1 Kɔrɛntɩ 1
1
Sɛtʋ
1Ma Pɔɔlɩ lɛ, pɩkɛdɩnɩ Ɛsɔ nɛ ɛya-m se mɛnkɛ Krɩstʋ Yesu tiyiyu. Ma nɛ taabalʋ Sɔstɛɛnɩ ɖɩmaɣnɩ-mɩ takayaɣ kanɛ. 2Đɩmaɣ-kɛ mbá mɩ ɩkɛ Ɛsɔ ŋgbɛyɛ taa ñɩma Kɔrɛntɩ yɔ. Ɛya-mɩ se pɩtɩŋnɩ Krɩstʋ yɔɔ nɛ ɩcaɣ wezuu ɛzɩ pɩkɛdɩnaʋ-ɩ yɔ. Pɩtɩŋnɩ mɩ nɛ Krɩstʋ Yesu mɩ-kpɛndʋʋ yɔɔ nɛ ɩkɛ ɛ-ñɩma. Đɩmaɣ-kɛ mɩ nɛ mbá patɩŋa payɩ pɛwɛ paa le nɛ payaɣ ɖa-Kɩpaɣlʋ Yesu Krɩstʋ hɩɖɛ yɔ. Yesu Krɩstʋ lɛ pa-Kɩpaɣlʋ. Ɛnʋ ɖɔɖɔ lɛ ɖa-Kɩpaɣlʋ.
3Đɩsɛ-mɩ: ɖa-Caa Ɛsɔ nɛ ɖa-Kɩpaɣlʋ Yesu Krɩstʋ palabɩ-mɩ lootiye nɛ pɛhɛzɩ mɩ-laŋa!
Ɛsɔ tɩŋɩɣnɩ Yesu Krɩstʋ yɔɔ nɛ ɛlakɩ-ɖʋ kɩbam
4Mansaŋ Ɛsɔ mɩ-yɔɔ paa ɖooye. Mbʋ́ pʋyɔɔ yɔ, ɛlabɩ-mɩ lootiye mɩ nɛ Krɩstʋ Yesu mɩ-kpɛndʋʋ taa. 5Toovenim lɛ, mɩ-kpɛndʋʋ ḿbʋ́ pʋ-yɔɔ ɩpɩsɩ ñɩm tɩnaa. Ɛsɔ ha-mɩ pɩtɩŋa payɩ. Kɔzɩkɔzɩ eyebu nɛ ɩtɩlɩ toovenim nɛ isusuu ɛ-tɔm yɔ. 6Mbʋ́ pʋyɔɔ yɔ, Krɩstʋ tɔm ndʋ́ ɖisusi-mɩ yɔ, tɩcaɣ mɩ-taa camɩyɛ. 7Pʋ-yɔɔ mbá mɩ ɩɖaŋ alɩwaatʋ ndʋ́ ɖa-Kɩpaɣlʋ Yesu Krɩstʋ kaɣ ɛ-tɩ lɩzʋʋ nɛ ɛwɩlɩ ɛyáa yɔ, pɩtɛsɛɣ kʋjɔʋ nakʋyʋ se Ɛsɔ talabɩ-mɩ. 8Ɛsɔ ɛnʋ ɛhaɣnɩ-mɩ ɖoŋ nɛ ɩɖɔkɩ mɩ-tɩ ḿbʋ́ ɛ-nʋmɔʋ taa nɛ pʋkɔɔ pɩsɩɩnɩ kɛtɛzaɣ wiye se pataana kɩdɛkɛdɩm nabʋyʋ mɩ-yɔɔ puwiye nɖɩ́ ɖa-Kɩpaɣlʋ Yesu Krɩstʋ kɔŋ yɔ. 9Ɛsɔ weyi ɛya-mɩ se mɩ nɛ ɛ-Pɩyalʋ Yesu Krɩstʋ weyi ɛkɛ ɖa-Kɩpaɣlʋ yɔ ɩkpɛndɩ ɩla nɔɔ kʋɖʋmaɣ yɔ, ɛlakɩ mbʋ́ ɛɖʋwa se ɛlakɩ yɔ.
Kɔrɛntɩ Yesu ŋgbɛyɛ taa ñɩma tayɩ ɖama
10Taabalaa Yesu ŋgbɛyɛ taa ñɩma, meheyiɣ mɩtɩŋa payɩ nɛ ɖa-Kɩpaɣlʋ Yesu Krɩstʋ nɔɔ se ɩnɩɩnɩ ɖama camɩyɛ. Tayʋʋ nabʋyʋ ɛtaawɛɛ mɩ-hɛkʋ taa. Ɛlɛ́, ɩla nɔɔ kʋɖʋmaɣ nɛ ɩwɛnɩ lɩmaɣza kʋɖʋma. 11Mbʋ́ pʋyɔɔ yɔ, Klowee tɛ ñɩma heyi-m se iyou. 12Ndʋ́ mɔyɔɔdʋʋ yɔ, tɩ-tɔbʋʋ se mɩ-taa nabɛyɛ wɛɛ pɔyɔɔdʋʋ se pɛkɛ Pɔɔlɩ ñɩma nɛ lɛlaa se paba kɛ Apoloosi ñɩma. Lɛlaa ñɔtɔŋ ɖɔɖɔ se paba ñɛkɛ Pɩyɛ ñɩma nɛ lɛlaa se pɛkɛ Krɩstʋ ñɩma. 13Krɩstʋ ɛnʋ patayɩ-ɩ yaa we? Ma Pɔɔlɩ pakam kaamaŋkaɣ yɔɔ mɩ-yɔɔ, yaa mɔ-nɔɔ palabɩnɩ-mɩ lɩm sɔʋ sɔnzɩ?
14Mansaŋ Ɛsɔ ɛzɩma mbʋ́ mantala mɩ-taa nɔɔyʋ lɩm sɔʋ sɔnzɩ nɛ pɩtasɩnɩ Krispuusi nɛ Gayuusi yɔ pʋ-yɔɔ. 15Pʋ-yɔɔ lɛ, nɔɔyʋ ɛɛpɩzɩɣ ɛyɔɔdɩ se mɔ-nɔɔ palabɩnɩ-mɩ-sɩ. 16Ahaɣaɣ, maasɔwa! Malabɩ-sɩ ɖɔɖɔ Stefanaasɩ nɛ ɛ-hɔʋ taa ñɩma. Pa-wayɩ lɛ, mantatasɩ tɔzʋʋ se malabɩ-sɩ nɔɔyʋ ɖɔɖɔ. 17Krɩstʋ tetiyi-m se mɔnkɔɔ mala ɛyáa lɩm sɔʋ sɔnzɩ. Ɛlɛ́, etiyi-m se monsusi Laŋhɛzɩyɛ Tɔm. Maasusuu-tʋ ɛyáa ɛzɩ weyi ɛyɔɔdʋʋnɩ ɛ-maɣmaɣ ɛ-lɔŋsɩnɖɛ camɩyɛ yɔ. Pɩtɛkɛ ḿbʋ́, sɩm mbʋ́ Krɩstʋ sɩbɩ kaamaŋkaɣ yɔɔ yɔ, pɩɩtasɩɣ wɛnaʋ wazaɣ nakɛyɛ.
Yesu Krɩstʋ kɛ Ɛsɔ lɔŋsɩnɖɛ nɛ e-ɖoŋ
18Tɔm ndʋ́ posusuu se Krɩstʋ sɩbɩ kaamaŋkaɣ yɔɔ yɔ, mbá pɛwɛ asayʋʋ nʋmɔʋ taa yɔ, panɩɣ-tʋ lɛ, tɩwɛ-wɛ ɛzɩ kɩmɛlɛndʋ tɔm yɔ. Ɛlɛ́, mbá ɖa payakɩ ɖa-ñʋʋ yɔ, tɩkɛnɩ-ɖʋ Ɛsɔ ɖoŋ. 19Pama Ɛsɔtɔm Takayaɣ taa se:
«Menɖeziɣ mbá pamaɣzɩɣ se pɛwɛnɩ lɔŋsɩnɖɛ yɔ pɔ-lɔŋsɩnɖɛ nɛ
mamʋʋzɩ mbá pamaɣzɩɣ se pɛwɛnɩ lɛɣtʋ yɔ
pɛ-lɛɣtʋ.»
20Yee ḿbʋ́ weyi ɛmaɣzɩɣ se ɛkɛ lɔŋsɩnɖʋ yɔ, se we ɛpɩzɩɣ ɛtasɩ yɔɔdʋʋ? Nɛ weyi ɛ́lɛ́ woba sukuli yɔ? Nɛ weyi ɛ́lɛ́ maɣzɩɣ se ɛsɩm tɔm yɔɔdʋʋ camɩyɛ yɔ, ɛwazɩɣ we? Se we ɛyáa panɛ patɩŋa papɩzɩɣ patasɩ yɔɔdʋʋ ɖɔɖɔ? Paawazɩɣ pʋyʋ, mbʋ́ pʋyɔɔ yɔ, Ɛsɔ wɩlaa se kedeŋa ñɩma lɔŋsɩnɖɛ kɛ kɩmɛlɛndʋ.
21Toovenim lɛ, kedeŋa ñɩma nɛ pɔ-lɔŋsɩnɖɛ patapɩzɩ patɩlɩ Ɛsɔ. Mbʋ́ pʋyɔɔ yɔ, ɛnʋ sɔɔlɩnɩ ḿbʋ́ ɛ-lɔŋsɩnɖɛ taa. Ɛlɛ́, ɛɖʋwa se ɛyakɩ mbá pɛwɛnɩ lidaʋ tɔm ndʋ́ ɖisusuu-wɛ yɔ tɩ-yɔɔ yɔ pa-ñʋʋ. Ŋgʋ́, tɔm ńdʋ́ tɩwɛ lɛlaa ɛzɩ kɩmɛlɛndʋ tɔm yɔ. 22Yuda ñɩma pɔzʋʋ se pala hama lakasɩ nɛ pana nɛ pʋcɔ petisi, Grɛɛkɩ ñɩma ñañɩnɩɣ lɔŋsɩnɖɛ se pʋcɔ. 23Piyele ɖa lɛ, ɖisusuu Krɩstʋ weyi pakam-ɩ kaamaŋkaɣ yɔɔ yɔ ɛ-tɔm. Tɔm ńdʋ́, tɩkɛnɩ Yuda ñɩma mbʋ́ putuuluu-wɛ yɔ nɛ tɩkɛnɩ mbá pɛtɛkɛ Yuda ñɩma yɔ ɛzɩ kɩmɛlɛndʋ tɔm yɔ. 24Ɛlɛ́, mbá Ɛsɔ yawa yɔ, paa pɛkɛ Yuda ñɩma yaa pɛtɛkɛ Yuda ñɩma yɔ, Krɩstʋ ɛnʋ, ɛkɛnɩ-wɛ Ɛsɔ ɖoŋ nɛ Ɛsɔ lɔŋsɩnɖɛ. 25Mbʋ́ pʋyɔɔ yɔ, Ɛsɔ lɩmaɣza wena ɛyáa kpakɩɣ se akɛ kɩmɛlɛndʋ yɔ, akɩlɩ ɛyáa lɔŋsɩnɖɛ. Ɛ-lakasɩ nzɩ́ ɛyáa kpakɩɣ ɖɔɖɔ se sɩwɛ ɛjandʋ yɔ, sɩkɩlɩ ɛyáa ɖoŋ.
26Taabalaa, ɩcɔnɩ ɩna mbʋ́ ɩɩkɛwa nɛ pʋcɔ Ɛsɔ yaa-mɩ yɔ. Mbá ɛyáa kpakaɣ se lɔŋsɩnɖaa yaa ɖoŋ tɩnaa yaa sɔsaa yɔ, pataaɖɔɔ mɩ-taa. 27Ɛlɛ́, Ɛsɔ lɩzɩ mbá ɛyáa kpakɩɣ se kɩmɛlɛmɩŋ yɔ nɛ ɛɖʋnɩ lɔŋsɩnɖaa fɛyɛ. Ɛlɩzɩ ɖɔɖɔ mbʋ́ pʋwɛ ɛjandʋ kedeŋa yɔɔ yɔ nɛ ɛɖʋnɩ mbʋ́ pʋwɛ ɖoŋ yɔ fɛyɛ. 28Ɛnʋ lɩzɩnɩ ɖɔɖɔ mbá pɛfɛyɩ wazaɣ nakɛyɛ kedeŋa yɔɔ cɩnɛ nɛ ɛyáa takpaɣ-wɛ payaa pʋyʋ nɛ pɛfɛyɩ natʋyʋ taa kpem yɔ. Ɛlɩzɩ-wɛ se papɩsɩ sɔsaa mbá pamaɣzɩɣ se pawazɩɣ pʋyʋ yɔ pɛ-ɛsɩndaa. 29Ɛlabɩ ḿbʋ́ se nɔɔyʋ ɛtaapɩzɩ ɛtasɩ ɛ-tɩ kpazʋʋ Ɛsɔ ɛsɩndaa. 30Ŋgʋ́, Ɛsɔ kpɛndɩ mɩ nɛ Krɩstʋ Yesu. Ɛsɔ ɛnʋ eyebina se ɛkɛ ɖɔ-lɔŋsɩnɖɛ. Ɛ-yɔɔ Ɛsɔ tɩŋnaa nɛ ɛpɩsɩ-ɖʋ kʋtʋʋzaa nɛ ɖɩpɩsɩ ɛ-ñɩma nɛ ɛya ɖa-ñʋʋ. 31Ɛlabɩ ḿbʋ́ se pɩla ɛzɩ pamaʋ Ɛsɔtɔm Takayaɣ taa se: «Yee nɔɔyʋ liu ɛwɛɛ se ɛkʋndʋʋ yɔ, ɛkʋndɩnɩ mbʋ́ Kɩpaɣlʋ laba yɔ.»
Currently Selected:
1 Kɔrɛntɩ 1: KABI
Highlight
Share
Copy
Want to have your highlights saved across all your devices? Sign up or sign in