ɖeɖe ɛzɩ ɖooo pɩɩwɛʋ alɩwaatʋ ndʋ́ Ɛsɔ labɩ kedeŋa yɔ.» 5Ɛyáa mbá pɔpɔzʋʋ pa-tɩ ḿbʋ́ yɔ, paacaɣ petisi se: ɖooo lɔŋ Ɛsɔ kɔyɔɔdɩ kʋyɔɔdʋ se ɛsɔdaa nɛ tɛtʋ palɩɩ nɛ palɩɩ ɖɔɖɔ. Ɛkpaɣ lɩm nɛ ɛlabɩnɩ tɛtʋ nɛ ɛtɩŋnɩ pʋ-yɔɔ nɛ ɛɖɔkɩ-tʋ. 6Lɩm ɖɔɖɔ Ɛsɔ keɖezini mbʋ́ pɩtɩŋa payɩ pʋwɛ kedeŋa yɔɔ yɔ alɩwaatʋ ndʋ́ eeyeba nɛ tɛʋ sɔsɔʋ nɩɩ nɛ lɩm su kɔ-yɔɔ yɔ. 7Ɛsɔ kɔyɔɔdɩ kʋyɔɔdʋ ɖɔɖɔ se ɛsɔdaa nɛ tɛtʋ mbá ɖɩnaɣ lɛɛlɛɛyɔ yɔ, pɛwɛɛ ḿbʋ́ nɛ pʋkɔɔ pɩsɩɩnɩ kɩyakʋ ŋgʋ́ paɖʋʋ-wɛ miŋ nɛ pañaɣ lusa yɔ. Puwiye ńɖɩ́ Ɛsɔ kɔŋ kañadɩnaa tɔm hʋnaʋ nɛ eyele pɛtɛŋɛlɩ.
8Ɛlɛ́, mɛ-ɛgbaɣdɩnaa, tɔm natʋyʋ wɛɛ, pɩfɛyɩ se ɩsɔɔ-tʋ kaʋ. Ńdʋ́ lɛ se: Kɩpaɣlʋ ɛsɩndaa lɛ, evemiye kʋɖʋmɖɩyɛ wɛ ɛzɩ pɩnzɩ kutoku nɛ pɩnzɩ kutoku ñɛwɛɛ ɛzɩ evemiye kʋɖʋmɖɩyɛ yɔ. 9Nabɛyɛ maɣzɩɣ se Kɩpaɣlʋ tala lɔŋ mbʋ́ eheyi ɛyáa se ɛlakɩ yɔ. Ŋgʋ́ pɩtɛkɛ ḿbʋ́. Ɛlɛ́, mɩ-yɔɔ ɛ́ɖɔ́kɩ ɛ-hɔyɛ. Mbʋ́ pʋyɔɔ yɔ, ɛtɔsɔɔlɩ se nɔɔyʋ ɛtɛŋɛlɩ. Ɛlɛ́, ɛsɔɔlaa se ɛyáa tɩŋa payɩ ɛlɛɣzɩ wɛtʋ.
10Kɩyakʋ ŋgʋ́ Kɩpaɣlʋ kɔŋ yɔ, pʋwɛɣ ɛzɩ mɩ́lʋ́ kɔŋʋʋ yɔ. Puwiye ńɖɩ́ lɛ, pɩyakɩ kɔkɔɖɛ sɔsɔɖɛ naɖɩyɛ siŋŋ nɛ ɛsɔdaa mʋʋ́ʋ. Miŋ ñakɩ mbʋ́ pʋwɛ ɛsɔdaa yɔ. Tɛtʋ nɛ mbʋ́ pɩtɩŋa payɩ pʋwɛ tɩ-yɔɔ yɔ, paatasɩɣ wɛʋ. 11Yee ḿbʋ́ pʋwɛɛ se pɩtɩŋa payɩ pʋkɔŋ ɖem yɔ, pʋwɛɛ se ɩɖɔ ɛzɩ pʋmʋnaʋ yɔ. Ɩwɛɛ cɩɖɩcɩɖɩ mi-wezuu caɣʋ taa nɛ ɩla mbʋ́ Ɛsɔ liu wɛɛ yɔ. 12Ɩla ḿbʋ́ nɛ ɩɖaŋnɩ kɩyakʋ ŋgʋ́ Ɛsɔ kɔŋ yɔ. Ɩñɔɔzɩ mɩ-tɩ nɛ kɩyakʋ ŋ́gʋ́ kɩtalɩ lɔŋ. Puwiye ńɖɩ́ ɛsɔdaa mʋ́ʋ miŋ nɛ mbʋ́ pʋwɛ peeɖe yɔ puyoli pɩtɩŋa. Pɩɩsɛkɩɣ pʋyʋ. 13Ɛlɛ́, Ɛsɔ heyi-ɖʋ se ɛlakɩ ɛsɔdaa kɩfalʋʋ nɛ tɛtʋ kɩfatʋ. Peeɖe mbʋ́ pʋtʋʋzaa yɔ pʋkɔŋ wɛʋ. Ḿbʋ́ ɖɩɖaŋaa yɔ.
Ɩɖɔkɩ mɩ-tɩ camɩyɛ
14Mɛ-ɛgbaɣdɩnaa, pʋ-yɔɔ lɛ, pɩ-ɖaŋʋʋ taa lɛ, pʋwɛɛ se ɩñaɣ pana nɛ ɩwɛɛ cɩɖɩcɩɖɩ Ɛsɔ ɛsɩndaa nɛ pataana kɩdɛkɛdɩm nabʋyʋ mɩ-yɔɔ. Ɩñaɣ pana ɖɔɖɔ nɛ ɩwɛɛ laŋhɛzɩyɛ taa ɛ-ɛsɩndaa. 15Ɩtɩlɩ se ɖa-Kɩpaɣlʋ hɔyɛ ɖɔkʋʋ haɣnɩ-mɩ waɖɛ se pɩya mɩ-ñʋʋ. Ḿbʋ́ Ɛsɔ ha ɖa-taabalʋ kʋsɔɔlʋ Pɔɔlɩ lɔŋsɩnɖɛ nɛ ɛma nɛ eheyi-mɩ ɖɔɖɔ. 16Pʋ-tɔm ɛma ɛ-takayɩsɩ nzɩ́ sɩtɩŋa sɩ-taa ɛkɛdɩ Kɩpaɣlʋ kɔm tɔm yɔ. Pʋwɛ kaɖɛ se ɛyáa ɛnɩɩ tɩ-taa natʋyʋ tɔbʋʋ. Tɔm ńdʋ́ ɛyáa mbá paasɩŋ pʋyʋ nɛ patapɩɩ yɔ, pɛɖɛzɩɣ kiŋgila nɛ yaayala. Palakɩ ɖɔɖɔ ɛzɩ palakʋʋ Ɛsɔtɔm Takayaɣ taa tɔm lɛɛtʋ yɔ. Ḿbʋ́ pelesiɣni pa-maɣmaɣ pa-tɩ.
17Mɛ-ɛgbaɣdɩnaa mɩ lɛ, lɛɛlɛɛyɔ pɛkɛdɩ-mɩ ɛyáa kɩdɛkɛdɩŋ ɩnʋ ɩ-tɔm. Pʋ-yɔɔ lɛ, ɩkpa mɩ-tɩ nɛ wɛ. Pɩtɛkɛ ḿbʋ́ yɔ, pɔkɔŋ pepeɣzi-mɩ nɛ ɩtɩŋ-wɛ. Peeɖe ɩɩtasɩɣ wɛʋ mi-ɖeɖe mi-lidaʋ wɛnaʋ taa. 18Ɛlɛ́, pʋwɛɛ se ɩɖɛɛnɩ ɛsɩndaa lootiye nʋmɔʋ taa nɛ ɩtɛzɩ sɩm ɖa-Kɩpaɣlʋ Yesu Krɩstʋ weyi ɛkɛ ɖa-ñʋʋ yaɖʋ yɔ. Pasam-ɩ kpaɣ lɛɛlɛɛyɔ nɛ paa ɛzɩmtaa. Pɩla ḿbʋ́!
Currently Selected:
2 Pɩyɛ 3: KABI
Highlight
Share
Copy
Want to have your highlights saved across all your devices? Sign up or sign in