1 Yohanɛɛsɩ KAJALAƔ TƆM
KAJALAƔ TƆM
Nɔɔ Haʋ Kɩfam Takayaɣ taa lɛ, takayɩsɩ naadozo nasɩyɩ wɛɛ nɛ payaɣ-sɩ se Yohanɛɛsɩ takayɩsɩ. Kajalaɣ ñɩŋga lɛ, patana mayʋ nɔɔyʋ hɩɖɛ kɔ-yɔɔ. Weyi ɛma takayaɣ kɩlɛlaɣ nɛ tozo ñɩŋga yɔ, ɛɖʋ sɩ-taa se payaɣ-ɩ se «Kɩbɩnʋ». Ɛɛkɛ Krɩstʋ ŋgbɛyɛ ñʋʋdʋ nɛ ɛyáa mbá ɛma-wɛ takayɩsɩ ńzɩ́ yɔ, pañaŋ-ɩ siŋŋ.
Kajalaɣ takayaɣ taa lɛ, pataɖʋ ɖoŋnɔɔyʋ mbá pama-wɛ-kɛ yɔ pa-hɩla. Takayaɣ kɩlɛlaɣ lɛ, pama-kɛ «Halʋ weyi Ɛsɔ lɩzaa yɔ nɛ e-piya». Pʋ-tɔbʋʋ lɛ se pama-kɛ Krɩstʋ ŋgbɛyɛ naɖɩyɛ nɛ ɖɩ-taa ɛyáa. Tozo ñɩŋga lɛ, pama-kɛ Krɩstʋ tʋ weyi payaɣ-ɩ se Gayuusɩ yɔ. Gayuusɩ ɛnʋ, ɛwɛ Krɩstʋ ŋgbɛyɛ nɖɩ́ ɖɩ-taa yɔ, ɖɩ-taa ɛyáa ɩɩnɩɣnɩ ɖama. Krɩstʋ ñɩma mbá pama-wɛ Yohanɛɛsɩ takayɩsɩ sɩnɛ sɩ-naadozo yɔ, pasɩm Laŋhɛzɩyɛ Tɔm ndʋ́ Yohanɛɛsɩ mawa yɔ camɩyɛ.
Pileɖaa ɛzɩ papazʋʋ heyuu ɛyáa Yesu Krɩstʋ tɔm yɔ. Krɩstʋ ñɩma mbá pakalɩɣ Yohanɛɛsɩ Laŋhɛzɩyɛ Tɔm yɔ, paanɩɣnɩ ɖama tɔm tʋnɛ tɩ-tɔbʋʋ yɔɔ. Pa-taa nabɛyɛ lɩ pa-aŋgba taa. Lɛlaa ñeyiɣdi aŋgba ana a-taa ɛyáa. Paacaɣ se petisi se Krɩstʋ pɩsɩ ɛyʋ. Yee ḿbʋ́ yɔ, Yesu ɛɛwazɩɣ-wɛ pʋyʋ: e-wezuu caɣʋ nɛ ɛ-sɩm fɛyɩnɩ wazaɣ nakɛyɛ pɛ-ɛsɩndaa. Pɔyɔɔdʋʋ se: «ɖɩtala kɩwɛɛkɩm», «ɖɩsɩm Ɛsɔ», «ɖɩwɛ ñalɩmɩyɛ taa». Ɛlɛ́, pɩtɛkɛ ńdʋ́ panaɣ pa-lakasɩ taa.
Weyi ɛma Yohanɛɛsɩ takayɩsɩ yɔ, eheyiɣ Krɩstʋ ñɩma se pataanɩɩ cɛtɩm tɔm ndʋ́ ɛyáa lɛlaa yɔɔdʋʋ Yesu nɛ Ɛsɔ pɔ-yɔɔ yɔ. Ɛsɔ piya wɛnɩ lidaʋ se toovenim Yesu Krɩstʋ pɩsɩ ɛyʋ. Mbá pɔyɔɔdʋʋ kɩfatʋ yɔ, pɛkɛ Krɩstʋ koyindinaa. Pʋwɛɛ se Ɛsɔ yɔɔ lidaʋ tayaa etisi tɔm ndʋ́ paanɩ ɖooo kiɖe tɛɛ yɔ, tɩ-yɔɔ. Tɔm ńdʋ́ tɩyɔɔdʋʋ pɩŋŋ se: yee ŋcaɣ ŋwɩlɩ se ŋsɔɔlɩ Ɛsɔ nɛ Krɩstʋ yɔ, sɔɔlɩ ɛyáa lɛlaa. Pʋwɛɛ se Krɩstʋ ñɩma lidaʋ nɛ mbʋ́ palakɩ pe-wezuu caɣʋ taa yɔ, pɩkɛ kʋɖʋmʋm.
Currently Selected:
1 Yohanɛɛsɩ KAJALAƔ TƆM: KABI
Highlight
Share
Copy
Want to have your highlights saved across all your devices? Sign up or sign in